សម្តេច ហ៊ុន សែន ប្រាប់និស្សិតនៅបរទេសឲ្យខំសិក្សាដើម្បីយកចំណេះដឹងមកបម្រើជាតិ

ជាតិ

សម្តេច ហ៊ុន សែន ប្រាប់និស្សិតនៅបរទេសឲ្យខំសិក្សាដើម្បីយកចំណេះដឹងមកបម្រើជាតិ

17, Jan 2017 , 2:54 pm

រូបភាព

ដោយ: ថ្មីៗ

នាឱកាសចូលរួមកិច្ចប្រជុំវេទិកាសេដ្ឋកិច្ចពិភពលោកនៅទីក្រុង Davos ប្រទេសស្វីស សម្តេចនាយករដ្ឋមន្ត្រី ហ៊ុន សែន បានឆ្លៀតសំណេះសំណាលជាមួយពលរដ្ឋ និងនិស្សិតខ្មែរមកពីបណ្តាប្រទេសអឺរ៉ុបមួយចំនួន ដូចជាស្វីស សាធារណរដ្ឋឆេក អាល្លឺម៉ង់ បារាំង និងបែលហ្សិក។ក្នុងជំនួបនោះ សម្តេចបានផ្តាំផ្ញើឲ្យនិស្សិតខិតខំយកចិត្តទុកដាក់សិក្សាដើម្បីយកចំណេះដឹងទៅបម្រើប្រទេសជាតិ។

សម្តេច ហ៊ុន សែន តាមរយៈហ្វេសប៊ុករបស់ខ្លួន បានវាយតម្លៃថា ពលរដ្ឋ និងនិស្សិតដែលធ្វើដំណើរទៅជួបសម្តេច បានបង្ហាញអំពីក្តីស្រឡាញ់ និងយកចិត្តទុកដាក់ចំពោះប្រទេសជាតិ។ នេះជាលើកទី២ហើយដែលប្រមុខរដ្ឋាភិបាលកម្ពុជា ដឹកនាំប្រតិភូទៅប្រជុំនៅប្រទេសស្វីស ដោយកាលពីលើកទី១ គឺនៅក្នុងឆ្នាំ២០១៥ ។

ក្នុងជំនួបនោះ សម្តេចបានរៀបរាប់ប្រាប់ពលរដ្ឋ និងនិស្សិតខ្មែរនៅអឺរ៉ុប ពីការរីកចម្រើនវិស័យកសិកម្ម ទេសចរណ៍ រួមទាំងស្ថេរភាពនយោបាយនៅកម្ពុជា។ សម្តេចបានលើកឡើងថា៖ «ពិតមែនតែកម្ពុជាយើងក្រថវិកា និងសម្ភារ តែយើងមិនក្រគំនិតទេ»៕