ជាតិ
លោក នី ចរិយា នៅតែគ្រងតួនាទីអគ្គលេខាធិការរង គ.ជ.ប
× ភ្នំពេញ៖ គណៈកម្មាធិការជាតិរៀបចំការបោះឆ្នោត (គ.ជ.ប) នៅតែផ្ដល់តួនាទីអគ្គលេខាធិការរង គ.ជ.ប សម្រាប់លោក នី ចរិយា ដដែល ។ នេះជាការសម្រេចរបស់ គ.ជ.ប ។
អ្នកនាំពាក្យ គ.ជ.ប លោក ហង្ស ពុទ្ធា បាននិយាយថា គជប នៅតែរក្សាតំណែងអគ្គលេខាធិការរង ជូនលោក នី ចរិយា សម្រាប់បំពេញការងារគាត់វិញ ក្រោយពីអតីតមន្ត្រីអាដហុករូបនេះ អាចនឹងត្រូវបានដោះលែងនៅពេលណាមួយ នាថ្ងៃខាងមុខ។ការលើកឡើងរបស់លោក ហង្ស ពុទ្ធា ស្របពេលដែលគណបក្សនយោបាយ កំពុងចាប់ផ្ដើមរកពេលវេលាជួបពិភាក្សា ក្នុងផ្លូវនយោបាយ ។ ថ្លែងប្រាប់សារព័ត៌មានថ្មីៗ លោក ហង្ស ពុទ្ធា បានបញ្ជាក់យ៉ាងខ្លីថា៖«បើមានករណីដោះលែងលោក នី ចរិយា មែន គ.ជ.ប នៅតែរក្សាជូនគាត់ ហើយគាត់អាចមកបំពេញការងារបានជាធម្មតា»។
បើតាមអ្នកនាំពាក្យ គ.ជ.ប រូបនេះ ទោះជាលោក នី ចរិយា កំពុងជាប់ឃុំខ្លួនក្តី ប៉ុន្តែនៅទទួលបានបៀរវត្សប្រចាំខែសម្រាប់តួនាទីជាអគ្គលេខាធិការរងនេះដដែល ដោយគ.ជ.ប បានបើកប្រាក់ជូនគ្រួសារលោក នី ចរិយា ជារៀងរាល់ខែ។
សូមបញ្ជាក់ថា លោក នី ចរិយា អគ្គលេខាធិការរងរបស់គ.ជ.ប រួមទាំងមន្ត្រីអាដហុកទាំងបួនរូប លោក នី សុខា លោក ណៃ វ៉ង់ដា លោក យីសុខសាន្ត និងលោកស្រី លឹម មុន្នី ត្រូវបានតុលាការបញ្ជូនទៅឃុំខ្លួន កាលពីដើមខែឧសភា ឆ្នាំ២០១៦ ក្រោមបទចោទ «សូកប៉ាន់សាក្សី» និងបទចោទ «សមគំនិតក្នុងអំពើសូកប៉ាន់សាក្សី»។ បើតាមការចោទប្រកាន់របស់តុលាការ អ្នកទាំងប្រាំនាក់ សុទ្ធតែជាប់ពាក់ព័ន្ធនឹងរឿងរ៉ាវរបស់កញ្ញា ខុម ចាន់តារ៉ាទី ហៅស្រីមុំ ជាមួយនឹងឯកឧត្តម កឹម សុខា អនុប្រធានគណបក្សសង្គ្រោះជាតិ។
សំណុំរឿងរបស់មន្ត្រីអាដហុកនិងមន្ត្រីគ.ជ.ប ត្រូវបានបញ្ចប់ការស៊ើបសួរ តាំងពីថ្ងៃទី៧ ខែធ្នូឆ្នាំ២០១៦ មកម្ល៉េះ។ សម្រាប់នីតិវិធីបន្ត ចៅក្រមស៊ើបសួរ ត្រូវចេញដីកាដំណោះស្រាយមួយ ដោយសម្រេចថា ត្រូវដោះលែងមន្ត្រីអាដហុក និងមន្ត្រីគ.ជ.ប ឬក៏ត្រូវបញ្ជូនទៅជំនុំជម្រះ។ យ៉ាងណារហូតមកដល់ពេលនេះ ចៅក្រមស៊ើបសួរ មិនទាន់ចេញដីកាដំណោះស្រាយនៅឡើយទេ៕
© រក្សាសិទ្ធិដោយ thmeythmey.com