ជាតិ
គ្រួសារមន្ត្រីអាដហុក និងមន្ត្រីគ.ជ.ប ដាក់ញត្តិថ្វាយព្រះមហាក្សត្រ និងទៅនាយករដ្ឋមន្ត្រី
× ភ្នំពេញ៖ គ្រួសារមន្ត្រីអាដហុក និងមន្ត្រីគ.ជ.ប ដែលកំពុងជាប់ពន្ធនាគារ បានស្វែងរកអន្តរាគមន៍ ពីព្រះមហាក្សត្រ និងនាយករដ្ឋមន្ត្រី។ ពួកគេ បានយកញត្តិ ទៅដាក់នៅខុទ្ទកាល័យ សម្តេច ហ៊ុន សែន និងបន្តដង្ហែទៅថ្វាយព្រះមហាក្សត្រ នៅព្រឹកថ្ងៃអង្គារនេះ។
នៅព្រឹកថ្ងៃទី២៤ មករានេះ គ្រួសារមន្ត្រីអាដហុកទាំងបួនរូប និងមន្ត្រីគ.ជ.បមួយរូប បាននាំគ្នាដង្ហែញ្ញតិ ដាក់ជូនសម្តេច នាយករដ្ឋមន្ត្រី ហ៊ុន សែន ដល់ខុទ្ធកាល័យ ដើម្បីសុំអន្តរាគមន៍ឲ្យដោះលែងមន្ត្រីខាងលើ ដែលកំពុងជាប់ពន្ធនាគារ ដោយសាររឿងអាស្រូវរបស់កញ្ញា ខុម ចាន់តារ៉ាទី ហៅស្រីមុំ ជាមួយនឹងឯកឧត្តម កឹម សុខា អនុប្រធានបក្សសង្គ្រោះជាតិ។ នេះបើតាមការអះអាងរបស់លោក ស៊ឹង សែនករុណា មន្ត្រីស៊ើបអង្កេតជាន់ខ្ពស់នៃសមាគមអាដហុក ។
លោក ស៊ឹង សែនករុណា បន្ថែមទៀតថា ក្រោយចាកចេញពីខុទ្ធកាល័យសម្តេច ហ៊ុន សែន រួចហើយ ក្រុមគ្រួសារទាំងនោះ នឹងបន្តដង្ហែញត្តិមួយផ្សេងទៀត ទៅថ្វាយព្រះមហាក្សត្រ ក្នុងគោលបំណងដដែល។
លោក បាននិយាយថា ការសម្រេចចិត្តស្វែងរកអន្តរាគមន៍នេះ គឺដោយសារតែពួកគេ ទន្ទឹងរង់ចាំអស់រយៈពេលយូរមកហើយ ក្នុងការដោះលែងមន្ត្រីអាដហុក និងមន្ត្រីគ.ជ.ប ប៉ុន្តែរហូតមកដល់ពេនេះនៅតែមិនទាន់សញ្ញាវិជ្ជមានណាមួយនោះទេ។ មន្ត្រីជាន់ខ្ពស់រូបនេះបញ្ជាក់ថា៖«ពួកគាត់ យល់ថា វា ខុសទាស់អ្វីទេ គ្រាន់តែសុំឲ្យនាយករដ្ឋមន្ត្រីជួយ ព្រោះគាត់ ជាប្រមុខរដ្ឋាភិបាល ដែលអាចរកយុត្តិធម៌ដល់ពួកគាត់បាន»។
សូមបញ្ជាក់ថា មន្ត្រីអាដហុកទាំងបួនរូប រួមមានលោក នី សុខា លោក ណៃ វង់ដា លោក យី សុខសាន្ត និងលោកស្រី លឹម មុន្នី ព្រមទាំងអគ្គលេខាធិការរងគ.ជ.បមួយរូប បានជាប់ពន្ធនាគារតាំងដើមខែឧសភា ឆ្នាំ២០១៦មកម្ល៉េះ ក្រោមបទចោទ «សូកប៉ាន់សាក្សី» និងបទចោទ «សមគំនិតក្នុងអំពើសូកប៉ាន់សាក្សី»។ បើតាមការរកឃើញរបស់តុលាការ អ្នកទាំងប្រាំខាងលើសុទ្ធតែជាប់ពាក់ព័ន្ធក្នុងសំណុំរឿងរបស់ស្រីមុំ ជាមួយនឹងឯកឧត្តម កឹម សុខា៕
© រក្សាសិទ្ធិដោយ thmeythmey.com