ជាតិ
ពីនេះ ពីនោះ
តើព្រះពុទ្ធទូន្មានមនុស្ស ឲ្យប្រកាន់ឥរិយាបថដូចម្តេច នៅទីសាធារណៈ?
× ភ្នំពេញ៖ ទីសាធារណៈ គឺជាកន្លែងដែលផ្តល់ផលប្រយោជន៍ដល់មនុស្សគ្រប់រូប។ ដូច្នេះ យើងត្រូវប្រកាន់ឥរិយាបថថ្លៃថ្នូរជានិច្ច ប្រកបដោយស្មារតីស្រឡាញ់ ថែរក្សាការពារ ក្នុងលក្ខណៈខ្លួនជាម្ចាស់ពិតៗ។
១) ខាកស្តោះ និងកណ្តាស់៖ ទឹកមាត់ កំហាក សំបោរ កាលណាចេញពីខ្លួនយើងហើយ គេខ្ពើមរអើមណាស់។ ហេតុនេះ យើងគ្រប់គ្នាត្រូវមានរបៀបក្នុងការខាកស្តោះ និងកណ្តាស់។ ពេលធ្វើដំណើរ ពេលបរិភោគ ក្នុងបន្ទប់រៀន សាលប្រជុំ…បើខាកស្តោះ ឬកណ្តាស់ គប្បីប្រើបន្ទប់អានាម័យ កូនកន្សែង ឬ ទីឆ្ងាយពីគេឯង។
២) ក្នុងវត្តអារាម៖ វត្តជាទីគោរពសក្ការ កសាងកុសលផលបុណ្យ និងអប់រំកូនចៅ។ ចូលទីវត្តអារាម ត្រូវធ្វើអាកប្បកិរិយាសុភាពរាបសារ ទន់ភ្លន់ ថ្លៃថ្នូរ ស្លៀកពាក់ស្អាតបាត មិនឆើតឆាយ ហើយចេះថែរក្សាសម្បត្តិរបស់វត្ត គោរពប្រណិប័តន៍ព្រះសង្ឃ និងព្រះពុទ្ធរូប។ នៅទីសក្ការនៃសាសនាដទៃ ក៏ត្រូវចេះសម្របឥរិយាបថសមសួមផងដែរ។
៣) រថយន្តឈ្នួល៖ ការធ្វើដំណើរតាមរថយន្តឈ្នួល មានមនុស្សម្នាជាច្រើន ដោយក្នុងនោះ មានចាស់ ក្មេង ប្រុស ស្រី ស្ត្រីមានផ្ទៃពោះ ចាស់ជរា កុមារ ជនពិការ។ យើងត្រូវមានភាពអធ្យាស្រ័យ សម្រួល ឬផ្ទេរកន្លែងអង្គុយជូនគាត់ ដោយទឹកមុខញញឹមតាមភាពជាក់ស្តែង។ យើងត្រូវគោរពសិទ្ធិគ្នាទៅវិញទៅមក។
៤) នៅតាមរោងទស្សនីយភាព៖ នៅរោងមហោស្រព ទស្សនិកជន ត្រូវគោរពពេលវេលាឲ្យបានត្រឹមត្រូវ។ នៅទីនោះ ត្រូវធ្វើឥរិយាបថថ្លៃថ្នូរជៀសវាងធ្វើអ្វីដែលប៉ះពាល់ដល់សិទ្ធិ និងសុខភាពអ្នកដទៃ។ ទស្សនិកជន ត្រូវយល់ថា សិល្បករ ជាពលរដ្ឋថ្លៃថ្នូរ និងតំណាងសិល្បៈ និងវប្បធម៌ជាតិ។
៥) ការសរសេរសំបុត្រ៖ គេប្រើសំបុត្រ សម្រាប់ផ្តល់ព័ត៌មាន ឬទាក់ទងគ្នាទៅវិញទៅមក។ ដូច្នេះ យើងត្រូវប្រើក្រដាស់សស្អាត សរសេរផ្ចិតផ្ចង់ ដោយមានរបៀប ហើយជៀសវាងប្រើពណ៌ក្រហម។ ដោយឡែក ស្រោមសំបុត្រ នៅខាងខ្នង ត្រូវធ្វើតាមបែបបទ មានអាសយដ្ឋានច្បាស់លាស់ និងត្រឹមត្រូវ។
ប្រភព៖«សីលធម៌ព្រះពុទ្ធសាសនា» រៀបរៀងដោយ ភិក្ខុ គូ សុភាព
© រក្សាសិទ្ធិដោយ thmeythmey.com