ជាតិ
កម្ពុជា កំពុងរៀបចំឯកសារដាក់ប្រាសាទបន្ទាយឆ្មាជាសម្បត្តិបេតិកភណ្ឌពិភពលោក Sakona(រូបភាពពីហ្វេសប៊ុកក្រសួងវប្បធម៌ និងវិចិត្រសិល្បៈ)
× កម្ពុជា កំពុងរៀបចំឯកសារពាក់ព័ន្ធនឹងប្រាសាទបន្ទាយឆ្មា ដើម្បីស្នើបញ្ចូលប្រាសាទនេះ ទៅក្នុងសម្បត្តិបេតិកភណ្ឌពិភពលោក។ ការរៀបចំឯកសារនេះ គឺបន្ទាប់ពីកម្ពុជា បានដាក់ឯកសារស្នើបញ្ចូលប្រាសាទសម្បូរព្រៃគុក ជាបេតិកភណ្ឌវប្បធម៌នៃមនុស្សជាតិ ទៅអង្គការយូនេស្កូរួចរាល់។
ក្រសួងវប្បធម៌ និងវិចិត្រសិល្បៈ កំពុងរៀបចំឯកសារនានាពាក់ព័ន្ធនឹងប្រាសាទបន្ទាយឆ្មា ដើម្បីស្នើទៅកាន់អង្គការយូនេស្កូដាក់បញ្ចូលប្រាសាទនេះ ទៅក្នុងសម្បត្តិបេតិកភណ្ឌពិភពលោក។ លោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈថ្លែងប្រាប់អ្នកសារព័ត៌មានដូច្នេះ ក្នុងពិធីបើកសន្និបាតបូកសរុបការងារវប្បធម៌ឆ្នាំ២០១៦ និងទិសដៅការងារឆ្នាំ២០១៧ នាថ្ងៃទី១ ខែកុម្ភៈ។
យ៉ាងណាក៏ដោយ លោកស្រីរដ្ឋមន្ត្រី មិនបញ្ជាក់ថាឯកសារនោះនឹងរៀបចំរួចរាល់គ្រប់ជ្រុងជ្រោយ ស្របតាមស្តង់ដារ នៅពេលណានោះទេ គ្រាន់តែថាការរៀបចំឯកសារនេះពិបាក និងត្រូវចំណាយពេលយូរ។
ក្រៅពីបង្ហើបព័ត៌មាននេះ លោកស្រី សកុណា ក៏បានឲ្យដឹងដែរថា កម្ពុជាបានដាក់ឯកសារស្នើបញ្ចូលប្រាសាទសម្បូរព្រៃគុកជាបេតិកភណ្ឌវប្បធម៌នៃមនុស្សជាតិ ទៅកាន់គណៈកម្មការអង្គការយូនេស្កូរួចរាល់ហើយ និងរង់ចាំតែការសម្រេចពីអង្គការនេះប៉ុណ្ណោះ។
សូមរម្លឹកថា កម្ពុជាបានបញ្ចូលសម្បត្តិវប្បធម៌មួយចំនួនហើយ ទៅក្នុងបញ្ជីបេតិកភណ្ឌវប្បធម៌រូបី និងអរូបី នៃមនុស្សជាតិ មានដូចជាប្រាសាទអង្គរវត្ត ប្រាសាទព្រះវិហារ ល្ខោនស្រមោលស្បែកធំ របាំព្រះរាជទ្រព្យ និងចាប៉ីដងវែង។ ចាប៉ីដងវែងកម្ពុជា ដែលអង្គការយូណេស្កូ ទើបតែបញ្ចូលក្នុងបញ្ជីបេតិកភណ្ឌវប្បធម៌អរូបីនាអំឡុងកិច្ចប្រជុំនៅក្រុង Addis Ababa ប្រទេសអេត្យូពី នាថ្ងៃទី៣០ ខែវិច្ឆិកា ឆ្នាំ២០១៦កន្លងទៅ៕
© រក្សាសិទ្ធិដោយ thmeythmey.com