អន្តរជាតិ
នយោបាយអន្តរជាតិ
ប្រធានាធិបតី នាយករដ្ឋមន្ត្រី ប្រធានសភា..មន្ត្រីជាន់ខ្ពស់ឡាវ ឈប់ជិះឡានទំនើប ដើម្បីសន្សំថវិកាជាតិ
×
បើមិនមានការប្រែប្រួលនោះទេ ដំណើរការនៃការដេញថ្លៃឡានសេរីទំនើបថ្មីបំផុតដែលដកហូតពីមន្ត្រីរដ្ឋាភិបាលជាន់ខ្ពស់ឡាវ ដែលរាប់បញ្ចូលទាំងប្រធានាធិបតី និងនាយករដ្ឋមន្ត្រីជាដើមនោះ នឹងត្រូវចាប់ផ្តើមនៅក្រោយសប្តាហ៍ហើយ។ នេះ គឺជាគោលនយោបាយមួយរបស់រដ្ឋាភិបាលឡាវដើម្បីបញ្ឈប់មន្ត្រីរដ្ឋាភិបាលបើកបរឡាវទំនើប និងជាពិសេសនោះជួយសន្សំថវិកាជាតិ។
ឡាវប្រភេទ BMW/Series 7/730li ចំនួន៧គ្រឿង និង Mercedes Benzes S350 ចំនួន៨គ្រឿង ដែលដកហូតពីមន្ត្រីជាន់ខ្ពស់រដ្ឋាភិបាលឡាវ នឹងត្រូវដាក់តាំងដើម្បីឲ្យអ្នកចាប់អាមរម្មណ៍ និងភាគីពាក់ព័ន្ធដេញថ្លៃ ឬទិញនៅមជ្ឈមណ្ឌលពិព៌ណជាតិឡាវនាសប្តាហ៍ក្រោយហើយ។ នេះបើយោងតាមការអះអាងរបស់គណៈកម្មាធិការជាតិឡាវ ដែលបានចុះផ្សាយដោយសារព័ត៌មានថៃ The Nation នៅថ្ងៃទី ០៣ កុម្ភៈ។
សូមជម្រាបផងដែរថា ការដកហូតឡានទំនើបពីមន្ត្រីជាន់ខ្ពស់ និងផែនការដាក់ឲ្យដេញថ្លៃនេះ ធ្វើឡើងក្រោយពីមេដឹកនាំបក្សកុម្មុយនីស្ត និងរដ្ឋាភិបាលឡាវ បានព្រមព្រៀងគ្នាថា ឈប់បើកបរ និងប្រើប្រាស់យានយន្តទំនើបៗដូចជា BMW និង Mercedes Benzes ក្នុងគោលដៅដើម្បីកាត់បន្ថយការចំណាយថវិកាជាតិ។ ហើយជំនួសមកវិញ មន្ត្រីជាន់ខ្ពស់ អាចប្រើប្រាស់យានយន្តដែលមានម៉ាក និងតម្លៃថោក និងសមរម្យបានហើយ។
បើតាមប្រភពព័ត៌មានដដែលនោះ គណៈកម្មាធិការជាតិឡាវ ក៏បានឲ្យដឹងដែរថា ការដេញថ្លៃឡានទំនើបនាពេលខាងមុខដ៏ខ្លីនេះ គឺជាការដេញថ្លៃជំនាន់មួយ ដែលដកហូតពីមេដឹកកម្រិតមួយ (Level I) និងកម្រិតពីរ (Level II)។ មេដឹកនាំដែលចាត់ទុកក្នុងកម្រិតមួយនោះ រួមមាន ប្រធានាធិបតី នាយករដ្ឋមន្ត្រី ប្រធានសភា ប្រធានបក្ស និងសមាជិកបក្សកុម្មុយនីស្តឡាវ។ ហើយសម្រាប់ មេដឹកនាំកម្រិតពីរ រួមមាន គណៈកម្មាធិការកណ្តាលបក្ស អនុប្រធានាធិបតី និងអនុប្រធានសភា និងឧបនាយករដ្ឋមន្ត្រី។
ដំណើរការដេញថ្លៃឡានរបស់មន្ត្រីរដ្ឋាភិបាលឡាវនេះដែរ ក៏មិនត្រូវបញ្ចប់នាសប្តាហ៍ក្រោយដែរ។ បើតាមគណៈកម្មាធិការជាតិឡាវដដែលនោះ នឹងមានការដេញថៃ្លជាបន្តបន្ទាប់ទៀត ដ្បិត នៅមានឡាវទំនើបៗជាច្រើនផ្សេងទៀត ដែលទិញដោយស្ថាប័នផ្សេងៗរបស់រដ្ឋាភិបាលឡាវ នៅមិនទាន់បានដកហូតនៅឡើយនោះទេ៕
© រក្សាសិទ្ធិដោយ thmeythmey.com