ជាតិ
អន្តរជាតិ
នយោបាយអន្តរជាតិ
រូបភាព៖ ទំព័រហ្វេសប៊ុក ASEAN + 3 Festival
×![]()
កម្មវិធី«មហាស្រពអាស៊ានបូកបី» នឹងត្រូវរៀបចំឡើងវិទ្យាស្ថានភាសាបរទេស (IFL) នៅថ្ងៃ ១១ ខែមីនាខាងមុខនេះ។ មហោស្រពដំបូងបំផុតនេះ នឹងត្រូវរៀបចំឡើងដោយដេប៉ាតឺម៉ង់សិក្សាអន្តរជាតិ (Department of International Studies) ក្នុងគោលដៅ ផ្សព្វផ្សាយ ចំណេះដឹងស្តីពីអាស៊ាននិងប្រទេសដៃគូសន្ទនាបីផ្សេងទៀត ក៏ដូចជាលើកស្ទួយការសាមគ្គីភាពនិងទំនាក់ទំនងរវាងប្រជាជននិងប្រជាជន ក៏ដូចជាវិស័យទេសចរណ៍អាស៊ានផងដែរ។ 
ដេប៉ាតឺម៉ង់សិក្សាអន្តរជាតិ នៃសាកលវិទ្យាល័យភូមិន្ទភ្នំពេញនឹងរៀបចំកម្មវិធី«មហោស្រពអាស៊ានបូកបី» នៅថ្ងៃ ១១ មីនាខាងមុខពីម៉ោង ៨ព្រឹកដល់ម៉ោង។ មហោស្រពអាស៊ានបូកបី ឬមហោស្រពប្រទេសអាស៊ាន១០ បូក ចិន, ជប៉ុននិងកូរ៉េខាងត្បូងនេះ នឹងត្រូវប្រារព្ធឡើងនៅបរិវេណវិទ្យាស្ថានភាសាបរទេស (IFL) នៃសាកលវិទ្យាល័យភូមិន្ទភ្នំពេញ។
លោកសាស្ត្រាចារ្យ នាក់ ចិន្តារិទ្ធ ប្រធានដេប៉ាតឺម៉ង់សិក្សាអន្តរជាតិនៃវិទ្យាស្ថានភាសាបរទេស បានប្រាប់សារព័ត៌មានថ្មីៗថា កម្មវិធីមហោស្រពអាស៊ានបូកបីនេះមានគោលដៅសំខាន់ផ្តល់ចំណេះដឹងស្តីពីវប្បធម៌, អរិយធម៌, នយោបាយ និងសេដ្ឋកិច្ច អាស៊ានក៏ដូចជាប្រទេសបីជាដៃគូសន្ទនាដែរ។
លោកបានបញ្ជាក់ដូច្នេះថា៖ «គោលដៅសំខាន់នៃកម្មវិធីនេះគឺផ្តល់ចំណេះដឹងពីអត្តសញ្ញាណវប្បធម៌ អរិយធម៌សម្បូរបែបរបស់អាស៊ាន ដល់យុវជន។ ហើយវាក៏មានកម្មវត្ថុបង្ហាញពីសក្តានុពលទេសចរណ៍ និងលើកកម្ពស់ការសាមគ្គីក្នុងទំនាក់ទំនងរវាងប្រជាជននិងប្រជាជនក្នុងតំបន់អាស៊ាននិងប្រទេសជាដៃគូបីទៀតផង»។
សួរថា តើកម្មវិធីនេះធ្វើឡើងដើម្បីសាទរខួប ៥០ឆ្នាំនៃអាស៊ានឬយ៉ាងណា លោក នាក់ ចិន្តារិទ្ធ បានឆ្លើយតបថា វាជាផ្នែកមួយដែរ ថ្វីបើកម្មវិធីមហោស្រពនេះត្រូវប្រារព្ធឡើងមិនចំថ្ងៃខួបកំណើតទី៥០របស់អាស៊ានថ្ងៃ ៨ សីហាក៏ដោយ។ លោកបន្តថា កម្ពុជារៀបចំកម្មវិធីមហោស្រពនេះក៏បង្ហាញឲ្យឃើញពីតួនាទីសំខាន់របស់កម្ពុជាក្នុងនាមជាសមាជិក និងជួយលើកស្ទូយការយល់ដឹងនិងទំនាក់ទំនងរវាងសមាជិកអាស៊ានផងនិងរវាងប្រទេសជាដៃគូផង។
បើតាមលោក នាក់ ចិន្តារិទ្ធ ដដែល នៅថ្ងៃ ១១ មីនា ក្នុងមហោស្រពនេះ អ្នកចូលរួមនឹងអាចទស្សនានិងស្វែងយល់បានច្រើនពីអាស៊ានផង និងប្រទេសជាដៃគូទាំងបីផង ព្រោះវាមានកម្មវិធីនិងសកម្មភាពសំខាន់ៗជាច្រើន។ អ្នកចូលរួមអាចចូលទស្សនាតាមស្តង់ តំណាងប្រទេសនីមួយៗទាំង១៣ ដែលមានរៀបចំពិព័រណ៍ម្ហូបអាហារអាស៊ាន, ការលេងល្បែងប្រជាប្រិយ, ការម្តែងសិល្បៈមានចម្រៀង និងរបាំអាស៊ានផង។
ហើយក្រៅពីនេះអ្នកចូលរួមក៏អាចស្វែងយល់ពីភាសាអាស៊ាន និប្រទេសបីផ្សេងទៀត ក៏ដូចជាស្វែងយល់បន្ថែមពីវប្បធម៌, សេដ្ឋកិច្ច និងនយោបាយរបស់ប្រទេសទាំងនោះព្រោះគេនឹងដាក់តាំងឯកសារផងដែរ។ អ្វីដែលសំខាន់នោះ វានឹងមានការផ្សព្វផ្សាយព័ត៌មានអាហារូបករណ៍ ក្នុងកម្មវិធីមហោស្រពនេះដែរ ដែលវាជាឱកាសសម្រាប់សិស្សនិស្សិតដែលចង់ទៅរៀនបរទេសដូចគ្នា៕
Tag:
ASEAN+3
DIS
IFL
មហោស្រពអាស៊ានបូកបី
© រក្សាសិទ្ធិដោយ thmeythmey.com
