បទយកការណ៍ / បទសម្ភាសន៍
សិស្សពូកែទូទាំងប្រទេស និងជាប់និទ្ទេសA ស៊ាន ម៉ូនីតា ប្រាប់គន្លឹះរៀនយកអាហារូបករណ៍ទៅជប៉ុន
×
ភ្នំពេញ៖ រយៈពេលតែ១ឆ្នាំ កញ្ញា ស៊ាន ម៉ូនីតា បានសម្រេចសមិទ្ធផលចំនួន៣ ក្នុងការសិក្សា។ នាងប្រឡងជាប់ជាសិស្សពូកែគណិតវិទ្យាទូទាំងប្រទេសលេខ១ ទទួលបាននិទ្ទេសA ក្នុងការប្រឡងបាក់ឌុបឆ្នាំ២០១៦ និងទទួលបានអាហារូបករណ៍ថ្នាក់បរិញ្ញាបត្ររងជំនាញស្ថាបត្យកម្ម នៅប្រទេសជប៉ុន។ មុនឡើងយន្តហោះទៅប្រទសជប៉ុន ម៉ូនីតា ផ្តាំថាការត្រៀមខ្លួន ទំនាក់ទំនង កំណត់គោលដៅឲ្យច្បាស់ និងការគិតវិជ្ជមាន គឺជាកត្តាគន្លឹះសំខាន់ សម្រាប់ឈោងចាប់អាហារូបករណ៍បរទេស។
ក្នុងវ័យ១៨ឆ្នាំ កញ្ញា ស៊ាន ម៉ូនីតា បានសម្រេចក្តីសុបិនរបស់ខ្លួនតាំងពីកុមារ ដែលចង់ទៅសិក្សានៅប្រទេសជប៉ុន។ មូលហេតុដែលនាំឲ្យ កញ្ញា ម៉ូនីតា ចិញ្ចឹមចិត្តចង់សិក្សានៅជប៉ុន ពីព្រោះនាងមានមិត្តភក្តិម្នាក់ជាកូនកាត់ជប៉ុន ដែលធ្លាប់រស់នៅប្រទេសជប៉ុន។ មិត្តម្នាក់នេះ បានរៀបរាប់ប្រាប់នាង ពីការរស់នៅរបស់ប្រជាជនជប៉ុន និងប្រព័ន្ធអប់រំនៅជប៉ុន។ ជាមួយគ្នានោះ ពេលនាង កំពុងរៀនថ្នាក់ទី៩ ម៉ូនីតា បានស្គាល់សិស្សច្បងម្នាក់ទៀត ដែលជាប់អាហារូបករណ៍ទៅសិក្សានៅប្រទេសជប៉ុន ដែលធ្វើឲ្យនាងមានក្តីស្រមៃ ចង់សិក្សានៅប្រទេសជប៉ុនកាន់តែខ្លាំងឡើងៗ។
ព្រោះតែក្តីសុបិននេះ ស៊ាន ម៉ូនីតា បានខិតខំសិក្សាតាំងពីថ្នាក់ទី១០ ។ ការប្រឹងប្រែងនេះ ធ្វើឲ្យការសិក្សា របស់ម៉ូនីតា ជោគជ័យជាបន្តបន្ទាប់។ អតីតសិស្សវិទ្យាល័យសួង ក្នុងខេត្តត្បូងឃ្មុំ ជាសិស្សពូកែគណិតវិទ្យាទូទាំងប្រទេសចំណាត់ថ្នាក់លេខ១ ជាសិស្សនិទ្ទេសA ម្នាក់ក្នុងចំណោមសិស្សនិទ្ទេស A ទាំង៤០៥ នៃការបាក់ឌុបឆ្នាំ២០១៦ និងកាលពីចុងខែធ្នូ ឆ្នាំ២០១៦កន្លងទៅ យុវតីសម្បុរស្រអែមរូបនេះ ប្រឡងជាប់អាហារូបករណ៍ទៅប្រទេសជប៉ុន ថ្នាក់បរិញ្ញាបត្ររងជំនាញស្ថាបត្យកម្ម។ ម៉ូនីតា បញ្ជាក់ក្តីរំភើបចំពោះជោគជ័យចុងក្រោយនេះថា៖«ពេលចេញលទ្ធផលក្នុងចុងខែ១២ ខ្ញុំសប្បាយចិត្តណាស់ ព្រោះខ្ញុំសម្រេចបាន អ្វីដែលខ្ញុំចង់បានយូរហើយ»។
តាមពិតទៅមុនប្រឡងជាប់អាហារូបករណ៍ទៅជប៉ុន ម៉ូនីតា ក៏បានទទួលអាហារូបករណ៍ ពីសាកលវិទ្យាល័យហ្សាម៉ាន់ និងវិទ្យាស្ថានបច្ចេកវិទ្យាកម្ពុជា(តិចណូ)ដែរ ប៉ុន្តែនាងបានចោលអាហារូបករណ៍ទាំង២នេះ ដើម្បីឈោងចាប់ការសិក្សានៅជប៉ុន ដែលនាងប៉ងតាំងពីក្មេងនោះ។
យុវតីកូនច្បងក្នុងចំណោមបងប្អូន៣នាក់ នៃគ្រួសារធូរធាររូបនេះ នឹងទៅបន្តសិក្សានៅប្រទេសជប៉ុន ក្នុងខែមេសាខាងមុខ។ មុននឹងឡើងយន្តហោះទៅសិក្សានៅទឹកដីនៃក្តីសុបិនរបស់ខ្លួន នាងមិនកំណាញ់សោះឡើយ ចំពោះការចែករំលែកបទពិសោធរបស់ខ្លួនអំពីគន្លឹះសិក្សា និងការដាក់អាហារូបករណ៍ទៅបរទេសប្រាប់ដល់និស្សិតដទៃទៀត។
បើតាម ម៉ូនីតា ដើម្បីប្រឡងអាហារូបករណ៍ឲ្យបានជោគជ័យ ទី១ ត្រូវត្រៀមខ្លួនទុកជាមុន ដោយប្រមូលលំហាត់ និងវិញ្ញាសាដែលធ្លាប់ចេញប្រឡងមុនៗ ពីព្រោះការចេញប្រឡងភាគច្រើន វាមានលំនាំស្រដៀងគ្នា។ ទី២ ត្រូវមានទំនាក់ទំនងជាមួយសិស្សច្បងដែលធ្លាប់ទទួលបានអាហារូបករណ៍បរទេស ហើយប្រមូលគំនិត និងយោបល់របស់ពួកគាត់ មកពិចារណា និងអនុវត្តន៍តាម។ ទី៣ ត្រូវរកចំណុចខ្សោយខ្លួនឯងឲ្យឃើញ ដើម្បីអភិវឌ្ឍន៍វាឡើងវិញ។ និងទី៤ ត្រូវគិតវិជ្ជមានជានិច្ច។ ម៉ូនីតានិយាយទៀតថា ពេលរូបគេប្រឡងគេតែងគិតវិជ្ជាមានជានិច្ច ថានាងនឹងប្រឡងជាប់។ ក្នុងករណីមិនជាប់ នាងក៏មិនបោះបង់ដែរ។
កញ្ញា ស៊ាន ម៉ូនីតា បាននិយាយថា ទម្រាំសម្រេចបំណងនេះ នាងត្រូវធ្វើដំណើរមកភ្នំពេញជាញឹកញាប់ ដើម្បីស្វែងរកព័ត៌មានអាហារូបករណ៍ និងត្រៀមខ្លួនប្រឡង ខណៈការប្រឡងបាក់ឌុប និងប្រឡងសិស្សពូកែ ស្ថិតក្នុងពេលវេលាកៀកគ្នា។ ម៉ូនីតា ពន្យល់ថា៖«ខ្ញុំត្រូវត្រៀមជា៣ដំណាក់កាល ដើម្បីប្រឡងបាក់ឌុប ប្រឡងសិស្សពូកែ និងអាហារូបករណ៍ទៅជប៉ុន។ ការបែងចែកច្បាស់លាស់ និងការត្រៀមនេះហើយ ទើបខ្ញុំធ្វើបានល្អទាំង៣»។
តាមគម្រោង ម៉ូនីតា នឹងសិក្សាបន្តថ្នាក់បរិញ្ញាបត្រនៅប្រទេសជប៉ុន បន្ទាប់ពីនាងបញ្ចប់ការសិក្សាថ្នាក់បរិញ្ញាបត្ររងនៅទីនោះ។ ម៉ូនីតា សន្យាថា នឹងស្ពាយចំណេះដឹងផ្នែកស្ថាបត្យកម្ម ដែលខ្លួនបានក្រេបជញ្ជក់ពីប្រទេសជប៉ុន មកជួយអភិវឌ្ឍន៍មាតុភូមិរបស់ខ្លួនវិញ។ ម៉ូនីតា និយាយយ៉ាងដូច្នេះថា៖ «ខ្ញុំមិនចង់ធ្វើជាស្ថាបត្យករដែលមានតែសញ្ញាបត្រនោះទេ តែខ្ញុំចង់ធ្វើជាស្ថាបត្យករ ដែលពោរពេញដោយសមត្ថភាព ដើម្បីវិលមកជួយប្រទេសយើងវិញ»៕
Tag:
ស៊ាន ម៉ូនីតា
អាហារូបករណ៍
© រក្សាសិទ្ធិដោយ thmeythmey.com