អន្តរជាតិ
នយោបាយអន្តរជាតិ
ដូណាល់ ត្រាំ ប្រាប់អ៊ីរ៉ង់ថា លោកមិនចិត្តល្អដូច អូបាម៉ា ឡើយ
× ប្រធានាធិបតី ដូណាល់ ត្រាំ បានបន្តគំរាមរដ្ឋឈូងសមុទ្រអ៊ីរ៉ង់ ដែលមិនស្ដាប់ការព្រមានរបស់លោក ជុំវិញធ្វើតេស្តមីស៊ីលបាលីស្ទិក ដែលអាមេរិកចាត់ទុកជាការល្មើសកិច្ចព្រមព្រៀងនុយក្លេអ៊ែររវាងអ៊ីរ៉ង់ និងមហាអំណាច ក៏ដូចជាសេចក្ដីសម្រេចរបស់ក្រុមប្រឹក្សាសន្តិសុខ។ យ៉ាងណាក្ដី រដ្ឋាភិបាលក្រុងតេហេរ៉ង់ មិនបានរវីរល់នឹងការព្រមាននេះឡើយ ហើយក៏ទំនងជាត្រៀមខ្លួនឆ្លើយតបនឹងសកម្មភាពរបស់អាមេរិកទៀតផង។
ក្រោយអ៊ីរ៉ង់មិនស្ដាប់ការព្រមានរបស់ខ្លួន ប្រធានាធិបតិអាមេរិក ដូណាល់ ត្រាំ រឹតតែក្ដៅស្លឹកត្រចៀកខ្លាំងឡើង និងបានដាក់ទណ្ឌកម្មថ្មីទៀតលើរដ្ឋឥស្លាមមួយនេះ។ អ៊ីរ៉ង់ បានធ្វើឲ្យរដ្ឋបាលថ្មីអាមេរិក ភ្ញាក់ផ្អើលខ្លាំង ក្រោយប្រទេសនេះ ប្រកាសថាខ្លួនបានសាកល្បងមីស៊ីលបាលីស្ទិក ផ្ទុយពីការហាមឃាត់ក្នុងកិច្ចព្រមព្រៀងនុយក្លេអ៊ែរដែលអ៊ីរ៉ង់សម្រេចបានជាមួយមហាអំណាចពិភពលោកទាំង៦ ជាថ្នូរនឹងការលើកលែងទណ្ឌកម្ម។
ជារឿយៗ លោក ដូណាល់ ត្រាំ បន្តរិះគន់កិច្ចព្រមព្រៀងនុយក្លែរអ៊ីរ៉ង់ដែលបង្កើតឡើងរវាងអ៊ីរ៉ង់និងមហាអំណាចប្រាំ បួកមួយ ក្នុងជំនាន់រដ្ឋបាលលោក បារ៉ាក់ អូបាម៉ា កន្លងមក។ លោកគិតថា កិច្ចព្រមព្រៀងនេះ មិនមានឥទ្ធិពលលើអ៊ីរ៉ង់អ្វីដែរ ហើយលោកគំរាមចរចាលើកិច្ចព្រមព្រៀងនេះឡើងវិញថែមទៀតផង។
នៅព្រឹកថ្ងៃទី៣ ខែមករា ប្រធានាធិបតីអាមេរិករូបនេះ បានប្រើទំព័រ Twitter របស់លោកព្រមានក្រុងតេហេរ៉ង់ ដែលមិនខ្វល់ខ្វាយពីការព្រមានលើកមុនៗរបស់លោក។ លោក ដូណាល់ ត្រាំ បានសរសេរថា៖ «អ៊ីរ៉ង់ កំពុងប្រលែងលេងជាមួយភ្លើង។ អ៊ីរ៉ង់ មិនបានគិតថា រដ្ឋបាលប្រធានាធិបតី បារ៉ាក់ អូបាម៉ា ចិត្តល្អដាក់ខ្លួនកម្រិតណាឡើយ។ ប៉ុន្តែខ្ញុំ នឹងមិនចិត្តល្អដូចលោក អូបាម៉ា ឡើយ»។
បើតាមសារព័ត៌មាន Al Jazeera មិនយូរប៉ុន្មានក្រោយការបង្ហោះសារព្រមានលើ Twitter របស់លោក ត្រាំ រដ្ឋមន្ត្រីការបរទេសអ៊ីរ៉ង់ Mohammad Javad Zarif ក៏បានប្រតិកម្មវិញភ្លាមៗដែរ។ លោក Javad Zarif ក៏បានសរសេរលើគណនី Twitter របស់លោកវិញថា អ៊ីរ៉ង់ មិនខ្លាចការគំរាមរបស់ប្រធានាធិបតីអាមេរិកឡើយ។ អ៊ីរ៉ង់ ក៏នឹងមិនចាប់ផ្ដើមសង្គ្រាមដែរ តែអ៊ីរ៉ង់ នឹងប្រើប្រាស់សមត្ថភាពផ្ទាល់ខ្លួន ដើម្បីទប់ទល់ពីការគំរាមកំហែងណាមួយ។
បន្ថែមពីលើនោះ ទូរទស្សន៍រដ្ឋអ៊ីរ៉ង់ ក៏បានផ្សាយដែរថា ក្រុងតេហេរ៉ង់ ក៏បានហាមឃាត់អត្តពលិកបោកចំបាប់របស់អាមេរិក ពីការចូលរួមការប្រកួតប្រជែងកម្មវិធីបោកចំបាប់សេរីពិភពលោកផងដែរ។ ការហាមឃាត់នេះ គឺជាការឆ្លើយតបនឹងបទបញ្ជារបស់លោក ត្រាំ ដែលរារាំងលំហូរជនមូស្ល៊ីមមកពីប្រទេសចំនួន៧ រួមទាំងអ៊ីរ៉ង់ផងនោះ។
សូមបញ្ជាក់ដែរថា នៅថ្ងៃទី២ ទីប្រឹក្សាសន្តិសុខជាតិអាមេរិកបានចេញសេចក្តីថ្លែងការណ៍មួយថ្កោលទោស និងប្រកាសថា ខ្លួនដាក់អ៊ីរ៉ង់ស្ថិតក្រោមការត្រួតពិនិត្យក្រោយអ៊ីរ៉ង់បាញ់សាកល្បងមីស៊ីល។ ហើយរដ្ឋបាលលោក ដូណាល់ ត្រាំ ក៏បានដាក់ទណ្ឌកម្មប្រឆាំងអ៊ីរ៉ង់តែម្ដង។ សេចក្តីថ្លែងការណ៍នោះបានបញ្ជាក់ដូច្នេះ«អ៊ីរ៉ង់ ប្រឆាំងដំណោះស្រាយលេខ ២២៣១ របស់ក្រុមប្រឹក្សាសន្តិសុខអង្គការសហប្រជាតិ ដែលទាមទារឲ្យអ៊ីរ៉ង់បញ្ឈប់រាល់សកម្មភាពទាំងឡាយណាដែលពាក់ព័ន្ធការបង្កើតកាំជ្រួចមីស៊ីលដែលអាចបំពាក់ក្បាលគ្រាប់នុយក្លេអ៊ែរបាន រួមទាំងការបាញ់កាំជ្រួចមីស៊ីឆ្លងទ្វីបដែរ»៕
Tag:
អ៊ីរ៉ង់
ដូណាល់ ត្រាំ
បារ៉ាក់ អូបាម៉ា
© រក្សាសិទ្ធិដោយ thmeythmey.com