អន្តរជាតិ
នយោបាយអន្តរជាតិ
ដូណាល់ ត្រាំ នឹងជួបមេដឹកនាំណាតូ និយាយរឿងបង្កើនថវិកាយោធារបស់ណាតូ
× ប្រធានាធិបតីអាមេរិក ដូណាល់ ត្រាំ នឹងជួបជាមួយបណ្ដាមេដឹកនាំរដ្ឋសមាជិកបក្សសម្ព័ន្ធយោធាណាតូ នៅខែឧសភាខាងមុខ ដើម្បីជជែកលើបញ្ហាចំណាយរបស់សម្ព័ន្ធយោធានេះ។ លោក ត្រាំ សន្យាដូចនេះក្នុងកិច្ចសន្ទនាតាមទូរសព្ទជាមួយអគ្គលេខាធិការសម្ព័ន្ធណាតូនៅថ្ងៃទី៥ ខែកុម្ភៈ ចំពេលដែលលោក ត្រាំ រិះគន់ថា សមាជិកណាតូមិនបានបង់ប្រាក់វិភាគទានរបស់ខ្លួនតាមការសន្យានោះ។ លោកក៏បានគំរាមដកអាមេរិកចេញពីសម្ព័ន្ធយោធានេះ ដែលធ្វើឲ្យសមាជិកណាតូ ព្រួយបារម្ភយ៉ាងខ្លាំង។
សេតវិមាន នៅថ្ងៃទី៥ ខែកុម្ភៈ បាននិយាយថា ប្រធានាធិបតី ដូណាល់ ត្រាំ បានសន្ទនាតាមទូរសព្ទជាមួយអគ្គលេខាធិការសម្ព័ន្ធយោធាណាតូ Jens Stoltenberg និងបានពិភាក្សាគ្នាលើប្រធានបទជាច្រើនដោយរួមទាំងវិបត្តិនៅភាគខាងកើតអ៊ុយក្រែនផងដែរ។ ក្នុងកិច្ចសន្ទនាតាមទូរសព្ទ លោកប្រធានាធិបតី ត្រាំ ក៏បានសន្យាទៅជួបមេដឹកនាំប្រទេសសមាជិកសម្ព័ន្ធយោធាណាតូនៅខែឧសភា ដើម្បីពិភាក្សាលើទំនាក់ទំនងរវាងភាគីទាំងពីរ ដែលរអាក់រអួលខ្លាំងដោយសារគោលនយោបាយរបស់លោក ត្រាំ ។
បើយោងតាមទីភ្នាក់ងារព័ត៌មាន Reuters ក្នុងសេចក្ដីថ្លែងការណ៍របស់ខ្លួន សេតវិមាន បានឲ្យដឹងទៀតថា ប្រធានាធិបតីអាមេរិក និងប្រមុខសម្ព័ន្ធយោធាណាតូ បានជជែកគ្នាការចំណាយដ៏ច្រើនសន្ធឹកសន្ធាប់របស់សម្ព័ន្ធយោធានេះ ក៏ដូចជាធ្វើយ៉ាងណាឲ្យសមាជិកទាំងអស់បង់ប្រាក់វិភាគទានតាមការប្ដេជ្ញាចិត្តរបស់ខ្លួន។ រឿងលុយចំណាយនេះ ដែលធ្វើឲ្យលោក ត្រាំ គំរាមយកអាមេរិកចេញពីណាតូ ដ្បិតកន្លងមក អាមេរិកជាចេញលុយថ្លៃចំណាយច្រើនជាងគេនៃចំណាយសរុប គឺរហូតដល់ទៅ៧០ភាគរយឯណោះ។
តាំងតែពីយុទ្ធនាការស្វែងរកសំឡេឆ្នោតមកនោះ លោកប្រធានាធិបតី ត្រាំ បានសន្យាជំរុញឲ្យសមាជិកសម្ព័ន្ធយោធាដ៏ធំនេះ បង្កើនលុយថ្លៃចំណាយរបស់ខ្លួនឲ្យបាន២ភាគរយ ដើម្បីកាត់បន្ថយអម្រែកហិរញ្ញវត្ថុដ៏ច្រើនលើសលប់របស់អាមេរិក។ យ៉ាងណាក្ដី គំនិតនេះ រងការប្រឆាំងខ្លាំងទាំងពីសមាជិកបក្សសាធារណរដ្ឋ ក្រុមប្រជាធិបតេយ្យ និងសមាជិកណាតូផ្ទាល់ ព្រោះពួកគេខ្លាចរុស្ស៊ីឆក់ឱកាសនេះ ដើម្បីបន្តការគំរាមមកលើតំបន់អឺរ៉ុបខាងកើត។
ជាងនេះទៅទៀត បណ្ដាសមាជិកអឺរ៉ុប ក៏មិនសូវសប្បាយចិត្ត ពេលឃើញប្រធានាធិបតី ត្រាំ ងាកទៅរកចំណងមិត្តភាពជិតស្និទ្ធជាមួយរុស្ស៊ី និងទុកអឺរ៉ុបដោយឡែកនោះ។ ប្រធានាធិបតីរូបនេះ ក៏ត្រៀមលុបចោលទណ្ឌកម្មដែលដាក់លើរុស្ស៊ីកាលពីជំនាន់ប្រធានាធិបតី បារ៉ាក់ អូបាម៉ា ជុំវិញការលេបយកតំបន់គ្រីមៀ ក៏ដូចជាអំពើហិង្សានៅភាគខាងកើតអ៊ុយក្រែន ដែលលោកខាងលិចចោទរុស្ស៊ីថា បានជួយគាំទ្រក្រុមផ្ដាច់ខ្លួនទៀតផង។
មិនត្រឹមតែចង់ស្ដារទំនាក់ទំនងដែលរង្គោះរង្គើឡើយ លោក ត្រាំ ក៏នឹងធ្វើការជាមួយរុស្ស៊ី ដើម្បីប្រយុទ្ធប្រឆាំងភេរវកម្មលើពិភពលោក និងដោះស្រាយវិបត្តិនៅស៊ីរីផងនោះ។ ប្រធានាធិបតីរូបនេះ ហាក់មិនអើពើពីការព្រួយបារម្ភរបស់អឺរ៉ុបលើការគំរាមពីសំណាក់រុស្ស៊ីឡើយ ដោយបានលោកបានបែរខ្នងដាក់សម្ព័ន្ធមិត្តចាស់របស់ខ្លួន និងងាកទៅរកភាពជិតស្និទ្ធជាមួយប្រធានាធិបតី វ្ល៉ាឌីមៀរ ពូទីន ទៅវិញ។ គេប្រហែលមិនភ្លេចទេ កាលពីយុទ្ធនាការបោះឆ្នោត មេដឹកនាំទាំងពីរបានសរសើរគ្នាទៅវិញទៅមក និងអះអាងថា អាចធ្វើការជាមួយគ្នាបាន៕
Tag:
ដូណាល់ ត្រាំ
NATO
Jens Stoltenberg
© រក្សាសិទ្ធិដោយ thmeythmey.com