អន្តរជាតិ
នយោបាយអន្តរជាតិ
អ៊ីរ៉ង់អរគុណ ដូណាល់ ត្រាំ ដែលលាតត្រដាងមុខមាត់ពិតរបស់អាមេរិក មេដឹកនាំកំពូល Ayatollah Ali Khamenei ក្នងជំនួបជាមួយបណ្ដាមេបញ្ជាការទ័ពអាកាស (រូបថតពីវ៉េបសាយការិយល័យមេដឹកនាំកំពូលអ៊ីរ៉ង់)
×
មេដឹកនាំកំពូលអ៊ីរ៉ង់ Ayatollah Ali Khamenei នៅថ្ងៃទី៧ ខែកុម្ភៈ បាននិយាយរិះគន់ចំៗលើប្រធានាធិបតីអាមេរិក ដូណាល់ ត្រាំ ដែលបានដាក់ទណ្ឌកម្មថ្មីបន្ថែមទៀតលើអ៊ីរ៉ង់ ក្រោយការបាញ់សាកល្បងមីស៊ីលបាលីស្ទិក។ រដ្ឋបាលលោក ត្រាំ បញ្ជាក់ថា សកម្មភាពរបស់អ៊ីរ៉ង់ផ្ទុយពីកិច្ចព្រមព្រៀងនុយក្លេអ៊ែរ និងសេចក្ដីសម្រេចរបស់ក្រុមប្រឹក្សាសន្តិសុខ។ ប៉ុន្តែមេដឹកនាំកំពូលអ៊ីរ៉ង់ Ali Khamenei បែរជាអរគុណលោក ត្រាំ វិញព្រោះទង្វើលោក ត្រាំ បង្ហាញមុខមាត់ពិតរបស់អាមេរិក។
ប្រមុខដឹកនាំអ៊ីរ៉ង់ Ayatollah Ali Khamenei បាននិយាយផ្លែផ្កាដាក់ប្រធានាធិបតី ដូណាល់ ត្រាំ ដែលនិយាយថា អ៊ីរ៉ង់កំពុងប្រលែងលេងជាមួយភ្លើង ព្រោះហ៊ានសាកល្បងមីស៊ីលបាលីស្ទិក បំពានការហាមប្រាមរបស់អន្តរជាតិ។ មេដឹកនាំកំពូលអ៊ីរ៉ង់រូបនេះនិយាយថា វត្តមានរបស់លោក ត្រាំ បានបង្ហាញពីធាតុពិតរបស់អាមេរិក ដែលមិនអាចទុកចិត្តអ្វីបានឡើយ ហើយថែមទាំងដឹកនាំដោយប្រព័ន្ធពុករលួយទៀតផង។
នៅចំពោះមុខមេបញ្ជាការទ័ពអាកាសជាច្រើន លោក Ali Khamenei បានអរគុណប្រធានាធិបតីអាមេរិក ចំពោះការបញ្ចេញមុខមាត់ពិតរបស់អាមេរិក ដែលលោក Ali Khamenei ផ្ទាល់ជឿថា ពោរពេញដោយអំពើពុករលួយ។ មេដឹកនាំអ៊ីរ៉ង់បានលើកចំៗថា លោក ត្រាំ បានបង្ហាញការពិតនូវអ្វីដែលអ៊ីរ៉ង់បាននិយាយអស់ពេល៣០ឆ្នាំមកហើយ។ ពោល គឺអំពើពុករលួយស៊ីរូងនយោបាយ សេដ្ឋកិច្ច និងសង្គមអាមេរិក ហើយលោក ត្រាំ បានលាតត្រដាងរឿងនេះនៅពេលមុន និងក្រោយការបោះឆ្នោត។
បើតាមសារព័ត៌មាន The New York Times ក្រៅពីនិយាយឌឺដងហើយនោះ លោក Ali Khamenei ក៏បានរិះគន់ការគោរពសិទ្ធិមនុស្សនៅអាមេរិក ក្រោយកុមារអ៊ីរ៉ង់វ័យ៥ឆ្នាំ ត្រូវប៉ូលិសអាមេរិកចាប់ដាក់ខ្នោះអំឡុងពេលអនុវត្តបទបញ្ជាហាមឃាត់លំហូរអន្តោប្រវេសន៍មកពីប្រទេសឥស្លាមចំនួន៧ រួមទាំងអ៊ីរ៉ង់ផងដែរនោះ។ លោក បានហៅការដាក់ខ្នោះនេះថាជាការបង្ហាញការពិតនៃការអនុវត្តសិទ្ធិមនុស្សនៅទឹកដីអាមេរិក។
ការអធិប្បាយចំៗរបស់មេដឹកនាំកំពូលអ៊ីរ៉ង់លើអ្នកដឹកនាំអាមេរិក គឺជារឿងកម្រ និងធ្វើឡើងចំពេលដែលទំនាក់ទំនងរវាងអ៊ីរ៉ង់ និងអាមេរិក រង្គោះរង្គើនាពេលចុងក្រោយ បន្ទាប់ពីទំនាក់ទំនងនេះមានភាពរលូនក្រោមអាណត្តិអតីតប្រធានាធិបតី បារ៉ាក់ អូបាម៉ា ។ ការហាមឃាត់ជនជាតិអ៊ីរ៉ង់ធ្វើដំណើរទៅអាមេរិក និងទណ្ឌកម្មរបស់រដ្ឋបាលលោក ត្រាំ ដាក់លើក្រុងតេហេរ៉ង់ ក៏ដូចជាការសាកល្បងមីស៊ីលបាលីស្ទិក សុទ្ធតែជាបញ្ហានាំឲ្យទំនាក់ទំនងដែលលូតលាស់ បែរជាក្រៀមស្វិតវិញ។
មិនតែប៉ុណ្ណោះ ប្រធានាធិបតីអាមេរិក ក៏គំរាមចរចាកិច្ចព្រមព្រៀងនុយក្លេអ៊ែរឡើងវិញ ដោយលុបចោលកិច្ចព្រមព្រៀងចាស់ដែលជាសមិទ្ធផលរបស់លោកអូបាម៉ានោះ។ លោក ត្រាំ ចាត់ទុកជាការសម្រេចបានកិច្ចព្រមព្រៀងនេះ ជាសមានចិត្តទូលាយរបស់រដ្ឋបាលលោកអូបាម៉ា តែលោក ត្រាំ នឹងមិនចិត្តល្អបែបនេះ។ ប៉ុន្តែខាងអ៊ីរ៉ង់វិញ ហៅកិច្ចព្រមព្រៀងនេះជារឿងឈ្នះ-ឈ្នះ ហើយការចរចាឡើងវិញ ទំនងជាមិនអាចសម្រេចបានកិច្ចព្រមព្រៀងដែលល្អទាំងសងខាងឡើយ៕
Tag:
ដូណាល់ ត្រាំ
Ayatollah Ali Khamenei
អ៊ីរ៉ង់
អាមេរិក
© រក្សាសិទ្ធិដោយ thmeythmey.com