ជាតិ
នយោបាយជាតិ
ឯកឧត្តម សម រង្ស៊ី ៖ «ទោះខ្ញុំលះបង់រាល់តួនាទី ក៏ខ្ញុំនៅតែជានិមិត្តរូបតំណាងទឹកចិត្តពលរដ្ឋ»
× ភ្នំពេញ៖ ប្រធានគណបក្សសង្គ្រោះជាតិឯកឧត្តម សម រង្ស៊ី ដែលកំពុងគេចខ្លួននៅក្រៅប្រទេសបាននិយាយថា ទោះបីលោកលះបង់រាល់តួនាទីនៅក្នុងគណបក្សក្តី ក៏ខ្លួននៅតែជានិមិត្តរូបតំណាងឲ្យទឹកចិត្តពលរដ្ឋទាំងមូលនៅក្នុងប្រទេសកម្ពុជាដែរ។ ការលើកឡើងរបស់ឯកឧត្តម សម រង្ស៊ី បែបនេះស្របពេលដែលសេចក្តីស្នើច្បាប់ ដែលមិនផ្តល់ឱកាសឲ្យទណ្ឌិត មានសិទ្ធិធ្វើជាប្រធានគណបក្សនយោបាយ ត្រូវបានបញ្ជូនទៅកាន់រដ្ឋសភា។
ឯកឧត្តម សម រង្ស៊ី ដែលកំពុងហ៊ុំព័ទ្ធដោយពាក្យបណ្ដឹងពីនាយករដ្ឋមន្ត្រី និងមន្ត្រីរដ្ឋាភិបាលនេះ ចាត់ទុកការកែប្រែច្បាប់ស្តីពីគណបក្សនយោបាយ ដែលខាងគណបក្សប្រជាជនកម្ពុជា កំពុងដាក់ស្នើទៅរដ្ឋសភានោះ គឺមានបំណងចង់យកបញ្ហារបស់លោកធ្វើលេស ដើម្បីរំលាយគណបក្សសង្គ្រោះជាតិ។ ឯកឧត្តម សម រង្ស៊ី យល់ថា បើសិនច្បាប់នេះពិតជាហាមឃាត់លោក មិនអាចឲ្យដឹកនាំបក្សប្រឆាំងមែននោះ វាបង្ហាញថាគណបក្សប្រជាជនកម្ពុជា កំពុងចង់រឹតត្បិតសិទ្ធិសេរីភាពគណបក្សលោក ដែលមានលទ្ធភាពខ្ពស់ជាងគេក្នុងការប្រកួតសន្លឹកឆ្នោតអាណត្តិក្រោយនេះ។
ប្រធានគណបក្សប្រឆាំងដែលត្រូវបានរដ្ឋាភិបាលហាមមិនឲ្យចូលស្រុករូបនេះ បានសរសេរលើហ្វេសប៊ុកខ្លួនដូច្នេះថា៖«តែច្បាប់តុបតែងឡើង ដើម្បីគ្រាន់តែដកហូតតួនាទីពី សម រង្ស៊ី នេះ នឹងមិនមានឥទ្ធិពលអ្វីទេ ក្នុងឆាកនយោបាយនៃប្រទេសកម្ពុជា។ ទោះជាខ្ញុំលះបង់រាល់តួនាទីរបស់ខ្ញុំ ក្នុងជួរគណបក្សក៏ដោយ ក៏ខ្ញុំនៅតែជានិមិត្តរូប តំណាងឲ្យទឹកចិត្តប្រជារាស្ត្រ ដែលប្រឆាំងរបបផ្តាច់ការ និងពុករលួយសព្វថ្ងៃ ។ ចំណុចនេះហើយ ដែលមានសារៈសំខាន់ ក្នុងការកំណត់ទិសនយោបាយ ក្នុងចិត្តរបស់ប្រជារាស្ត្រខ្មែរ»។
ការលើកឡើងរបស់ឯកឧត្តម សម រង្ស៊ី បែបនេះ ក្រោយពេលដែលតំណាងរាស្ត្រគណបក្សប្រជាជនកម្ពុជាចំនួន៦០នាក់ បានចុះហត្ថលេខាលើសេចក្តីស្នើច្បាប់ ដែលមិនអនុញ្ញាតឲ្យ បុគ្គលជាទណ្ឌិត ធ្វើជាប្រធានគណបក្សនយោបាយ ហើយក៏បញ្ជូនទៅឲ្យរដ្ឋសភា កាលពីថ្ងៃទី១០ កុម្ភៈ។ អគ្គលេខាធិការ និងជាអ្នកនាំពាក្យរបស់រដ្ឋសភា លោក ឡេង ប៉េងឡុង បានប្រាប់សារព័ត៌មានថ្មីៗថា សេចក្តីស្នើច្បាប់នេះ នឹងត្រូវដាក់ទៅកិច្ចប្រជុំគណៈកម្មាធិការអចិន្ត្រៃយ៍រដ្ឋសភា ក្នុងពេលឆាប់ៗនេះ ប៉ុន្តែលោកមិនអាចបញ្ជាក់ពីខ្លឹមសារនៃការកែប្រែច្បាប់នេះបានទេ។ ចំណែកអ្នកនាំពាក្យគណបក្សប្រជាជនកម្ពុជាលោក សួស យ៉ារ៉ា បានត្រឹមតែបញ្ជាក់ថា ខ្លឹមសារនៃច្បាប់ ដែលនឹងត្រូវកែប្រែ មិនមែនដើម្បីរំលាយ ឬដាក់សម្ពាធទៅលើគណបក្សសង្គ្រោះជាតិនោះទេ ប៉ុន្តែវាជាការកែប្រែ ដោយស្របតាមតម្រូវរបស់ប្រទេសជាតិ។
ការកែប្រែច្បាប់ស្តីពីគណបក្សនយោបាយនេះ ក្រោយពីសម្ដេចនាយករដ្ឋមន្ត្រី ហ៊ុន សែន ប្រកាសចង់ឲ្យប្រទេសកម្ពុជា អនុវត្តច្បាប់ដូចប្រទេសថៃ។ ចំពោះខ្លឹមសារនៃការកែប្រែច្បាប់ ត្រូវបានសម្ដេច ហ៊ុន សែន លើកឡើងត្រួសៗកន្លងមក ទាក់ទងនឹងការហាមជនណាដែលមានឈ្មោះថាជាទណ្ឌិត ធ្វើជាប្រធានគណបក្សនយោបាយ និងរំលាយគណបក្សនយោបាយចោលតែម្ដង ប្រសិនបើគណបក្សនោះធ្វើខុសច្បាប់ធ្ងន់ធ្ងរ។ ចំណែកសមាជិកក្នុងគណៈកម្មការនាយកគណបក្សដែលប្រព្រឹត្តខុសនោះ ក៏ត្រូវប្រឈមនឹងការហាមឃាត់មិនឲ្យធ្វើនយោបាយ៥ឆ្នាំដែរ។
គួរបញ្ជាក់ថា ឯកឧត្តម សម រង្ស៊ី កំពុងរងបណ្តឹងរហូតដល់ទៅចំនួន៨ ។ ក្នុងចំណោមបណ្ដឹងទាំងនោះឯកឧត្តម សម រង្ស៊ី ត្រូវបានតុលាការកាត់ទោសជាប់ឈ្មោះជាទណ្ឌិត ដែលផ្តន្ទាទោសមេបក្សប្រឆាំងរូបនេះ ជាប់ពន្ធនាគាររហូតដល់ទៅ៥ឆ្នាំទៀតផង។ ដូច្នេះប្រសិនជារដ្ឋសភា អនុម័តសំណើសុំឲ្យកែប្រែច្បាប់ស្តីពីគណបក្សនយោបាយ ដូចអ្វីដែលសម្តេច ហ៊ុន សែន ស្នើឡើងនោះ ឯកឧត្តម សម រង្ស៊ី នឹងមិនអាចធ្វើជាប្រធានគណបក្សសង្គ្រោះជាតិបានទៀតទេ៕
© រក្សាសិទ្ធិដោយ thmeythmey.com