ជាតិ
សង្គមជាតិ
សិល្បះ
អន្តរជាតិសរសើរទេពកោសល្យទម្រង់សិល្បៈខ្មែរកំពុងសម្តែងនៅសឹង្ហបុរី
× ភ្នំពេញ៖ ល្ខោនស្បែកធំ គុនល្បុក្កតោខ្មែរ របាំអប្សរា និងរបាំកញ្ឆែ បាននិងកំពុងសម្តែងនៅក្នុងព្រឹត្តិការណ៍ដង្ហែក្បួន ឈីងហ្គេ នៅក្នុងប្រទេសសឹង្ហបុរី។ សិល្បករមកពីប្រទេសកម្ពុជា ម៉ាឡេស៊ី ឥណ្ឌូនេស៊ី ចិន ជប៉ុន កូរ៉េ… បានចូលរួមសម្តែងក្នុងព្រឹត្តិការណ៍ដ៏អស្ចារ្យមួយនេះ។ សិល្បករសម្តែងមកពីគ្រប់ប្រទេសទាំងអស់មានចំនួនជិត១ម៉ឺននាក់ ក្នុងនោះ មកពីប្រទេសកម្ពុជា មានចំនួន៥៤នាក់។
លោក សោម រតនា សមាជិកម្នាក់នៃគណៈប្រតិភូកម្ពុជាដែលបានចូលរួមព្រឹត្តិការណ៍ដង្ហែក្បួន ឈីងហ្គេ សឹង្ហបុរី បានថ្លែងប្រាប់ជាសារសំឡេងតាមរយៈបណ្តាញសង្គមពីប្រទេសសឹង្ហបុរីនៅព្រឹកថ្ងៃសៅរ៍នេះថា ទេពកោសល្យសិល្បករ-សិល្បការិនីខ្មែរត្រូវបានសារព័ត៌មាននៃប្រទេសសឹង្ហបុរីចុះផ្សាយលើកសរសើរ និងត្រូវបានលើកសរសើរពីមហាជនអ្នកចូលរួមផងដែរ។
នៅក្នុងព្រឹត្តិការណ៍ដង្ហែក្បួន ឈីងហ្គេ នៅក្នុងប្រទេសសឹង្ហបុរីនៅពេលនេះ អ្នកចូលរួមត្រូវបានគេប៉ាន់ស្មានថា មានចំនួន៨ម៉ឺននាក់ និងសិល្បករពីប្រទេសផ្សេងៗចំនួនប្រមាណជា១ម៉ឺននាក់។ លោក សោម រតនា បានបញ្ជាក់ទៀតថា ការចូលរួមព្រឹត្តិការណ៍ដ៏អស្ចារ្យរបៀបនេះ នឹងអនុញ្ញាតឲ្យសិល្បករខ្មែរអាចសិក្សាដក ស្រង់បទពិសោធន៍ ឬផ្លាស់ប្តូរចំណេះដឹងជំនាញទម្រង់សិល្បៈពីប្រទេសដទៃទៀត។ មិនត្រឹមប៉ុណ្ណោះ, បើយោងតាមលោក រតនា ដដែល, វត្តមានសិល្បករខ្មែរនៅក្នុងប្រទេសសឹង្ហបុរីនៅពេលនេះ គឺបង្ហាញពីការរឹតចំណងមិត្តភាពរវាងសហភាពសហព័ន្ធយុវជនកម្ពុជា និងសមាគមប្រជាជនសឹង្ហបុរី។ «ម្យ៉ាងទៀត វាជាឱកាសដើម្បីបង្ហាញទម្រង់សិល្បៈខ្មែរ ប្រពៃណី វប្បធម៌ខ្មែរទៅកាន់ឆាកអន្តរជាតិ»។ នេះ គឺជាការបញ្ជាក់បន្ថែមរបស់លោក សោម រតនា សមាជិកម្នាក់នៃគណៈប្រតិភូកម្ពុជាក្នុងព្រឹត្តិការណ៍ដង្ហែក្បួន ឈីងហ្គេ សឹង្ហបុរី។
គណៈប្រតិភូខ្មែរសំខាន់ៗនៅក្នុងព្រឹត្តិការណ៍ខាងលើនេះ ជារួមមាន៖ លោក ហ៊ុន មានី ប្រធានសហភាពសហព័ន្ធយុវជនកម្ពុជា, លោក សាយ សំអាល់ អនុប្រធានសហភាពសហព័ន្ធយុវជនកម្ពុជា និងលោកស្រី ភឿង សកុណា រដ្ឋមន្ត្រីក្រសួងវប្បធម៌។
ពិធីនេះត្រូវបានប្រារព្ធធ្វើឡើងក្នុងចន្លោះថ្ងៃទី១០ និងទី១៣ខែកុម្ភៈ ឆ្នាំ២០១៧ ក្នុងគោលបំណងអបអរពិធីបុណ្យចូលឆ្នាំថ្មីនៃប្រទេសសឹង្ហបុរី៕
© រក្សាសិទ្ធិដោយ thmeythmey.com