នារី ជ្រើសរើសបុរសជាដៃគូ យកចំណេះដឹង និងឥរិយាបថល្អជាគោល

បទយកការណ៍ / បទសម្ភាសន៍

នារី ជ្រើសរើសបុរសជាដៃគូ យកចំណេះដឹង និងឥរិយាបថល្អជាគោល

11, Feb 2017 , 10:59 pm

រូបភាព

ដោយ: ញឹក ស្រីល័ក្ខ (Nhek Sreyleak)

ភ្នំពេញ៖ មនុស្សស្រីបច្ចុប្បន្ន មានសិទ្ធិច្រើនក្នុងការជ្រើសរើសគូស្រករដោយខ្លួនឯង។ ពួកគេ ក៏បានកំណត់លក្ខណៈសម្បត្តិរបស់បុរស ដែលគេត្រូវជ្រើសរើសទៀតផង។ នារីខ្លះកំណត់យកកត្តា ចំណេះដឹង និងឥរិយាបថ ជាលក្ខខណ្ឌដំបូងដែលអាចឲ្យពួកគេចាប់ផ្តើមស្វែងយល់ពីគ្នាទៅវិញទៅមក មុនឈានដល់ការរៀបការ និងនារីខ្លះគិតគូរលើមុខតំណែង ឬឋានៈ និងទ្រព្យសម្បត្តិគឺជាដើម។

និន្នាការក្នុងការរើសគូស្រករ នៅក្នុងសង្គមខ្មែរ បានផ្លាស់ប្តូរហើយ ក្នុងសម័យបច្ចេកវិទ្យានេះ។ បច្ចុប្បន្ន នារី មានសិទ្ធិរើសបុរសដែលខ្លួនត្រូវរៀបការជាមួយដោយខ្លួនឯង ជាងនេះទៅទៀតនោះ ពួកគេភាគច្រើន បានផ្តល់តម្លៃទៅលើចំណេះដឹង និងឥរិយាបថ អាកប្បកិរិយា។ ពួកគេយល់ថា សម័យបច្ចេកវិទ្យាទំនើបនេះ ការងារ ឬមុខរបរ ត្រូវការចំណេះដឹង និងអត្តចរិតជាគោល ខណៈ លុយកាក់ និងទ្រព្យសម្បត្តិ កើតឡើងតាមក្រោយ សំខាន់មានសមត្ថភាព។

នារីមួយចំនួនបានខ្វល់ខ្វាយនឹងការជ្រើសរើសគូស្រករ ដែលនឹងមករួមរស់បង្កើតជាគ្រួសារមួយដ៏មានសុភមង្គលសម្រាប់ពួកគេ។ កញ្ញា សឿង លក្ខិណា ដែលជិតចូលរោងការនៅចុងខែមីនានេះ បានសម្រេចជ្រើសរើសយកបុរសម្នាក់ ដែលនាងគិតថាមានលក្ខណៈសម្បត្តិគ្រប់គ្រាន់ ដើម្បីរស់នៅជាមួយគ្នាដល់ចាស់។ លក្ខិណា បានយល់យ៉ាងច្បាស់ថា បុរសមានចំណេះដឹង និងចរិតល្អ គឺស្រួលនិយាយគ្នា និងឲ្យតម្លៃគ្នាទៅវិញទៅមក។ ម្យ៉ាងទៀតក្រុមគ្រួសារ នាងពេញចិត្ត និងឲ្យតម្លៃលើ អ្នកមានចំណេះដឹងដែរ។ កញ្ញា សឿង លក្ខិណា លើកឡើងថា៖«តាំងពីដើមមកនាងចាប់អារម្មណ៍តែបុរសមានចំណេះដឹង និងអត្តចរិតល្អ ប៉ុន្តែតួនាទី និងទ្រព្យសម្បត្តិវិញ នាងមិនបានគិតពីរឿងនេះទេ»។

ជានិស្សិតឆ្នាំទី៣ នៃសាកលវិទ្យាល័យប៊ែលធីអន្តរជាតិ និងបានបញ្ចប់ការសិក្សានៅសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច លក្ខិណា ក៏បាននិយាយពីលក្ខណៈល្អរបស់បុរសម្នាក់នេះផងដែរ។ បុរសជាគូដណ្ដឹងរបស់នាង ជានិស្សិតផ្នែកវិស្វករអគ្គិសនី និងបានចុះកម្មសិក្សានៅប្រទេសជាដើម។ ក្រៅពីមានចំណេះដឹង ការងារត្រឹមត្រូវ បុរសនោះ មានចរិតរួសរាយរាក់ទាក់ ឲ្យតម្លៃលើមនុស្សជុំវិញខ្លួន និងគោរពឪពុកម្ដាយជាដើម។ យុវតីវ័យ២៥ឆ្នាំរូបនេះ បញ្ជាក់ថា៖ «គាត់បានតស៊ូ អត់ធ្មត់រាល់ឧបសគ្គនៃការស្រឡាញ់គ្នារយៈពេល៤ឆ្នាំ ហើយក្នុងរយៈពេលនេះ គាត់មិនធ្លាប់និយាយពាក្យបែកគ្នាដាក់ខ្ញុំនោះទេ»។

និយាយទាំងទឹកមុខញញឹម កញ្ញា លក្ខិណា បញ្ជាក់ថា ក្រុមគ្រួសារក៏គាំទ្រនៅអ្វីដែលយើងជ្រើសរើសដែរ បើមនុស្សនោះជាមនុស្សត្រឹមត្រូវ មានគោលដៅច្បាស់លាស់។ ដោយសារតែចំណេះដឹង និងឥរិយាបថល្អ ជាអ្វីដែលនាងចង់បាន ហើយនៅពេលនេះនាងទទួលបានបុរសម្នាក់នោះ។ កញ្ញា លក្ខិណា សង្ឃឹមថាក្រោយពីរៀបការរួចរូបគេទាំងពីរ នឹងមានគ្រួសារមួយដ៏រីករាយ និងមានសុភមង្គល។

ការជ្រើសរើសបុរសសម្រាប់ជីវិត ក៏មិនមែនជារឿងងាយស្រួលដែរ សម្រាប់ កញ្ញា មុំ សេងគា ដែលជាគ្រូបង្រៀនម្នាក់ នៅវិទ្យាល័យមួយនៅរាជធានីភ្នំពេញ។ កញ្ញា មុំ សេងគា និយាយថា ការជ្រើសរើសបុរសសម្រាប់ជីវិតរបស់ខ្លួនជារឿងសំខាន់ មិនមែនចេះតែជ្រើសរើសផ្ដេសផ្ដាសនោះទេ។

សម្រាប់កញ្ញា សេងគា នាងបានផ្តល់តម្លៃឲ្យបុរសដែលមានចំណេះដឹង រួមផ្សំនឹងអត្តចរិត នាងពន្យល់ថា បុរសមានចំណេះដឹង និងឥរិយាបថល្អ អាចស្រួលនិយាយគ្នា និងស្ដាប់ហេតុផលគ្នាទៅវិញទៅមក ហើយទ្រព្យសម្បត្តិ ជាអ្វីដែលអាចរកបានតាមក្រោយ។ ហេតុផលដែល សេងគា មិនរើសយកបុរសដែលមានចំណេះទាប ព្រោះនាងបារម្ភ ខ្លាចមិនចុះសម្រុងគ្នា ឬអាចឈានដល់ការប្រើអំពើហិង្សា ក្រោយចំណងអាពាហ៌ពិពាហ៌។

ប៉ុន្តែបើមានតែចំណេះដឹង គ្មានសុជីវធម៌វិញនោះ ក៏នារីសម្បុរស្រអែមរូបនេះ មិនទទួលយកជាគូអនាគតដែរ។ កញ្ញា សេងគា បញ្ជាក់ដូច្នេះ៖«មានចំណេះដឹងខ្ពង់ខ្ពស់ តែគ្មានសីលធម៌ ក៏ជាបញ្ហាលំបាកដែរ»។ សីលធម៌ ឥរិយាបថ អត្តចរិត គឺជាផ្នែកសំខាន់សម្រាប់មនុស្សម្នាក់ៗ ការគោរពផ្ដល់តម្លៃដល់គ្នាទៅវិញទៅមក»។

ហាក់យល់ប្លែកពីនារីទាំង២ ខាងលើបន្តិច កញ្ញា ច្រាយ ផារី និស្សិតឆ្នាំទី៤ នៃវិទ្យាស្ថានហិរញ្ញវត្ថុ និងគណនេយ្យ ក៏ចង់បានបុរសដែលមានលើចំណេះដឹងយកមកធ្វើជាគូដែរ ប៉ុន្តែមិនអាចចេះដឹងច្រើនខ្ពស់ជាងខ្លួនពេកទេ។ មិនចង់បាន ព្រោះផារី ខ្លាចបុរសនោះយកចំណេះ និងឋានៈជាប្តី ជាលេសមកត្រួតត្រាលើការសម្រេចចិត្តរបស់នាង។ និស្សិតដែលមានដើមកំណើតនៅខេត្តកំពង់ចាមរូបនេះ បន្ថែមដូច្នេះថា៖«បុរសមួយចំនួននៅពេលមានចំណេះដឹងខ្ពង់ខ្ពស់ ជាងមនុស្សស្រី ហាក់មានអំនួត និងមានភាពត្រួតត្រាលើមនុស្សស្រី»។

ក្រៅពីនេះ កញ្ញា ច្រាយ ផារី បានកំណត់ថា បុរសដែលនាងជ្រើសរើសអន់បំផុត ក៏ត្រូវមានទ្រព្យសម្បត្តិប្រហាក់ប្រហែលគ្នាដែរ។ នាងពន្យល់ដូច្នេះថា៖«យ៉ាងហោចណាស់ ក៏ត្រូវមានធនធានប្រហាក់ប្រហែលគ្នាដែរ។ ធម្មតាមនុស្សស្រីណាក៏ចង់បានបុរសដែលខ្លួនស្រឡាញ់មានឋានៈ ឬមុខតំណែង ក្នុងសង្គម ឬស្ថាប័នណាមួយសមរម្យ និងមានទ្រព្យសម្បត្តិដែរ ប៉ុន្តែបើឋានៈ យើងមិនដល់គេ ក៏គេមិនចាប់អារម្មណ៍យើងដែរ»។

សម្រាប់អ្នកស្រី រស់ សុភាព ប្រធានអង្គការយេនឌ័រ និងអភិវឌ្ឍដើម្បីកម្ពុជា បានយល់ឃើញថាការគិត និងការជ្រើសរើសរបស់នារី គឺជារឿងត្រឹមត្រូវ ដែលនារីបច្ចុប្បន្នមួយចំនួនជ្រើសរើសបុរសខ្លួនស្រឡាញ់ផ្ដោតលើចំណេះដឹង និងអាកប្បកិរិយា។ ប្រធានអង្គការ យេនឌ័រ និងអភិវឌ្ឍ ដើម្បីកម្ពុជា លើកឡើងបន្តថា បើនារីជ្រើសរើសបុរសផ្ដោតតែចំណេះដឹងតែមួយមុខ វាមិនទាន់គ្រប់គ្រាន់នោះទេ ត្រូវមានចំណេះដឹង រួមទាំងឥរិយាបថ និងសីលធម៌ល្អផងដែរ។

អ្នកស្រី រស់ សុភាព អះអាងថា បុរសមានចំណេះដឹងខ្ពង់ខ្ពស់មួយចំនួន មានតែចំណេះដឹង តែមិនមានសីលធម៌ អាកប្បកិរិយាថ្លៃថ្នូរ ក៏អាចឈានដល់ការប្រើប្រាស់អំពើហិង្សាក្នុងគ្រួសារ និងធ្វើឲ្យគ្រួសារគ្មានសុភមង្គលផងដែរ។ អ្នកស្រី រស់ សុភាព និយាយថា៖ «មិនខ្វះទេ អ្នកមានចំណេះដឹង ឬមានទ្រព្យសម្បត្តិ ប្រើប្រាស់អំពើហិង្សានោះ។ ព្រោះមានតែចំណេះដឹង និងទ្រព្យសម្បត្តិ តែគ្មានសីលធម៌»។ អ្នកស្រី រស់ សុភាព បញ្ជាក់ថា សំខាន់ដៃគូទាំងពីរត្រូវឲ្យតម្លៃ និងគោរពគ្នាទៅវិញទៅមក នោះនឹងគ្មានការប្រើប្រាស់អំពើហិង្សា និងការឈ្លោះប្រកែកគ្នាឡើយ។

អ្នកស្រី រស់ សុភាព ក៏បានលើកទឹកចិត្តដល់នារីៗ ជ្រើសរើសគូស្រករដោយខ្លួនឯង ហ៊ានសម្រេចចិត្ត និងទទួលខុសត្រូវចំពោះអ្វីដែលពួកគេបានជ្រើសរើស៕