ថ្លៃសង់ជញ្ជាំងព្រំដែនខ្ពស់ជាងការរំពឹងទុក តែលោក ត្រាំ នឹងបញ្ចុះតម្លៃឲ្យកាន់តែទាប

អន្តរជាតិ

នយោបាយអន្តរជាតិ

ថ្លៃសង់ជញ្ជាំងព្រំដែនខ្ពស់ជាងការរំពឹងទុក តែលោក ត្រាំ នឹងបញ្ចុះតម្លៃឲ្យកាន់តែទាប

12, Feb 2017 , 1:39 pm

រូបភាព

ដោយ: តន ចាន់រិទ្ធារ៉ា

ប្រធានាធិបតី ដូណាល់ ត្រាំ បានប្រតិកម្មនឹងតម្លៃដ៏ខ្ពស់នៃគម្រោងសាងសង់ជញ្ជាំងព្រំដែនរវាងអាមេរិក និងម៉ិកស៊ិក ក្នុងរបាយការណ៍របស់ក្រសួងសន្តិសុខផ្ទៃក្នុង។ របាយការណ៍នោះបង្ហាញថា ការសាងសង់ជញ្ជាំងតាមព្រំដែន នឹងតម្លៃមានដល់ទៅជាង២១ពាន់លានដុល្លារ គឺខ្ពស់ជាងការរំពឹងទុករបស់លោក កាលពីអំឡុងយុទ្ធនាការស្វែងរកសំឡេងឆ្នោត។ លោក ត្រាំ សន្យាថា លោកនឹងបញ្ចុះតម្លៃចំណាយដ៏ខ្ពស់នេះ ដូចដែលធ្លាប់ធ្វើលើគម្រោងយន្តហោះ Air Force One ដែរ។

ក្រសួងសន្តិសុខផ្ទៃក្នុងអាមេរិក កាលពីថ្ងៃទី៩ ខែកុម្ភៈ បានបញ្ចេញរបាយការណ៍ស្ដីពីតម្លៃនៃការចំណាយលើការសាងសង់ជញ្ជាំងព្រំដែនរវាងអាមេរិក និងម៉ិកស៊ិក ដែលមានតម្លៃលើសការប៉ាន់ស្មានយ៉ាងច្រើន គឺ២១.៦ពាន់លានដុល្លារ។ ប្រធានាធិបតី ដូណាល់ ត្រាំ ដែលជាអ្នកផ្ដើមគំនិតសាងសង់ជញ្ជាំងនេះដើម្បីទប់ស្កាត់ ហាក់មិនសប្បាយចិត្តឡើយចំពោះតម្លៃខ្ពស់ ព្រោះលោកលើកឡើងថា ការសង់ជញ្ជាំងនឹងចំណាយ១២ពាន់លានដុល្លារ ប៉ុន្តែលោកនឹងបញ្ចុះតម្លៃដ៏ខ្ពស់នេះ។

...design or negotiations yet. When I do, just like with the F-35 FighterJet or the Air Force One Program, price will come WAY DOWN! — Donald J. Trump (@realDonaldTrump) February 11, 2017

I am reading that the great border WALL will cost more than the government originally thought, but I have not gotten involved in the..... — Donald J. Trump (@realDonaldTrump) February 11, 2017

«ខ្ញុំដឹងថា តម្លៃនៃជញ្ជាំងព្រំដែនដ៏មហិមា មានតម្លៃថ្លៃជាងអ្វីដែលរដ្ឋាភិបាលរំពឹងទុក ហើយខ្ញុំមិនទាន់បានចរចា ឬក៏ធ្វើអ្វីផ្សេងនៅឡើយទេ។ ប៉ុន្តែខ្ញុំនឹងមានវិធានការដូចករណីតម្លៃផលិតយន្តហោះចម្បាំង F-35 ឬក៏គម្រោងការផលិតយន្តហោះ Air Force One អ៊ីចឹង គឺតម្លៃសាងសង់ជញ្ជាំង នឹងត្រូវកាត់បន្ថយ»។ នេះជាសាររបស់ប្រធានាធិបតីអាមេរិក ដែលបង្ហោះតាមគណនី Twitter ពីរដ្ឋ Florida នៅថ្ងៃទី១២ ខែកុម្ភៈ ជាទីលោកកំពុងជួបនាយករដ្ឋមន្ត្រីជប៉ុន ស៊ីនហ្សូ អាបេ ។

ទាក់ទិននឹងតម្លៃយន្តហោះចម្បាំង F-35 លោកប្រធានាធិបតី ត្រាំ ធ្លាប់រិះគន់តម្លៃខ្ពស់កប់ពពកនៃការផលិតយន្តហោះចម្បាំងស៊េរីមួយនេះ។ កាលពីចុងឆ្នាំមុនលោក បានអះអាងថា តម្លៃយន្តហោះ F-35 ដែលផលិតដោយក្រុមហ៊ុន Lockheed Martin គឺថ្លៃហួសហេតុ។ យ៉ាងណាមិញ លោក ត្រាំ ក៏បានទទួលជោគជ័យក្នុងការកាត់បន្ថយថ្លៃចំណាយលើការផលិតយន្តហោះប្រភេទនេះចំនួន៦០០លានដុល្លារផង។

គម្រោងសាងសង់ជញ្ជាំងតាមព្រំដែនជាមួយម៉ិកស៊ិក គឺជាការសន្យារបស់លោក ត្រាំ តាំងពីយុទ្ធនាការស្វែងរកសំឡេងឆ្នោតមកម្ល៉េះ។ លោកធ្លាប់ប្រកាសដែរថា ម៉ិកស៊ិក នឹងជាអ្នកទទួលបន្ទុកថ្លៃចំណាយទាំងស្រុង ប៉ុន្តែរដ្ឋាភិបាលម៉ិកស៊ិក ក៏ប្រកាសសដាច់អហង្ការដែរថា ខ្លួនមិនចេញលុយសូម្បីមួយដុល្លារលើជញ្ជាំងរបស់លោក ត្រាំ ឡើយ។ ក្រោយមក លោក ត្រាំ ក៏លើកឡើងថា អាមេរិក នឹងចេញលុយធ្វើជញ្ជាំងនេះ ហើយដាក់ពន្ធខ្ពស់លើទំនិញម៉ិកស៊ិកដើម្បីស៊ីសងថ្លៃជញ្ជាំងវិញ។

គោលដៅនៃការសាងសង់ជញ្ជាំងនេះ គឺសំដៅទប់ស្កាត់លំហូរជនអន្តោប្រវេសន៍មកពីម៉ិកស៊ិក និងបណ្ដាប្រទេសអាមេរិកខាងត្បូង ដែលជ្រៀតចូលទឹកដីអាមេរិក ដោយមិនចាំបាច់ប្រើទិដ្ឋាការ។ លោក ត្រាំ ចាត់ទុកជនអន្តោប្រវេសន៍ទាំងនោះ ជាអ្នកបង្កបញ្ហានៅអាមេរិក និងត្រូវបញ្ជូនចេញពីទឹកដីអាមេរិក។ លើសពីនេះ ប្រធានាធិបតីអាមេរិក ក៏បានចេញក្រិត្យហាមឃាត់ប្រជាជនមកពីប្រទេស៧ មិនឲ្យជាន់ទឹកដីអាមេរិកទៀតផង តែក្រិត្យនេះត្រូវបានតុលាការព្យួរទៅវិញ៕