ភ្នំពេញ៖ នៅពេលនេះ លោក ហ៊ុយ សម្បត្តិ កំពុងធ្វើការជាអ្នកគ្រប់គ្រងទីផ្សារសាលាអន្តរជាតិអាមេរិកាំងមួយ ក្នុងខណ្ឌទួលគោក រាជធានីភ្នំពេញ។ មុនពេលឈានជើងចូលអង្គុយក្នុងការិយាល័យបំពាក់ដោយម៉ាស៊ីនត្រជាក់ សម្បត្តិ បានឆ្លងកាត់ធ្វើការងារស្ម័គ្រចិត្តហាលថ្ងៃក្តៅទាំងក្នុង និងក្រៅប្រទេសហើយ ត្រូវសិក្សាបរិញ្ញាត្រដំណាលគ្នាដល់ទៅ ២សាកលវិទ្យាល័យទៀត។
«យើងមិនត្រឹមតែចេះ Work hard (ប្រើកម្លាំងបាយធ្វើការ)នោះទេ យើងថែមទាំងត្រូវចេះ Work smart (កម្លាំងប្រាជ្ញាធ្វើការ) ផង។ យើងត្រូវចេះលៃលកការងារដែលយើងអាចធ្វើតាមផ្លូវដូចគេដែរ ប៉ុន្តែវារហ័សជាង មានប្រយោជន៍ជាង និងចំណេញពេលវេលា»។ យុវជនវ័យ ២៣ឆ្នាំ កំពុងអង្គុយរម្លឹកពីជីវិតការងារស្ម័គ្រចិត្ត និងការសិក្សារបស់ខ្លួន មុនពេលបញ្ចប់សិក្សានៅសាកលវិទ្យាល័យ២ឆ្នាំមុន។
សម្បត្តិ មិនត្រឹមតែបានសិក្សាថ្នាក់បរិញ្ញាបត្រផ្នែកអក្សរសាស្ត្រអង់គ្លេសនៅវិទ្យាស្ថានភាសាបរទេស (IFL) ដោយទទួលអាហារូបករណ៍ប៉ុណ្ណោះទេ លោកថែមទាំងទទួលបានអាហារូបករណ៍ផ្នែកពាណិជ្ជកម្មអន្តរជាតិ សាកលវិទ្យាល័យកម្ពុជា (UC)ទៀតផង។
ក្រៅពីចំណាយពេលសិក្សាពេលព្រឹក និងរសៀលចាប់តាំងពីឆ្នាំដំបូងនៅថ្នាក់ឧត្តមសិក្សា យុវជនសម្បុរសណ្តែកបាយមាឌមាំរូបនេះ បានឆ្លៀតបង្រៀនភាសាអង់គ្លេសកម្រិតខ្ពស់ពី Upper ដល់ Advance រយៈពេល១ម៉ោងកន្លះ ក្នុងសាលាបង្រៀនភាសាអង់គ្លេសឯកជនមួយ នៅរាជធានីភ្នំពេញ ជារៀងរាល់ល្ងាចទៀត ដើម្បីរកកម្រៃថវិកាសម្រាប់ចំណាយលើសម្ភារសិក្សាផ្ទាល់ខ្លួន។
បន្ថែមលើសពីនេះ លោកបានឆ្លៀតធ្វើការងារស្ម័គ្រចិត្តជាសមាជិកពិធីការក្នុងកម្មវិធីសប្បុរសធម៌ ការតស៊ូមិតក្នុងសាលា និងតាមអង្គការមិនមែនរដ្ឋាភិបាលដែលផ្តោតលើការអប់រំ យុវជនប្រមាណ ៨ស្ថាប័ន ក្នុងនោះមាន សមាគមអតីត និស្សិតអាមេរិក FUSAAC, AIESEC, SEANet, UC និងIFL ជាដើម នៅរៀងរាល់ចុងសប្តាហ៍ទៀត តាំងពីពេលសិក្សានៅសាកលវិទ្យាល័យ រហូតដល់មានអាជីពការងារមួយ នាពេលបច្ចុប្បន្ននេះ។
ដោយបានបែងចែកពេលវេលាធ្វើការងារដែលប្រើកម្លាំងកាយផង និងកម្លាំងប្រាជ្ញាផងត្រឹមត្រូវ កូនប្រុសទីបី ចំណោមបងប្អួនប្រុសស្រីបង្កើត ៤នាក់ ក្នុងគ្រួសារជីវភាពមធ្យម នៅរាជធានីភ្នំពេញរូបនេះ បាននិយាយថា លោកបានទទួលពិសោធន៍ការងារទំនាក់ទំនងក្នុងសង្គម និងការសិក្សាទាំងក្នុង និងក្រៅប្រទេសច្រើន ដ្បិតលោកត្រូវនឿយកម្លាំងកាយបន្តិចក្តី។
«យើងនៅក្មេង យើងមានកម្លាំងកាយ កម្លាំងចិត្ត កម្លាំងប្រាជ្ញា យើងធ្វើអ្វីក៏ជោគជ័យដែរ ឲ្យតែយើងដាក់ចិត្តធ្វើ»។ សម្បត្តិ នៅតែនឹកឃើញសម្តីរាមច្បងម្នាក់ដែលបានជំរុញជីវិតលោកឲ្យព្យាយាម ក្រោយពីប្រឡងជាប់បាក់ឌុបនៅវិទ្យាល័យបឹងត្របែក តាំងពីឆ្នាំ២០១១មក។
តាមរយៈការទំនាក់ទំនង និងការងារស្ម័គ្រចិត្តដែលជួយបង្កើនសមត្ថភាពរស់នៅក្នុងសង្គម លោក ហ៊ុយ សម្បតិ្ត បានចូលរួមក្នុងកិច្ចប្រជុំយុវជនអាស៊ាន ក្រោមប្រធានបទ ការថែទាំសម្បត្តិបេតិកភណ្ឌពិភពលោកក្នុងតំបន់អាស៊ាន ក្នុងឆ្នាំ២០១៥ នៅម៉ាឡេស៊ី, គម្រោងការលុបបំបាត់ការរើសអ្នកស្រលាញ់ភេទដូចគ្នា SEANet ដែលគាំទ្រដោយសាលា Stanford អាមេរិក នៅប្រទេសវៀតណាម, ចូលរួមកម្មវិធីផ្លាស់ប្តូរការសិក្សាផ្នែកអប់រំ រយៈពេល ៦ ខែនៅប្រទេស ព័រទុយហ្កាល់ ក្នុងតំបន់អឺរ៉ុប និងកម្មវិធីផ្លាស់ប្តូរសិក្សាផ្នែកពាណិជ្ជកម្មអន្តរជាតិ តាមរយៈកម្មវិធី The Global Undergraduate Exchange Program រយៈពេល ៤ខែនៅអាមេរិក។
យុវជនវ័យ ២៣ឆ្នាំរូបនេះ ទទួលស្គាល់ថា មនុស្ស និងបរិស្ថានដែលរស់នៅជុំវិញខ្លួននាំឲ្យលោកស្រលាញ់ការងារ និងការសិក្សារហូតជោគជ័យ ដ្បិតលោកត្រូវធ្វើការទាំង Hard (ប្រើកម្លាំងបាយ) និង Smart (កម្លាំងប្រាជ្ញា)ច្រើនដំណាលគ្នា។
យុវជនដែលជាមនុស្សចូលចិត្តបង្កើតទំនាក់ទំនងជាមួយគ្រួសារ លោកគ្រូ អ្នកគ្រូ សិស្សច្បង និងមិត្តភក្តិ រូបនេះ និយាយបញ្ជាក់យ៉ាងមាំដូច្នេះ៖«មនុស្សយើងមិនឥតខ្ចោះទេ យើងត្រូវតែចេះស្តាប់ និងទទួលយក បទពិសោធន៍ល្អៗរបស់អ្នកដទៃ។ យុវជនគួរតែត្រៀមខ្លួនឲ្យបានច្រើន ធ្វើខ្លួនឲ្យមានប្រយោជន៍ ខំរៀនឲ្យបានច្រើន ផ្តោតលើអ្វីដែលយើងចាប់អារម្មណ៍។ ហើយ យើងត្រូវព្យាយាមធ្វើវាយូរៗទៅក្លាយទៅជាទម្លាប់ខ្លួន»។
ក្រៅពីចូលចិត្តទទួលយកគំនិតចែករំលែក និងបទពិសោធន៍ជីវិតល្អរបស់អ្នកដទៃធ្វើជាគំរូតាម សម្បត្តិ បានកំណត់ខ្លួនឯង ត្រូវចេះស្គាល់ និងធ្វើការងារណាមួយអាទិភាពមុនគេត្រឹមត្រូវ។ «យើងត្រូវធ្វើអ្វីមុន? យើងត្រូវសម្រេចអ្វីមួយដែលមានប្រយោជន៍មុន ហើយប៉ះពាល់ការសិក្សាតិចតួចបំផុត និងចំណេញពេលវេលា»។ សម្បត្តិ បញ្ជាក់បន្ថែមពីបំណងចង់ឲ្យសិស្សនិស្សិតរៀនពីសង្គមឲ្យច្រើនជាងនៅក្នុងសាលា។
«បើរៀនក្នុងថ្នាក់ ខ្ញុំបានរៀនតែមុខវិជ្ជាធម្មតា ប៉ុន្តែបើខ្ញុំធ្វើការងារស្ម័គ្រចិត្ត ខ្ញុំអាចអភិវឌ្ឍជំនាញទំនាក់ទំនងទូទៅ នាំឲ្យខ្ញុំមានជំនឿចិត្តជាងមុន ខ្ញុំធ្វើការក្នុងក្រុមប្រសើរជាងមុន។ ខ្ញុំអាចស្គាល់សិស្សពូកែដែលជារៀមច្បងច្រើនណាស់ ហើយខ្ញុំអាចសុំយោបល់ពីពួកគាត់ សម្រាប់ដើរទៅ មុខទៀត»។ សម្បត្តិ ដែលជា យុវជនឆ្នើមកាលពីសិក្សានៅសាលាផងនោះ រៀបរាប់ពីរបៀបធ្វើការ Smart (ឆ្លាត)។
អ្នកគ្រប់គ្រងទីផ្សារសាលាអន្តរជាតិអាមេរិកាំងមួយរូបនេះ មិនបញ្ឈប់ដំណើរការងារ និងការសិក្សាត្រឹមទីនេះទេ ដោយលោកប្រាប់ថា លោកកំពុងសម្លឹងរកអាហារូបករណ៍បន្តថ្នាក់អនុបណ្ឌិត ផ្នែកពាណិជ្ជកម្មអន្តរជាតិ នៅអាមេរិកទៀតផង។ លោក ហ៊ុយ សម្បត្តិ ចង់បើកក្រុមហ៊ុនគ្រឹះស្ថានអប់រំ បង្កើតការងារឲ្យយុវជនខ្មែរជំនាន់ក្រោយថែមទៀត នាពេលអនាគត៕