សេចក្តីស្នើច្បាប់ មិនឲ្យទណ្ឌិតធ្វើមេបក្ស នៅតែបន្តទៅមុខ ទោះបក្សប្រឆាំងសុំពន្យារពេល

ជាតិ

នយោបាយជាតិ

សេចក្តីស្នើច្បាប់ មិនឲ្យទណ្ឌិតធ្វើមេបក្ស នៅតែបន្តទៅមុខ ទោះបក្សប្រឆាំងសុំពន្យារពេល

13, Feb 2017 , 1:04 pm

រូបភាព

ដោយ: ម៉ៅ សុផា

ភ្នំពេញ៖ តំណាងរាស្ត្រគណបក្សសង្គ្រោះជាតិ ស្នើឲ្យគណៈកម្មាធិការអចិន្ត្រៃយ៍រដ្ឋសភា បង្អង់ការកែប្រែច្បាប់ស្តីពីគណបក្សនយោបាយ ដែលកំណត់ថា ទណ្ឌិត មិនអាចធ្វើជាប្រធានគណបក្ស។ ប៉ុន្តែ តំណាងរាស្ត្រគណបក្សប្រជាជនកម្ពុជា មិនយល់ស្រប នោះទេ។

សេចក្តីស្នើច្បាប់ ដែលមិនអនុញ្ញាតឲ្យទណ្ឌិត ធ្វើជាប្រធានគណបក្សនយោបាយ បានឆ្លងកាត់កិច្ចប្រជុំនៃគណៈកម្មាធិការអចិន្ត្រៃយ៍រដ្ឋសភាជាលើកទីមួយ រួចហើយ នៅព្រឹកថ្ងៃទី១៣ ខែកុម្ភៈ ឆ្នាំ២០១៧នេះ។ គណៈកម្មាធិការអចិន្ត្រៃយ៍ បានប្រគល់ខ្លឹមសារនៃច្បាប់នេះ ទៅឲ្យគណៈកម្មការជំនាញទី៦ ដែលទទួលបន្ទុកផ្នែកនីតិកម្ម និងយុត្តិធម៌ ដើម្បីសិក្សាលម្អិត។ក្រោយសិក្សារួច គណៈកម្មការជំនាញទី៦ ត្រូវបញ្ជូនខ្លឹមសារនៃច្បាប់ទៅឲ្យគណៈកម្មាធិការអចិន្ត្រៃយ៍ វិញ។ ហើយគណៈកម្មាធិការអចិន្ត្រៃយ៍ នឹងបើកកិច្ចប្រជុំជាលើកទីពីរ ដើម្បីពិភាក្សាលើខ្លឹមសារនៃច្បាប់នេះ មុនបញ្ជូនទៅកាន់កិច្ចប្រជុំពេញអង្គនៃរដ្ឋសភា ដើម្បីពិនិត្យ និងអនុម័ត ជាផ្លូវការ។

ក្រោយកិច្ចប្រជុំគណៈកម្មាធិអចិន្ត្រៃយ៍លោក ឈាង វុន អ្នកនាំពាក្យរដ្ឋសភា ពីគណបក្សប្រជាជនកម្ពុជា បាននិយាយថា សំណើសុំធ្វើវិសោធកម្មលើច្បាប់ស្តីពីគណបក្សនយោបាយ មិនអាចត្រូវបានពន្យារពេលនោះទេ ព្រោះសភាពការណ៍ប្រទេសជាតិនាពេលបច្ចុប្បន្ន ត្រូវការច្បាប់នេះ យកមកអនុវត្តជាប្រញាប់។ លោក បន្ថែមថា ខ្លឹមសារនៃច្បាប់នេះ បានឆ្លងកាត់ការសិក្សាយ៉ាងស៊ីជម្រៅពីតំណាងរាស្ត្រគណបក្សប្រជាកម្ពុជារួចហើយ ដូច្នេះ មិនត្រូវការពន្យារពេលអ្វីឲ្យវែងឆ្ងាយទៀតឡើយ។

លោក ឈាង វុន បន្តទៀតថា ការធ្វើវិសោធកម្មនេះ គឺដើម្បីអនុវត្តទៅលើគ្រប់គណបក្ស។ ហើយការកែច្បាប់ស្តីពីគណបក្សនយោបាយ មិនមែនដើម្បីដាក់សម្ពាធទៅលើគណបក្សសង្គ្រោះជាតិ ឬគណបក្សណាមួយឡើយ។

ការលើកឡើងរបស់លោក ឈាង វុន បែបនេះ គឺដើម្បីឆ្លើយតបនឹងសំណើរបស់លោក យ៉ែម បុញ្ញឫទិ្ធ ដែលចង់ឲ្យគណៈកម្មាធិការអចិន្ត្រៃយ៍រដ្ឋសភា បង្អង់ការធ្វើច្បាប់ខាងលើ។ លោក យ៉ែម បុញ្ញឫិទ្ធិ ដែលឈរទន្ទឹមនឹងលោក ឈាង វុន ដើម្បីផ្តល់បទសម្ភាសដល់ក្រុមអ្នកសារព័ត៌មាន បាននិយាយថា ការបោះឆ្នោត កាត់តែខិតជិតមកដល់ ដូច្នេះគ្រប់គណបក្សនយោបាយ ត្រូវការពេលវេលា ដើម្បីគិតគូពីបញ្ហាបោះឆ្នោត។

អ្នកនាំពាក្យរដ្ឋសភា ពីខាងគណបក្សសង្គ្រោះជាតិរូបនេះ បានបន្ថែមទៀតថា ការធ្វើវិសោធកម្មច្បាប់ខាងលើ គឺជាប់ពាក់ព័ន្ធ នឹងគណបក្សនយោបាយ ដូច្នេះប្រសិនបើប្រញាប់ប្រញាល់នោះ នឹងប៉ះពាល់ដល់ពេលវេលារបស់គណបក្សនីមួយៗ ដែលត្រូវត្រៀមខ្លួន ចូលរួមប្រកួតប្រជែងការបោះឆ្នោត នាពេលខាងមុខ។

គួរម្លឹកថា តំណាងរាស្ត្រគណបក្សប្រជាជនកម្ពុជាចំនួន៦០រូប ក្នុងចំណោម៦៨រូប បានស្នើឲ្យរដ្ឋសភាធ្វើវិសោធកម្មច្បាប់ស្តីពីគណបក្សនយោបាយ ដោយកំណត់ថា ជនណា ដែលជាប់ទោសទណ្ឌ ហើយក្លាយជាទណ្ឌិត នឹងមិនអនុញ្ញាត ឲ្យធ្វើជាប្រធានគណបក្សនយោបាយនោះទេ។ ការដាក់សំណើសុំឲ្យធ្វើវិសោធកម្មច្បាប់ ពីសំណាក់តំណាងរាស្ត្រគណបក្សប្រជាជនកម្ពុជា គឺធ្វើឡើងតាមការចង់បានរបស់សម្តេច ហ៊ុន សែន។

កាលពីថ្ងៃទី៣១ ខែមករា ឆ្នាំ២០១៧ សម្តេច ហ៊ុន សែន បានស្នើឡើងនៅក្នុងកិច្ចប្រជុំពេញអង្គនៃរដ្ឋសភា ទាក់ទងនឹងការកែប្រែច្បាប់ស្តីពីគណបក្សនយោបាយថា ទណ្ឌិត មិនគួរមានសិទ្ធិក្លាយជាប្រធានគណបក្សនោះទេ។ ក្រៅពីនេះសម្តេច ហ៊ុន សែន ក៏ចង់ឲ្យប្រទេសកម្ពុជា អនុវត្តច្បាប់ដូចប្រទេសថៃ ដែលកំណត់ថា គណបក្សណាមួយដែលធ្វើខុសច្បាប់ធ្ងន់ធ្ងរ គណបក្សនោះ ត្រូវរំលាយចោលតែម្តង៕