រដ្ឋាភិបាល ដាក់ផែនការ៤ចំណុច ដើម្បីទាក់ទាញអ្នកវិនិយោគិនចូលមកកម្ពុជា

ជាតិ

សេដ្ឋកិច្ច

រដ្ឋាភិបាល ដាក់ផែនការ៤ចំណុច ដើម្បីទាក់ទាញអ្នកវិនិយោគិនចូលមកកម្ពុជា

15, Feb 2017 , 8:19 pm

រូបភាព

ដោយ: ធឿន បញ្ញាឬទិ្ធ

ភ្នំពេញ៖ រដ្ឋាភិបាលដាក់ចេញផែនការចំនួន៤ចំណុច ដើម្បីទាក់ទាញអ្នកវិនិយោគិនចូលមកកម្ពុជាបន្ថែមទៀត ស្របពេលដែលកម្ពុជា កំពុងរក្សាកំណើនសេដ្ឋកិច្ច ៧ភាគរយ។

ខណៈដែលកំណើនសេដ្ឋកិច្ចកម្ពុជាស្ថិតនៅក្នុងរង្វង់៧ភាគរយជាងពីរទស្សវត្សមកនេះ សម្ដេចនាយករដ្ឋមន្ត្រី ហ៊ុន សែន បានដាក់ចេញផែនការចំនួន៤ចំណុច ដើម្បីទាក់ទាញអ្នកវិនិយោគិនចូលមកកម្ពុជា។ ផែនការ៤ចំណុចនោះរួមមាន៖ ការបញ្ចុះថ្លៃអគ្គិសនីសម្រាប់តំបន់ឧស្សាហកម្ម និងភាពជឿទុកចិត្តលើវិសាលភាពគ្របដណ្ដប់នៃការផ្គត់ផ្គង់ចរន្តអគ្គិសនី។ ការរៀបចំផែនការអនុវត្តមេ សម្រាប់ការអភិវឌ្ឍប្រព័ន្ធដឹកជញ្ជូន និងពហុមធ្យោបាយ។ ពង្រឹងការនិងអភិវឌ្ឍយន្តការគ្រប់គ្រងទីផ្សាពលកម្មនិងការបណ្ដុះបណ្ដាលជំនាញ។ ការអភិវឌ្ឍនិងប្រែក្លាយខេត្តព្រះសីហនុទៅជាតំបន់សេដ្ឋកិច្ចពិសេសគំរូពហុបំណង ដើម្បីទាក់ទាញ និងសម្រួលដល់ការវិនិយោគគ្រប់កម្រិត។

ថ្លែងក្នុងពិធីបើកកិច្ចប្រជុំកំពូលពាណិជ្ជកម្មអន្តរជាតិកម្ពុជានៅព្រឹកនេះ សម្ដេច ហ៊ុន សែន បានបញ្ជាក់ថា ៖«ក្នុងនាមរាជរដ្ឋាភិបាលខ្ញុំសូមធានាជូនវិនិយោគិន ធុរៈជនគ្រប់រូប នូវបរិស្ថានគ្រប់យ៉ាងដែលអនុគ្រោះអំណោយផល និងជួយជំរុញដល់ការវិនិយោគ ជាពិសេសការរក្សានូវស្ថេរភាពម៉ាក្រូសេដ្ឋកិច្ច ការគិតគូរក្របខណ្ឌការលើកទឹកចិត្ត ព្រមទាំងក្របខណ្ឌច្បាប់នៃស្ថាប័ន ទន្ទឹមនៃការរក្សាស្ថេរភាពសុខសន្តិភាព និងស្ថេរភាពនយោបាយ»។

ក្រៅពីនេះរាជរដ្ឋាភិបាលកម្ពុជា ក៏កំពុងខិតខំជំរុញនូវវិស័យសំខាន់ៗមួយចំនួនដូចជា វិស័យអប់រំ ,វិស័យឧស្សាហកម្ម ,វិស័យបច្ចេកវិទ្យា ,វិស័យកសិកម្ម និងវិស័យបដិសណ្ឋារកិច្ច ដើម្បីជំរុញការវិនិយោគឲ្យកាន់តែឆាប់រីកលូតលាស់ផងដែរ។ សម្ដេច ហ៊ុន សែន រំពឹងថានៅឆ្នាំ ២០៣០ កម្ពុជានឹងក្លាយជាប្រទេសមានចំណូលមធ្យមកម្រិតខ្ពស់។ ហើយនៅឆ្នាំ ២០៥០ កម្ពុជានឹងក្លាយជាប្រទេសមានចំណូលខ្ពស់។

កម្ពុជាមានចំណូលមធ្យមកម្រិតទាប ដែលមានកំណើនសេដ្ឋកិច្ច ៧.៧ ភាគរយ។ កម្ពុជាក៏កំពុងចូលរួមយ៉ាងសកម្មជាមួយអាស៊ាន ក្នុងទិសដៅប្រែក្លាយតំបន់អាស៊ីអាគ្នេយ៍ទាំងមូល ឲ្យទៅជាកត្តាលីករ ឬ«ផ្កាយកំពុងរះមួយដួង» ដែលជាការរួមចំណែកនិងជំរុញកំណើនសេដ្ឋកិច្ចតំបន់ និងពិភពលោកផងដែរ។ នេះបើតាមសម្ដេច ហ៊ុន សែន៕