ជាតិ
សេដ្ឋកិច្ច
អត្ថបទពាណិជ្ជកម្ម
កម្ពុជាស្ថិតក្នុងភូមិសាស្ត្រវិនិយោគល្អក្នុងតំបន់អាស៊ាន តែត្រូវបន្ថែមហេដ្ឋារចនាសម្ព័ន្ធ និងបញ្ចុះថ្លៃអគ្គិសនី
× ភ្នំពេញ៖ អ្នកវិនិយោគអន្តរជាតិ បានលើកឡើងថា កម្ពុជាស្ថិតក្នុងភូមិសាស្ត្រកណ្តាលតំបន់អាស៊ានដែលពួកគេងាយស្រួលចរាចរផលិតផលទំនិញក្នុងតំបន់ និងក្រៅតំបន់អាស៊ាន។ ប៉ុន្តែអ្នកវិនិយោគទាំងនោះស្នើឲ្យកម្ពុជា ត្រូវបន្តសាងសង់ហេដ្ឋារចនាសម្ព័ន្ធ បញ្ចុះថ្លៃអគ្គិសនី និងធ្វើច្បាប់ការពារការវិនិយោគថែមទៀត ដើម្បីលើកទឹកចិត្តដល់វិនិយោគិនបរទេស។
លោក Bretton G. Sciaroni សហប្រធានក្រុមប្រឹក្សាភិបាលនៃសភាពាណិជ្ជកម្មអន្តរជាតិនៃកម្ពុជា (The International Business Chamber of Cambodia) មានសុទ្ធិដ្ឋិនិយមថា កម្ពុជាមានឱកាសច្រើន ក្នុងការទាក់ទាញអ្នកវិនិយោគពីបរទេសមកបណ្តាក់ទុនលើគ្រប់វិស័យ។ លោក Bretton G. Sciaroni បានតបនឹងសំណួរអ្នកសារព័ត៌មានជុំវិញស្ថានភាពនៃការវិនិយោគនៅកម្ពុជាថា នៅកម្ពុជាមានទីផ្សារចរាចរទំនិញធំទូលាយ តាមរយៈការចូលជាសមាជិកអាស៊ាន ទោះបីជាប្រទេសកូនពៅអាស៊ានមួយនេះ មានចំនួនប្រជាជនតែ ១៥ លាននាក់ និងផ្ទៃដីតូចក្តី។ «កម្ពុជាមានវិសាលភាពវិនិយោគធំ ដោយសារទំហំទំនិញក្នុងតំបន់អាស៊ានត្រូវឆ្លងកាត់កម្ពុជា។ ឧទាហរណ៍ ការចរាចរទំនិញទៅមក របស់ប្រទេសថៃ និងវៀតណាម»។ សហប្រធាន IBC បញ្ជាក់យ៉ាងនេះ នៅក្នុងសន្និសីទសារព័ត៌មាន នាកិច្ចប្រជុំកំពូលធុរកិច្ចអន្តរជាតិកម្ពុជា ក្រោមប្រធានបទ វិនិយោគលើទឹកដីជាបេះដូងនៃអាស៊ាន (Invest in the heart of ASEAN) នៅថ្ងៃទី១៥ ខែកុម្ភៈនេះ។
ក្រៅពីនេះ សហប្រធានរូបនេះ បានមើលឃើញថា រដ្ឋាភិបាលបានបន្តប្តេជ្ញាចិត្តក្នុងការកែទម្រង់សេដ្ឋកិច្ចបន្ថែមទៀត ក្រោយការបោះឆ្នោតឆ្នាំ ២០១៣ ។ លោកបានបញ្ជាក់ជាវិជ្ជមានចំពោះមុខអ្នកវិនិយោគមកពីតំបន់អឺរ៉ុប អាស៊ី និងអាមេរិកជាង ៥០០ នាក់ថា ក្រសួង ឬស្ថាប័នរដ្ឋសំខាន់ៗ មានសកម្មភាពខ្លាំងក្លាក្នុងការបង្កើត និងការតាក់តែងច្បាប់ និងបទប្បញ្ញត្តិវិនិយោគ រហូតបច្ចុប្បន្ន។ លោកបានលើកច្បាប់ទាំងនោះ រួមមាន ច្បាប់វិនិយោគថ្មីដែលលោកចាត់ទុកជាច្បាប់វិនិយោគមានលក្ខណៈសេរីបំផុតនៅក្នុងតំបន់ និងច្បាប់ប្រឆាំងអំពើពុករលួយ សម្រាប់ការពារអ្នកវិនិយោគក្នុងប្រទេស និងប្រជាជនផង។
ក្រៅពីលោកមើលឃើញថា ការកាត់តែងសេចក្តីព្រាងច្បាប់ស្តីពី តំបន់សេដ្ឋកិច្ចពិសេសថ្មីមួយថែមទៀត នឹងនាំឲ្យកម្ពុជាកាន់តែមានភាពទាក់ទាញលើវិស័យផលិតកម្មធុនស្រាលខ្លាំង ដែលនឹងជួយពង្រីកមូលដ្ឋានសេដ្ឋកិច្ចឲ្យកាន់តែធំទូលាយថែមទៀត ។
តែយ៉ាងណាទន្ទឹមនឹងលោក Bretton G. Sciaroni សរសើរកម្ពុជាថា មានចំណុចល្អសម្រាប់អ្នកវិនិយោគក្នុងតំបន់អាស៊ាន លោកប្រធានគណៈកម្មាធិការវិនិយោគ IBC លោក Pierre Tami វិញ បានថ្លែងនៅក្នុងសន្និសីទកាសែតដែរថា កម្ពុជាគួរតែបញ្ចុះ ថ្លៃអគ្គិសនី និងកសាងហេរដ្ឋារចនាសម្ព័ន្ធបន្ថែមទៀត ព្រមទាំងពិចារណាកែប្រែច្បាប់ប្រមូលពន្ធទៀត ដើម្បីលើកទឹកចិត្តអ្នករកស៊ីបរទេសលើគ្រប់វិស័យ ពិសេសគឺវិស័យកសិកម្ម និងឧស្សាហកម្ម។
ដោយឡែក ប្រធានក្រុមប្រឹក្សានៃក្រុមប្រឹក្សាធ្វើដំណើរ និងទេសចរណ៍ពិភពលោក (The World Travel and Tourism Council) លោក Gerald Lawless បានលើកឡើងថា អ្នកវិនិយោគក៏អាចវិនិយោគ លើវិស័យទេសចរណ៍កម្ពុជាផងដែរ ដោយលោកមើលឃើញថា ប្រទេសក្នុងតំបន់អាស៊ីអាគ្នេយ៍មួយនេះ មានតំបន់ទេសចរណ៍ធម្មជាតិ និងវប្បធម៌ច្រើនកន្លែង។
បើតាម លោក Bretton G. Sciaroni IBC គឺជាលេខាធិការដ្ឋានសម្រាប់ក្រុមការងារទទួលបន្ទុកច្បាប់ ពន្ធ និងអភិបាលកិច្ចស្ទើរគ្រប់វិស័យ ដោយមានរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុជាសហប្រធាន ត្រូវបានបង្កើតឡើងក្នុងឆ្នាំ ១៩៩៤ ៕
Tag:
Bretton G. Sciaroni
Pierre Tami
Gerald Lawless
IBC
សេដ្ឋកិច្ច
© រក្សាសិទ្ធិដោយ thmeythmey.com