ជាតិ
សេដ្ឋកិច្ច
កម្ពុជាគ្រោងចំណាយទឹកប្រាក់ជាង១ពាន់លានដុល្លារ បង្កើតរោងចក្រចម្រាញ់ប្រេង នៅខេត្តព្រះសីហនុ
× ភ្នំពេញ៖ កម្ពុជា គ្រោងបង្កើតរោងចក្រចម្រាញ់ប្រេងមួយ នៅខេត្តព្រះសីហនុ ដែលត្រូវចំណាយទឹកប្រាក់ជាង១ពាន់លានដុល្លារ។ នេះបើតាមទីភ្នាក់ងារសារព័ត៌មានជាតិកម្ពុជា AKP។
អ្នកនាំពាក្យក្រសួងរ៉ែ និងថាមពល លោក ឆែ លីឌីន បានឲ្យដឹងថា រោងចក្រចម្រាញ់ប្រេងនេះ គ្រោងនឹងដំណើរសាងសង់នៅឆ្នាំ២០១៨ខាងមុខនេះ ដែលជាការបោះទុនវិនិយោគរបស់ក្រុមហ៊ុន Cambodian Petrochemical Company (CPC)។ លោកថា មូលហេតុដែលបង្កើតរោងចក្រនៅខេត្តព្រះសីហនុនេះ ព្រោះទីតាំងកន្លែងនោះជាប់កន្លែងដឹកជញ្ជូន ដែលវាផ្ដល់ភាពងាយស្រួល ដល់សេវាដឹកជញ្ជូន និងបង្កើតការងារដល់ពលរដ្ឋផងដែរ។
លោក ឆែ លីឌីន បានបញ្ជាក់ដូច្នេះថា៖« រយៈកាលកន្លងមកក្រុមហ៊ុនបានជួបបញ្ហាស្វែងរកប្រភពហិរញ្ញវត្ថុ ដើម្បីបោះទុនវិនិយោគ លើគម្រោងនេះ គួបផ្សំនឹងកត្តាតម្លៃប្រេងឆៅនៅលើទីផ្សារអន្តរ ជាតិធ្លាក់យ៉ាងគំហុកនាប៉ុន្មានឆ្នាំចុងក្រោយ នេះធ្វើឲ្យគម្រោងមានការយឺតយ៉ាវក្នុងការអនុវត្ត។ ប្រសិនដំណើរការដូចគ្រោងទុកក្រុមហ៊ុនត្រូវការប្រមាណ ៣៦ខែ ដើម្បីរៀបចំសាងសង់ និងដាក់ឱ្យដំណើរការ ហើយគ្រោងនឹងសាងសង់នៅឆ្នាំ២០១៨ខាងមុខនេះ»។
បើតាមលោក ឆែ លីឌីន គម្រោងបង្កើតរោងចក្រចម្រាញ់ប្រេងនេះ ត្រូវការចំណាយទឹកប្រាក់ប្រមាណ ១,៦ពាន់លានដុល្លារ ។ លោក រំពឹងថា ការបង្កើតរោងចក្រចម្រាញ់ប្រេងនេះ នឹងផ្តល់ផលប្រយោជន៍ច្រើនដល់កម្ពុជា។ ជាពិសេសការសម្រួលតម្លៃប្រេងក្នុងការផ្គត់ផ្គង់ក្នុងស្រុក និងនាំចេញទៅលក់ក្រៅប្រទេសផងដែរ ។
គួរបញ្ជាក់ថា ក្រសួងរ៉ែ និងថាមពល ធ្លាប់បានផ្តល់ការឯកភាពជាគោលការណ៍ដល់ក្រុមហ៊ុនក្នុងស្រុកមួយនេះ (CPC) សហការជាមួយក្រុមហ៊ុនដៃគូវិនិយោគចិន ដើម្បីបង្កើតរោងចក្រចម្រាញ់ប្រេងនេះ តាំងពីឆ្នាំ២០១២ មកម្លេះ៕
© រក្សាសិទ្ធិដោយ thmeythmey.com