អន្តរជាតិ
លោក ប្រាយុទ្ធ ចេញបញ្ជាបោសសម្អាតអំពើពុករលួយក្នុងជួរប៉ូលិស
× នាយករដ្ឋមន្ត្រីថៃ លោកឧត្តមសេនីយ៍ ប្រាយុទ្ធ ចន្ទអូចា បានចេញបញ្ជាដើម្បីធានាតម្លាភាព និងទប់ស្កាត់បក្សពួកនិយមក្នុងការតែងតាំងប៉ូលិស និងដំឡើងតួនាទីក្នុងជួរប៉ូលិស។ លោក ប្រាយុទ្ធ ចេញបញ្ជានេះ ដោយប្រើអំណាចពិសេសដែលផ្ដល់ឲ្យមាត្រា៤៤ នៃរដ្ឋធម្មនុញ្ញបណ្ដោះអាសន្ន ខណៈដែលស្ថានភាពពុករលួយក្នុងការទិញតំណែងរបស់អង្គភាពប៉ូលិស មានស្ថានភាពអាក្រក់គួរឲ្យបារម្ភខ្លាំង។
បន្ទាប់ពីបានសារភាពថាមានករណីទិញតំណែងច្រើនក្នុងជួរមន្ត្រីប៉ូលិស ប្រមុខរដ្ឋាភិបាលយោធាថៃ ប្រាយុទ្ធ ចន្ទអូចា ក៏បានប្រើអំណាចពិសេសចេញបញ្ជាថ្មីមួយ ដើម្បីលុបបំបាត់អំពើពុករលួយក្នុងស្ថាប័ននេះ។ ក្នុងនាមជាប្រធានក្រុមប្រឹក្សាជាតិដើម្បីសន្តិភាព និងសណ្ដាប់ធ្នាប់ (NCPO) លោក ប្រាយុទ្ធ ចង់បានតម្លាភាពក្នុងតែងតាំង និងដំឡើងស័ក្តិក្នុងអង្គភាពប៉ូលិសគ្រប់ថ្នាក់ទាំងអស់ ក៏ដូចជាចៀសវាងបក្សពួកនិយមផងដែរ។
បើតាមកាសែតបាងកកប៉ុស្តិ៍ បទបញ្ជាលេខ ៧/២៥៦ ដែលចុះក្នុងរាជកិច្ចនៅថ្ងៃទី២០ ខែកុម្ភៈ ចែងថាប៉ូលិសជាតិថៃ មានអំណាចគ្រប់គ្រាន់ក្នុងការតែងតាំងមន្ត្រីប៉ូលិស ប៉ុន្តែដំណើរការ និងលក្ខខណ្ឌផ្សេងៗមួយចំនួន នឹងត្រូវអនុវត្តដំណាលគ្នា ដើម្បីធានាយុត្តិធម៌ និងគ្មានអំពើពុករលួយក្នុងការតែងតាំង និងដំឡើងតំណែង។ មិនតែប៉ុណ្ណោះ អង្គភាពប៉ូលិសគ្រប់ថ្នាក់ ក៏ត្រូវបង្កើតគណៈកម្មាធិការមួយដើម្បីពិនិត្យលើការតែងតាំងនេះដែរ។
លើសពីនេះទៅទៀត បទបញ្ជាខាងលើ ក៏ណែនាំឲ្យមេប៉ូលិសជាតិបង្កើតគណៈកម្មាធិការស្រដៀងគ្នានេះនៅការិយាល័យប៉ូលិសជាតិ ដើម្បីពិនិត្យការងាតែងតាំងនៅការិយាល័យរបស់ខ្លួន។ ហើយមន្ត្រីទាំងអស់ដែលត្រូវបានតែងតាំងអាចត្រូវដកតំណែងវិញ បើរកឃើញថា ពួកគេមិនស័ក្ដិសមនឹងតំណែងថ្មីរបស់ខ្លួន។ ក្នុងករណីមានពាក់ព័ន្ធករណីពុករលួយ ស្នងការប៉ូលិសនៃអង្គភាពនោះ ត្រូវរាយការណ៍ទៅថ្នាក់លើរបស់ខ្លួន ដើម្បីបើកការស៊ើបអង្កេត។
យោងតាមបទបញ្ជាដដែល លោក ប្រាយុទ្ធ ក៏បានបង្គាប់ឲ្យគណៈកម្មការប្រឆាំងអំពើពុករលួយវិស័យសាធារណៈ បង្កើតកន្លែងទទួលបណ្ដឹងបន្ថែមទៀតទាក់ទងករណីពុករលួយក្នុងការតែងតាំងតំណែងថ្មី។ ជាមួយគ្នានេះ ប៉ូលិសជាតិថៃ ក៏ត្រូវទទួលបន្ទុកការពារសាក្សី និងអ្នកផ្ដល់ដំណឹង បន្ទាប់ពីការស៊ើបអង្កេតលើពាក្យបណ្ដឹងចាប់ផ្ដើម។ ម្ចាស់បណ្ដឹងក៏អាចស្នើឲ្យប្រធាន NCPO ផ្ទេរការងារមន្ត្រីប៉ូលិសសង្ស័យ ទៅធ្វើការកន្លែងផ្សេង អំឡុងពេលស៊ើបអង្កេតទៀតផង។
ប៉ូលិសជាតិថៃ នឹងមានពេល៦០ថ្ងៃ ដើម្បីពិនិត្យគោលការណ៍កែទម្រង់ស្ថាប័នប៉ូលិស និងបញ្ជូនទៅកាន់នាយករដ្ឋមន្ត្រីបន្តទៀត។ អ្វីដែលគួរឲ្យចាប់អារម្មណ៍នោះ បទបញ្ជាថ្មី កែប្រែស្ទើរទាំងស្រុងពីដំណើរការចាស់ ដែលគណៈកម្មការប៉ូលិសដឹកនាំដោយឧបនាយករដ្ឋមន្ត្រី Prawit Wongsowon ជាអ្នកទទួលខុសត្រូវផ្ដាច់មុខលើការតែងតាំងមន្ត្រីប៉ូលិសនោះ។ ហើយបញ្ជាថ្មីនេះ ក៏ដូចជាផាត់ចោលតួនាទីតែងតាំងប៉ូលិសរបស់គណៈកម្មការនេះតែម្ដង៕
Tag:
ប្រាយុទ្ធ ចន្ទអូចា
ពុករលួយ
ស្ថាប័នប៉ូលិសថៃ
© រក្សាសិទ្ធិដោយ thmeythmey.com