អន្តរជាតិ
ប៉ូលិសម៉ាឡេស៊ី ប្រាប់គ្រួសារបងប្រុសលោកគីម ជុងអ៊ុនកុំភ័យខ្លាចពេលទៅបញ្ជាក់ទទួលសាកសព ប្រភពរូបភាព ៖ AP
× មេប៉ូលិសរដ្ឋ Selangor នៃប្រទេសម៉ាឡេស៊ី នៅថ្ងៃ២១ កុម្ភៈនេះ បានផ្ញើសារផ្តល់ភាពកក់ក្តៅមួយដល់ក្រុមគ្រួសាររបស់លោក គីម ជុងណាំ ដោយអះអាងថា រាល់សាច់ញាតិ ឬក្រុមគ្រួសារដែលមកបញ្ជាក់យកសាកសព នឹងត្រូវបានការពារដោយប៉ូលិសម៉ាឡេស៊ី។ ការថ្លែងបែបនេះ បន្ទាប់ពីមានពាក្យចចាមអារាមថា កូនប្រុសរបស់លោក គីម ជុងណាំ កំពុងតែស្នាក់នៅម៉ាឡេស៊ី។
«យើង នឹងផ្តល់ការការពារជាពិសេស នៅពេលដែលមានការទាក់ទង។ ប្រសិនបើ មានសមាជិកគ្រួសារមកម៉ាឡេស៊ី ប៉ូលិស នឹងជូនទៅកាន់មន្ទីរពេទ្យកូឡាឡាំពួរដើម្បីកំណត់ និងផ្ទៀងផ្ទាត់អត្តសញ្ញាណ ហើយចុងក្រោយផ្តល់គំរូ DNA ជាមួយនឹងសាកសព។»។ នេះគឺជាការអះអាងរបស់មេប៉ូលិសរដ្ឋ Selangor លោក Abd Samah Mat ជាមួយនឹងសារព័ត៌មាន Channel News Asia ពាក់ព័ន្ធនឹងការវិវត្តចុងក្រោយនៃសំណុំរឿងឃាតកម្មបងប្រុសលោកប្រធានាធិបតីកូរ៉េខាងជើង ។
កន្លងមក បើទោះបីជា ស្ថានទូតកូរ៉េខាងជើង បានទាមទារឲ្យម៉ាឡេស៊ី ប្រគល់សាកសពនោះក៏ដោយ តាមការបញ្ជាក់របស់ប៉ូលិសម៉ាឡេស៊ី មិនទាន់មានសមាជិកក្រុមគ្រួសារណាមួយ មកបញ្ជាក់ DNA ដើម្បីទទួលយកសាកសពជាផ្លូវការឡើយ។
លោក Abd Samah Mat ក៏បានបញ្ជាក់ជាថ្មីជាមួយសារព័ត៌មាន Channel News Asia នៅថ្ងៃនេះដែលថា ប្រសិនបើប៉ូលិស ពិនិត្យឃើញថា DNA ត្រឹមត្រូវជាមួយនឹងសាកសពហើយនោះ ប៉ូលិស នឹងបញ្ជូនសាកសពឲ្យក្រុមគ្រួសារតែម្តង ហើយម៉ាឡេស៊ី នឹងជូនដំណឹងទៅកាន់ស្ថានទូតកូរ៉េខាងជើងផងដែរ។
តាមប្រភពព័ត៌មានដដែលនោះ មានពាក្យចចាមអារាម ថា កូនប្រុសរបស់លោក គីម ជុងណាំ បានទៅ ដល់ម៉ាឡេស៊ី ក្រោយពីប៉ូលិស បានប្រកាសទុកពេលពីរសប្តាហ៍ឲ្យក្រុមគ្រួសារទៅបញ្ជាក់អត្តសញ្ញាណដើម្បីយកសាកសពតាមនីតិវិធីរបស់ប្រទេសម៉ាឡេស៊ី។
សូមរម្លឹកបន្តិចថា លោក គីម ជុងណាំ ដែលមានម្តាយផ្សេងគ្នាពីលោកប្រធានាធិបតីគីម ជុងអ៊ុន ត្រូវបានសម្លាប់នៅព្រលានយន្តហោះកូឡាឡាំពួនៃប្រទេសម៉ាឡេស៊ីនៅថ្ងៃទី១៤ ខែកុម្ភៈ។ លោក បានស្លាប់នៅតាមផ្លូវ ខណៈមន្ត្រីព្រលានយន្តហោះ បញ្ជូនលោកទៅកាន់សង្គ្រោះបន្ទាន់ បន្ទាប់ពី មានហេតុការណ៍នៃការខ្ទប់មុខលោកជាមួយនឹងសារធាតុពុល នៅព្រលានយន្តហោះម៉ាឡេស៊ី។
នៅថ្ងៃម្សិលមិញ ក្រសួងការបរទេសម៉ាឡេស៊ី ក៏បានកោះហៅអគ្គរដ្ឋទូតកូរ៉េខាងជើងប្រចាំម៉ាឡេស៊ីដើម្បីបំភ្លឺពីការចោទប្រកាន់ម៉ាឡេស៊ី ថា មានការលាក់បាំងពីសំណុំរឿងឃាតកម្មនេះ៕
Tag:
ម៉ាឡេស៊ី
កូរ៉េខាងជើង
© រក្សាសិទ្ធិដោយ thmeythmey.com