កីឡាអន្តរជាតិ
អន្តរជាតិ
Neymar នឹងចូលបំភ្លឺក្នុងតុលាការម្តងទៀតពាក់ព័ន្ធការរួមគំនិតក្នុងអំពើពុករលួយ
× Neymar នឹងចូលទៅជំនុំជម្រះក្តីម្តងទៀត បន្ទាប់ពីចាញ់បណ្តឹងនៅឧទ្ធរណ៍ចុងក្រោយ ពីបទរួមគំនិតក្នុងអំពើពុករលួយ នៅពេលដែលខ្សែប្រយុទ្ធឆ្នើមរបស់ Barcelona រូបនេះ ផ្ទេរពីក្លិប Santos របស់ប្រេស៊ីល ទៅក្លិបអ្នកមានបុណ្យ កាលពីឆ្នាំ២០១៣។
បណ្តឹងខាងលើនេះ កើតចេញពីការប្តឹងរបស់ក្រុមហ៊ុនវិនិយោគរបស់ប្រេស៊ីល DIS ដែលជាម្ចាស់កម្មសិទ្ធិ ៤០ភាគរយ នៃការផ្ទេររបស់ Neymar ដោយអះអាងថាខ្លួនទទួលបានប្រាក់ពី Barca តិចជាងតម្លៃនៃការផ្ទេរពិតប្រាកដ។
ក្រោយរកឃើញថា ខ្សែប្រយុទ្ធអន្តរជាតិប្រេស៊ីល Neymar មានជាប់ពាក់ព័ន្ធនឹងអំពើពុករលួយកាលពីរូបគេផ្ទេរពីក្លិប Santos មកកាន់ ទឹកដី Camp Nou តុលាការនៃប្រទេសអេស្ប៉ាញ បានចេញដីកាកាត់ទោសតារាឆ្នើមរូបនេះឲ្យជាប់ពន្ធនាគាររយៈពេល២ឆ្នាំ និងប្រឈមពិន័យជាប្រាក់ជិត១០លានដុល្លារអាមេរិក។
ក្លិប Santos ក្លិប Barcelona និងក្រុមហ៊ុនរបស់ឪពុកម្ដាយ Neymar ក៏ចាញ់បណ្តឹងនៅឧទ្ធរណ៍ជុំវិញអំពើពុករលួយខាងលើនេះដូចគ្នា។ ហើយពួកគេក៏មិនអាចបន្តប្តឹងជំទាស់ប្រឆាំងនឹងសេចក្តីសម្រេចរបស់តុលាការកំពូលអេស្ប៉ាញនេះបានទៀតដែរ។
សូមបញ្ជាក់ថា ក្រោមប្រព័ន្ធច្បាប់របស់អេស្ប៉ាញ អ្នកជាប់ទោសក្រោម រយៈពេល២ឆ្នាំ អាចមានសិទ្ធិព្យួរទោសបាន ដូចឆ្នេះមានន័យថា បើសិនជាកីឡាករឆ្នើមវ័យ២៥ឆ្នាំ រួមទាំងឪពុកម្ដាយខ្លួន មានជាប់ទោសក្នុងបទចោទនេះមែន ពួកគេក៏អាចនៅក្រៅឃុំបានដែរ ប៉ុន្តែត្រូវប្រយ័ត្នកុំឲ្យរកឃើញទោសកំហុសជាលើកទី២៕
Tag:
Neymar
Barcelona
Santos
បាល់ទាត់
តុលាការ
© រក្សាសិទ្ធិដោយ thmeythmey.com