ដូណាល់ ត្រាំ ជ្រើសរើសឧត្តមសេនីយ៍ចូលចិត្តរិះគន់ចៅហ្វាយ ធ្វើជាទីប្រឹក្សាសន្តិសុខជាតិថ្មី

អន្តរជាតិ

ដូណាល់ ត្រាំ ជ្រើសរើសឧត្តមសេនីយ៍ចូលចិត្តរិះគន់ចៅហ្វាយ ធ្វើជាទីប្រឹក្សាសន្តិសុខជាតិថ្មី

21, Feb 2017 , 8:19 pm

រូបភាព

លោកប្រធានាធិបតី ដូណាល់ ត្រាំ តែងតាំងឧត្តមសេនីយ៍ McMaster ជាទីប្រឹក្សាសន្តិសុខជាតិថ្មី (រូបថត Xinhua)

ដោយ: តន ចាន់រិទ្ធារ៉ា

ប្រធានាធិបតី ដូណាល់ ត្រាំ បានជ្រើសរើសឧត្តមសេនីយ៍ឯក Herbert Raymond McMaster ជាទីប្រឹក្សាសន្តិសុខជាតិថ្មី ជំនួសលោក Michael Flynn ដែលលាលែងពីតំណែងដោយសាររឿងអាស្រូវសន្ទនាទូរសព្ទជាមួយអគ្គរដ្ឋទូតរុស្ស៊ី។ ការជ្រើសរើសឧត្តមសេនីយ៍ McMaster សម្រាប់តំណែងនេះ ទទួលបានការសាទរច្រើន ព្រោះលោកឧត្តមសេនីយ៍រូបនេះត្រូវគេសរសើរថា ជាមេទ័ពឆ្លាតវៃ និងពូកែខាងយុទ្ធសាស្ត្រក្នុងជួរទ័ពជើងគោកអាមេរិក។

អស់ពីឧត្តមសេនីយ៍ម្នាក់ ឥឡូវនេះឧត្តមសេនីយ៍ម្នាក់ទៀត ត្រូវបានតែងតាំងជាទីប្រឹក្សាសន្តិសុខជាតិ ដែលទទួលបន្ទុកផ្ដល់ប្រឹក្សាឲ្យប្រធានាធិបតីអាមេរិករឿងនយោបាយការបរទេស និងកិច្ចការសន្តិសុខជាតិ។ ឧត្តមសេនីយ៍ Herbert Raymond McMaster ដែលគេស្គាល់ថាជាអ្នកយុទ្ធសាស្ត្រយោធា ត្រូវបានប្រធានាធិបតី ដូណាល់ ត្រាំ បានតែងតាំងសម្រាប់តំណែងសំខាន់នេះនៅថ្ងៃទី២០ ខែកុម្ភៈ ជំនួសឧត្តមសេនីយ៍ចូលនិវត្តន៍ Michael Flynn ដែលចុះចេញពីតំណែង។

ឧត្តមសេនីយ៍ McMaster មានប្រភពមកពីកងទ័ពជើងគោកអាមេរិក និងជាអ្នកជំនាញយុទ្ធសាស្ត្រយោធាមួយរូបផង។ ការតែងតាំងលោកនៅពេលនេះ ធ្វើឲ្យមានការភ្ញាក់ផ្អើលខ្លាំង ព្រោះលោកជាមនុស្សដែលនិយាយរិះគន់ចៅហ្វាយនាយ ចូលចិត្តនិយាយត្រង់ ស្របពេលដែលរដ្ឋបាលថ្មីរបស់លោក ត្រាំ មិនស្វាគមន៍សម្ដីរិះគន់ណាមួយឡើយ។ ហើយដោយសារមាត់ឆៅនេះហើយ ទើបធ្វើឲ្យលោកត្រូវខកខានឡើងតំណែងពីរដងក្នុងឆ្នាំ២០០៦ និង២០០៧ ។

យ៉ាងណាមិញ ទីភ្នាក់ងារព័ត៌មាន Reuters ផ្សាយថា លោកប្រធានាធិបតី ត្រាំ បានសរសើរឧត្តមសេនីយ៍រូបនេះ ជាបុគ្គលទទួលបានការគោរពខ្លាំងក្នុងជួរទ័ព ហើយជាកិត្តិយសដែលលោក McMaster មកធ្វើជាទីប្រឹក្សាសន្តិសុខ។ ពី West Palm Beach ជាទីលំហែកាយចុងសប្ដាហ៍ លោក ត្រាំ និយាយថា ឧត្តមសេនីយ៍ McMaster ជាមនុស្សពោរពេញដោយភាពឆ្លាតវៃ និងសម្បូរដោយបទពិសោធន៍។

សមាជិកព្រឹទ្ធសភា John McCain ដែលរឿយៗបានរិះគន់លោក ត្រាំ នោះ ក៏បែរជាបង្ហាញការពេញចិត្តចំពោះជម្រើសរបស់លោក ត្រាំ នៅពេលនេះ។ ចំណែកលោក Michael McFaul អតីតទូតអាមេរិកប្រចាំរុស្ស៊ី និងជាអ្នកប្រជាធិបតេយ្យ បានហៅឧត្តមសេនីយ៍រូបនេះ ជាមនុស្សអស្ចារ្យ និងមិនរារែក ឬភ័យខ្លាចក្នុងការសួរសំណួរទៅកាន់ចៅហ្វាយនាយរបស់ខ្លួន។

បន្ថែមពីលើនេះ សេតវិមាននិយាយដែរថា ទន្ទឹមនឹងការតែងតាំងធ្វើជាទីប្រឹក្សាសន្តិសុខជាតិ ឧត្តមសេនីយ៍ផ្កាយបី McMaster នឹងនៅតែមានឈ្មោះក្នុងជួរកងទ័ពដដែល។ ប៉ុន្តែអ្វីដែលជាបញ្ហាពេលក្រោយ គឺគំនិយផ្ទុយគ្នារបស់លោក ត្រាំ និងឧត្តមសេនីយ៍ McMaster លើរឿងរុស្ស៊ី។ ខុសពីលោក ត្រាំ ដែលចង់ធ្វើមិត្តស្អិតល្មួតជាមួយរុស្ស៊ី លោក McMaster បែរជាយល់ថា រុស្ស៊ី ជាគំរាមកំហែងមកលើអាមេរិក និងជាអ្នកប្រឆាំងអាមេរិករហូត៕