អន្តរជាតិ
ប្រធានអាស៊ានហ្វីលីពីន ស្វះស្វែងសម្រេចឲ្យបានក្រមប្រតិបត្តិសមុទ្រចិនខាងត្បូង លោក ប្រធានាធិបតីហ្វីលីពីន រ៉ូធ្រីហ្គូ ឌើទើតេ
× រដ្ឋាភិបាលក្រុងម៉ានីល បាននិងកំពុងតែដុតដៃដុតជើ់ងខ្លាំងក្នុងការដឹកនាំក្រុមការងារអាស៊ាន-ចិន ដើម្បីសម្រេចឲ្យបាននូវសមិទ្ធផលលិខិតូបករណ៍គតិយុត្តមួយក្នុងការធានាឲ្យបានស្ថិរភាព និងសន្តិភាពនៅក្នុងតំបន់ជម្លោះសមុទ្រចិនខាងត្បូង។ ហើយលិខិតូបករណ៍នោះគឺ ក្រមប្រតិបត្តិសមុទ្រចិនខាងត្បូង ដែលអាស៊ាន និងចិន បានចំណាយពេលធ្វើច្រើនឆ្នាំហើយនោះ តែមិនទាន់ត្រូវរូវគ្នា។
អនុរដ្ឋមន្ត្រីការបរទេសហ្វីលីពីន លោក Enrique Manalo នៅថ្ងៃទី២០ ខែកុម្ភៈ បានអះអាងថា ការវិវត្តចុងក្រោយនៅក្នុងតំបន់ជម្លោះសមុទ្រចិនខាងត្បូង គឺជាការជំរុញមួយរបស់អាស៊ាន និងចិន ក្នុងការប្រឹងប្រែងសម្រេចឲ្យបានក្រមប្រតិបត្តិមួយ(សមុទ្រចិនខាងត្បូង)នៅចុងឆ្នាំនេះ។ នេះបើយោងតាមការចុះផ្សាយរបស់សារព័ត៌មានថៃ The Nation។
សូមជម្រាបផងដែរថា នៅឆ្នាំ២០០២ ក្នុងពេលកម្ពុជា គឺជាប្រធានអាស៊ាន អាស៊ាន និងចិន បានចុះហត្ថលេខាលើសេចក្តីថ្លែងការណ៍ស្តីពីភាគីក្រមប្រតិបត្តិសមុទ្រចិនខាងត្បូង ដែលជាលិខិតូបករណ៍គតិយុត្តសំខាន់ និងដំបូងរវាងអាស៊ាន និងចិន ដែលបានបញ្ញតិពីយន្តការជាច្រើនលើតំបន់ជម្លោះសមុទ្រចិនខាងត្បូង។
នាពេលនោះ ភាគីពាក់ព័ន្ធទាំងអស់ ក៏បានមានផែនការក្នុងការសម្រេចឲ្យបានក្រមប្រតិបត្តិសមុទ្រចិនខាងត្បូងដើម្បីជាលិខិតូបករណ៍ដែលមានចរិកលក្ខណៈចាប់បង្ខំផ្នែកច្បាប់លើភាគីក្នុងកម្រិតកំពូលមួយបន្ថែមពាក់ព័ន្ធនឹងតំបន់ជម្លោះផងដែរ។
ក៏ប៉ុន្តែ គិតចាប់ពីពេលនោះមក ភាគីពាក់ព័ន្ធទាំងអស់ មិនមានការឯកភាពគ្នាណាមួយឡើយ ពោលគឺ ការចរចា មិនដែលទទួលបានផ្លែផ្កាអ្វីឡើយ ដ្បិតភាគីជម្លោះនីមួយៗ មានជំហររឹងទទឹងរៀងៗខ្លួន។ ភាគីជម្លោះសមុទ្រចិនខាងត្បូង មានដូចជាព្រុយណេ ម៉ាឡេស៊ី ហ្វីលីពីន និងវៀតណាម ជាមួយនឹងចិន។
ជុំវិញការចរចានេះ លោកអនុរដ្ឋមន្ត្រីការបរទេសហ្វីលីពីនដដែលនោះ បានបន្ថែមថា ក្រុមការងារអាស៊ាន-ចិន បានរំពឹងថា នឹងអាចបញ្ចប់ក្របខណ្ឌរួមនៃក្រមប្រតិបត្តិនៅឆ្នាំនេះ មុនពេលបន្តដំណើរការចរចាលើចំណុចស្នូលនៃក្រមប្រតិបត្តិ។
លោក សង្កត់ធ្ងន់ថា៖«ស្ថានភាព ដែលបានកើតឡើងនៅក្នុងឆ្នាំមុន និងឆ្នាំនេះ (នៅក្នុងសមុទ្រចិនខាងត្បូង) គឺជាព្រឹតិ្តការណ៍ដ៏សំខាន់សម្រាប់អាស៊ាន ក្នុងការប៉ងចង់សម្រេចឲ្យបានក្រមប្រតិបត្តិឲ្យកាន់តែឆាប់តាមដែលអាចធ្វើទៅបាន»។
លោកអនុរដ្ឋមន្ត្រីរូបនោះ បានបន្ថែមថា អាស៊ាន បានមានចេតនាមួយពិតប្រាកដក្នុងសម្រេចឲ្យបានលិខិតូបករណ៍មួយដើម្បីទប់ស្កាត់ភាពតានតឹងដែលអាចគំរាមកំហែងសន្តិភាព និងស្ថិរភាពនៅក្នុងតំបន់។
សូមជម្រាបផងដែរថា ឆ្នាំ២០១៧នេះ ហ្វីលីពីន គឺជាប្រធានវិលជុំអាស៊ាន។ ក្នុងនាមជាប្រធានអាស៊ានហ្វីលីពីន ត្រូវមានកាតព្វកិច្ចច្រើន ដែលត្រូវរាប់រ៉ង ដែលនោះ ក៏រាប់បញ្ចូលទាំងការរៀបចំកិច្ចប្រជុំឲ្យបានរលូន។ បើហ្វីលីពីន ពិតជាអាចដឹកនាំអាស៊ានសម្រេចបាននូវក្រមប្រតិបត្តិសមុទ្រចិនខាងត្បូងមែន នោះ វា ក៏នឹងក្លាយជាសមិទ្ធផល និងកេរ្តិ៍មរតកនៃការដឹកនាំមួយរបស់លោកប្រធានាធិបតី រ៉ូឌ្រីហ្គូ ឌើទើតេផងដែរ៕
Tag:
ហ្វីលីពីន
អាស៊ាន
សមុទ្រចិនខាងត្បូង
© រក្សាសិទ្ធិដោយ thmeythmey.com