អត្ថបទពាណិជ្ជកម្ម
សិស្សសាលារៀន អន្តរទ្វីប អាមេរិកាំង ៥៥៦នាក់ ទស្សនកិច្ចសិក្សារមណីយដ្ឋានប្រវត្តិសាស្ត្រភ្នំជីសូរ្យ
×![]()
គណៈគ្រប់គ្រងនៃសាលារៀន អន្តរទ្វីប អាមេរិកាំង ទាំង៣សាខា បានរួមគ្នាដឹកនាំសិស្សថ្នាក់ទី១១ ប្រមាណ៥៥៦នាក់ ធ្វើដំណើរទស្សនកិច្ចសិក្សាទៅកាន់រមណីយដ្ឋានប្រវត្តិសាស្ត្រភ្នំជីសូរ្យ ដែលស្ថិតនៅឃុំរវៀង ស្រុកសំរោង ខេត្តតាកែវ នាសប្ដាហ៍មុននោះ ដើម្បីបង្កឱកាសឱ្យសិស្សានុសិស្សទាំងនោះបានសិក្សាឈ្វេងយល់ពីប្រវត្តិសាស្ត្រ ស្គាល់ពីស្ថានភាពសង្គម ជីវភាពប្រជាពលរដ្ឋក្នុងតំបន់ ព្រមទាំងដឹងពីប្រវត្តិរមណីយដ្ឋានប្រាសាទបុរាណ ប្រាង្គប្រាសាទ និងភ្នំធម្មជាតិជាដើម។ ពិសេស គឺមានចេតនាបណ្ដុះនូវទឹកចិត្តយុវសិស្សឲ្យស្រឡាញ់វប្បធម៌ អរិយធម៌ សម្បត្តិវប្បធម៌នៃប្រាង្គប្រាសាទបុរាណដែលជាបេតិកភណ្ឌជាតិ និងក៏ដើម្បីរួមចំណែកបន្តផ្សព្វផ្សាយពីសមិទ្ធផលប្រវត្តិសាស្ត្រទាំងនោះដល់មហាជនទូទៅផងដែរ។
ទាក់ទិនបញ្ហានេះ លោក ប៉ាំង លាងស៊ីម ចាងហ្វាងមធ្យមសិក្សានៃទុតិយភូមិ បានប្រាប់អ្នកសារព័ត៌មានយើងថា ការណ៍ជ្រើសរើសយកទីតាំងនោះធ្វើជាគោលដៅនៃដំណើរទស្សនកិច្ចសិក្សាលើកនេះ ក៏ព្រោះដោយសារទីនោះជាទីតាំងរមណីយដ្ឋានប្រវត្តិសាស្ត្រដែលមានប្រាសាទបុរាណមួយ បានកសាងឡើងដោយថ្មបាយក្រៀម និងឥដ្ឋ តាំងដើមសតវត្សរ៍ទី១១ ក្នុងរជ្ជកាលព្រះបាទសូរ្យវរ្ម័នទី១ (១០០២-១០៥០) មកម្ល៉េះ ដើម្បីឧទ្ទិសថ្វាយដល់អាទិទេពក្នុងព្រហ្មញ្ញសាសនា។ ម្យ៉ាងក៏ដើម្បីឱ្យសិស្សានុសិស្សបានសិក្សាពីរឿងរ៉ាវប្រវត្តិសាស្ត្រខ្លះៗ អំពីសាសនា វប្បធម៌ ប្រពៃណី ក៏ដូចជាលម្ហែកម្សាន្តស្រូបយកខ្យល់បរិសុទ្ធនៃធម្មជាតិដ៏បំព្រងនៅទីនោះផងដែរ។ សូមជម្រាបជូនថា ដំណើរទស្សនកិច្ចនេះ ក៏មានចេតនាឱ្យសិស្សដឹងពីជីវភាពរស់នៅរបស់ប្រជាជននាតំបន់នោះ ថាតើមានលក្ខណៈប្លែកគ្នាយ៉ាងណាខ្លះរវាងប្រជាជននៅរាជធានីភ្នំពេញ និងតាមទីជនបទ។
ចាងហ្វាងរូបនេះបន្ថែមថា ដំណើរទស្សនកិច្ចលើកនេះ ក៏អាចជួយជំរុញទឹកចិត្តសិស្សានុសិស្សឱ្យចេះស្រឡាញ់កេរដំណែលប្រវត្តិសាស្ត្រ កេរដំណែលធម្មជាតិ បរិស្ថាន អនាម័យ ហើយក៏ជាការលើកទឹកចិត្តឱ្យពួកគេចូលរួមថែរក្សាមរតកទាំងអស់នេះដែរ។ ក្រៅពីអាចជំរុញទឹកចិត្តសិស្សឱ្យស្រឡាញ់ និងថែរក្សាកេរដំណែលទាំងអស់នេះហើយ ក៏នឹងអាចជួយឱ្យពួកគេបានស្គាល់មិត្តភក្តិថ្មីៗ រឹតចំណងសាមគ្គីភាព មិត្តភាព ភាតរភាព និងជម្រុះចោលនូវភាពនឿយណាយទាំងឡាយក្នុងការសិក្សា ដើម្បីទទួលយកអារម្មណ៍សប្បាយរីករាយវិញម្ដង។ អ្វីពិសេសជាងនេះ ដំណើរទស្សនកិច្ចសិក្សានេះ គឺផ្សារភ្ជាប់ទ្រឹស្តីនិងការអនុវត្ត។ ឧទាហរណ៍ថា ក្រោយពីការរៀនមុខវិជ្ជាប្រវត្តិសាស្ត្រក្នុងថ្នាក់ ពួកគេអាចមកឃើញផ្ទាល់ ប៉ះផ្ទាល់ដល់ទីតាំងពិតៗ ប្រយោជន៍ជួយឱ្យពួកគេបានយល់ច្បាស់ និងមានការចងចាំល្អ។ នេះជាការអះអាងបន្ថែមរបស់ចាងហ្វាងដដែលរូបនេះ។
នាឱកាសនោះ យុវសិស្ស ស័រ គីមផាង សិស្សថ្នាក់ទី១១ “គ” សាខាម៉ៅសេទុង ថ្លែងថាពិតជាសប្បាយរីករាយដែលបានមកទស្សនកិច្ចសិក្សានៅតំបន់នេះ ជាហេតុធ្វើឱ្យយល់ពីបញ្ហាសង្គមនានានៅតាមជនបទ ព្រោះទីក្រុងនិងជនបទមានលក្ខណៈខុសប្លែកគ្នាឆ្ងាយណាស់។ អ្វីដែលពិសេសនោះ គឺទេសភាពស្រស់ស្អាត ព្រៃឈើ ភ្នំ និងមានប្រាង្គប្រាសាទបុរាណជាដើម ហើយអ្វីដែលធ្វើឱ្យយើងដឹងកាន់តែច្បាស់ ថែមទាំងអស្ចារ្យផងនោះ គឺភាពដ៏ប៉ិនប្រសប់របស់បុព្វបុរសខ្មែរយើង ដែលបានកសាងប្រាសាទបុរាណនៅលើភ្នំជីសូរ្យ ហើយសុទ្ធសឹងតែថ្មល្អៗ។ នេះបានបញ្ជាក់ថា ខ្មែរយើងសម័យនោះគឺមានវប្បធម៌ អរិយធម៌យ៉ាងរីកចម្រើន និងសក្ដានុភាពខ្លាំង។
“យើងទទួលបានបទពិសោធ និងចំណេះដឹងល្អៗពីរមណីយដ្ឋានបុរាណនេះ ដូចជាដឹងពីឆ្នាំកសាង ពីប្រវត្តិសាស្ត្រប្រាសាទ និងពីរចនាបទនៃសំណង់ស្ថាបត្យកម្មខ្មែរពិតប្រាកដជាដើម។ មិនតែប៉ុណ្ណោះ បានឃើញដោយផ្ទាល់ភ្នែកពីជីវិតនាជនបទ”។ នេះជាការបញ្ជាក់បន្ថែមរបស់ គីមផាង។
គួរជម្រាបជូនថា នេះជាដំណើរទស្សនកិច្ចសិក្សាលើកទី១០៣ ដោយមានការចូលរួមពីសំណាក់សិស្សថ្នាក់ទី១១ គ្រប់សាខានៃសាលារៀន អន្តរទ្វីប អាមេរិកាំង។ មិនត្រឹមតែចុះកម្មសិក្សាប៉ុណ្ណោះទេ សិស្សថ្នាក់ទី១១ ទាំងនោះ ថែមទាំងឆ្លៀតពាំនាំយកនូវអំណោយផ្សេងៗរួមមានទាំងសម្ភារៈសិក្សា និងនំចំណីជាដើមផងនោះ ទៅចែកជូនដល់សិស្សប្រមាណជាង៤០០នាក់ នៅសាលាបឋមសិក្សាដុង ស្ថិតក្នុងស្រុកសំរោង ខេត្តតាកែវ ដើម្បីបង្ហាញពីទឹកចិត្តស្រឡាញ់រាប់អានរវាងគ្នានិងគ្នាផងដែរ៕
(អត្ថបទសាលា)
© រក្សាសិទ្ធិដោយ thmeythmey.com
