ខ្មែរក្រហម
ជាតិ
សហចៅក្រមស៊ើបអង្កេត លើកលែងបទចោទប្រឆាំងអ្នកស្រី អ៊ឹម ចែម
× សហចៅក្រមស៊ើបអង្កេត បានលើកលែងការចោទប្រកាន់ អ្នកស្រី អ៊ឹម ចែម អតីតអភិបាលស្រុកព្រះនេត្រព្រះ នាសម័យខ្មែរក្រហម នៅក្នុងសំណុំរឿង ០០៤/១ ។ ការលើកលែងបទចោទនេះ គឺបន្ទាប់ពីសហចៅក្រមស៊ើបអង្កេត បានចេញដីកា ដំណោះស្រាយ រួមគ្នានៅក្នុងកិច្ចដំណើរការនីតិវិធីប្រឆាំង អ៊ឹម ចែម នៅក្នុងសំណុំរឿងនេះ នៅថ្ងៃទី ២២ ខែ កុម្ភៈ ឆ្នាំ២០១៧ ។
បើតាមសេចក្តីប្រកាសព័ត៌មានរបស់សាលាក្តីខ្មែរក្រហម(អ.វ.ត.ក) ការលើកលែងបទចោទប្រកាន់លើអ្នក អ៊ឹម ចែកនេះ គឺផ្អែកលើការវាយតម្លៃរបស់សហចៅក្រមស៊ើបអង្កេត លើភស្តុតាងដែលប្រមូលបាន នៅក្នុងអំឡុងពេលស៊ើបសួរ អ៊ឹម ចែម មិនស្ថិតនៅក្រោមយុត្តាធិការបុគ្គលរបស់ អ.វ.ត.ក ឡើយ។ មានន័យថា អ៊ឹម ចែម មិនមែនជាមេដឹកនាំជាន់ខ្ពស់ ឬក៏ជាជនម្នាក់ក្នុងចំណោមមន្ត្រីដែលទទួលខុសត្រូវខ្ពស់បំផុតនៅក្នុងរបបខ្មែរក្រហមទេ។
ដោយសារបញ្ហាតឹងតែងផ្នែកភស្តុភារ និងថវិកានាពេលបច្ចុប្បន្ននេះ ប៉ះពាល់ដល់ពេលវេលាដែលចាំបាច់ ដើម្បីរៀបចំសេចក្តីព្រាងចុងក្រោយនៃដីកាដំណោះស្រាយជាភាសាអង់គ្លេស និងភាសាខ្មែរ និងដោយសារគិតដល់សិទ្ធិរបស់ជនត្រូវចោទដែលត្រូវទទួលបានសេចក្តីសម្រេចយ៉ាងឆាប់បំផុតតាមដែលអាចធ្វើទៅបាន ពីលទ្ធផលនៃកិច្ចដំណើរការនីតិវិធីប្រឆាំងជនត្រូវចោទនោះ ទើបពេលនេះ សហចៅក្រមស៊ើបអង្កេត បានសម្រេចចេញដីកាដំណោះស្រាយលើផ្នែកសេចក្តីសម្រេច ដោយមានសេចក្តីសង្ខេបអំពីសំអាងហេតុ។ ឯកសារដាច់ដោយឡែកមួយទៀត ដែលមានសំអាងហេតុពេញលេញ នឹងដាក់តាមក្រោយក្នុងពេលវេលាសមស្រប។
យោងតាមសេចក្តីប្រកាសព័ត៌មានដដែល ការលើកលែងការចោទប្រកាន់នេះ ក៏មានន័យថាពាក្យសុំតាំងខ្លួនជាដើមបណ្តឹងរដ្ឋប្បវេណីទាំងអស់ត្រូវបានបដិសេធ។ សហចៅក្រមស៊ើបអង្កេត បានចេញដីកាសម្រេចលើរឿងនេះ ក្នុងថ្ងៃតែមួយផងដែរ។
ដោយសារថាដីកាដំណោះស្រាយ មានលក្ខណៈជាការលើកលែងការចោទប្រកាន់ សំអាងហេតុសម្រាប់សេចក្តីសម្រេចនេះ និងដីកាសម្រេចលើពាក្យសុំតាំងខ្លួនជាដើមបណ្តឹងរដ្ឋប្បវេណី នឹងត្រូវរក្សាទុកជាឯកសារសម្ងាត់ រហូតដល់អង្គបុរេជំនុំជម្រះ សម្រេចបដិសេធដីកាលើកលែងការចោទប្រកាន់ និងបញ្ជូនទៅជំនុំជម្រះក្តី។
សហចៅក្រមស៊ើបអង្កេត នឹងរៀបចំ និងផ្សព្វផ្សាយសំណៅជាសាធារណៈ នៃសេចក្តីសន្និដ្ឋានផ្លូវច្បាប់ សំខាន់ៗពាក់ព័ន្ធបញ្ហាយុត្តាធិការបុគ្គលនៅពេលចេញសេចក្តីសំអាងហេតុពេញលេញ។
សូមបញ្ជាក់ថាក្នុងសំណុំរឿង០០៤ បទចោទប្រកាន់លើអ្នកស្រី អ៊ឹម ចែម អតីតអភិបាលស្រុកព្រះនេត្រព្រះ នាសម័យខ្មែរក្រហម មានអំពើមនុស្សឃាតដែលជាការរំលោភបំពានក្រមព្រហ្មទណ្ឌកម្ពុជាឆ្នាំ១៩៥៦ ដែលបានប្រព្រឹត្តនៅមន្ទីរសន្តិសុខភ្នំទ្រយោង និងការដ្ឋានស្ពានស្រែង។ ក្នុងនោះក៏មានដែរ ឧក្រិដ្ឋកម្មប្រឆាំងនឹងមនុស្សជាតិ ដែលរួមមានការធ្វើមនុស្សឃាត ការសម្លាប់រង្គាល ការធ្វើឲ្យទៅជាទាសករ ការដាក់ក្នុងមន្ទីរឃុំឃាំង ការធ្វើទុកបុកម្នេញដោយមូលហេតុនយោបាយ និងអំពើអមនុស្សធម៌ផ្សេងទៀត៕
Tag:
អ៊ឹម ចែម
អ.វ.ត.ក
© រក្សាសិទ្ធិដោយ thmeythmey.com