អន្តរជាតិ
យូនីសែហ្វ៖ កុមារ១,៤លាននាក់ ប្រឈមនឹងការស្លាប់ដោយសារទុរ្ភិក្សនៅឆ្នាំ២០១៧
× អង្គការយូនីសែហ្វ បានចេញសេចក្តីប្រកាសព័ត៌មានកាលពីថ្ងៃទី២១ ខែកុម្ភៈ ថា កុមារជិត១,៤លាននាក់ប្រឈមនឹងការស្លាប់នៅឆ្នាំ២០១៧នេះ ដោយសារទុរ្ភិក្ស បញ្ហាកង្វះអាហារូបត្ថម្ភធ្ងន់ធ្ងរស្រួចស្រាវ ជាពិសេសកុមារនៅក្នុងប្រទេសនីហ្សេរីយ៉ា សូម៉ាលី ស៊ូដង់ខាងត្បូង និងយេម៉ែន។
លោក Anthony Lake នាយកប្រតិបត្តិយូនីសែហ្វ បានលើកឡើងថា មនុស្សទាំងអស់ត្រូវធ្វើសកម្មភាពមនុស្សធម៌រួមគ្នាឲ្យបានលឿនបំផុតដើម្បីជួយសង្គ្រោះជីវិតកុមារជាង១លាននាក់។ លោកបានសង្កត់ធ្ងន់ថា៖ «យើងនៅតែអាចសង្គ្រោះជីវិតមនុស្សជាច្រើន។ កង្វះអាហារូបត្ថម្ភធ្ងន់ធ្ងរ ឬទុរភឹក្ស សុទ្ធតែកើតចេញពីមនុស្ស។ យើងមិនត្រូវឲ្យមហន្តរាយបែបនេះ កើតឡើងវិញសារជាថ្មីដូចជាគ្រោះទុរ្ភិក្សឆ្នាំ២០១១នៅអាហ្វ្រិកនោះឡើយ»។
តាមយូនីសែហ្វ ចំនួនកុមារដែលខ្វះអាហារូបត្ថម្ភនៅភាគខាងជើងនីហ្សេរីយ៉ា អាចឡើងដល់៤៥០ ០០០នាក់នៅឆ្នាំនេះ ជាពិសេសនៅរដ្ឋដែលមានជម្លោះប្រដាប់អាវុធ ដូចជា Adamawa, Borno និង Yobi។
នៅសូម៉ាលី គ្រោះរាំងស្ងួតកំពុងធ្វើការកំហែងនៅតំបន់ដែលមានជម្លោះដ៏រ៉ាំរ៉ៃ។ ពលរដ្ឋប្រមាណ៦,២លាននាក់ ប្រឈមនឹងការបញ្ហាសុវត្ថិភាពចំណីអាហារ និងត្រូវការជំនួយមនុស្សធម៌។ ចំនួនកុមារនៅសូម៉ាលីពី១៨៥ ០០០នាក់ ទៅ២៧០ ០០០នាក់ ប្រឈមកាន់តែខ្លាំងនឹងបញ្ហាអាហារូបត្ថម្ភ។
នៅស៊ូដង់ខាងត្បូង ដែលជាប្រទេសពោរពេញទៅដោយជម្លោះ ភាពក្រីក្រ និងអសន្តិសុខ កុមារជាង២៧០ ០០០នាក់ មិនមានការចិញ្ចឹមបីបាច់គ្រប់គ្រាន់ឡើយ។ គ្រោះទុរ្ភិក្សកំពុងយាយីនៅតំបន់កណ្តាល ភាគខាងជើងនៃប្រទេស។
រីឯនៅយេម៉ែន ជម្លោះដែលបង្កឡើងនារយៈពេល២ឆ្នាំចុងក្រោយនេះ នាំឲ្យកុមារប្រមាណ៤៦២ ០០០នាក់ កំពុងរងនូវការខ្វះខាតអាហារូបត្ថម្ភធ្ងន់ធ្ងរស្រៀវស្រាវ ពោលគឺកើនឡើងដល់ទៅ២០០ភាគរយ បើគិតចាប់តាំងពីឆ្នាំ២០១៤ មក៕
Tag:
យូនីសែហ្វ
ទុរ្ភិក្ស
អាហារូបត្ថម្ភ
© រក្សាសិទ្ធិដោយ thmeythmey.com