ក្រសួងការបរទេស ចាត់ទុកការរិះគន់របស់អាមេរិក ផ្អែកលើការសង្ស័យគ្មានមូលដ្ឋានច្បាស់លាស់

ជាតិ

នយោបាយជាតិ

ក្រសួងការបរទេស ចាត់ទុកការរិះគន់របស់អាមេរិក ផ្អែកលើការសង្ស័យគ្មានមូលដ្ឋានច្បាស់លាស់

22, Feb 2017 , 6:36 pm

រូបភាព

ដោយ: ថ្មីៗ

ភ្នំពេញ៖ រដ្ឋាភិបាល ចាត់ទុកការរិះគន់របស់រដ្ឋាភិបាលអាមេរិក ចំពោះខ្លឹមសារវិសោធនកម្មច្បាប់ស្តីពីគណបក្សនយោបាយនោះ គឺជាការសង្ស័យដែលគ្មានមូលដ្ឋានច្បាស់លាស់ ក្នុងគោលបំណងជ្រៀតជ្រែកកិច្ចការផ្ទៃក្នុងកម្ពុជា ។ រដ្ឋាភិបាលអាមេរិក បានរិះគន់វិសោធនកម្មច្បាប់នេះថា បង្កើតឡើងដើម្បីផ្ដល់អំណាចយ៉ាងធំដល់រាជរដ្ឋាភិបាលកម្ពុជា។

ក្រសួងការបរទេស និងសហប្រតិបត្តិការអន្តរជាតិ បានសម្ដែងការខកចិត្ត នៅពេលឃើញប្រតិកម្មមិនសមហេតុផលរបស់អាមេរិក ចំពោះការធ្វើវិសោធនកម្មច្បាប់ស្តីពីគណបក្សនយោបាយនេះ។ ក្រសូង យល់ឃើញថា អាមេរិកដែលកំពុងរិះគន់មកលើរដ្ឋាភិបាលកម្ពុជា គឺគ្រាន់តែជាការសង្ស័យដោយគ្មានមូលដ្ឋាន ជាជាងយុត្តិកម្មពិតប្រាកដប្រកបដោយហេតុផល ដែលមិនអាចឲ្យរដ្ឋាភិបាលទទួលយកបានឡើយ។

ឆ្លើយតបនឹងការរិះគន់របស់អាមេរិកនេះ ក្រសួងការបរទេស បានចេញសេចក្ដីថ្លែងការណ៍ដូច្នេះថា៖«ច្បាប់ដែលបានធ្វើវិសោធនកម្មនេះ មិនមានការគំរាមកំហែងណាមួយដល់គ្រឹះនៃប្រព័ន្ធពហុបក្ស ដែលបានកំណត់នៅក្នុងរដ្ឋធម្មនុញ្ញឡើយ។ ក៏ដូចជានៅតាមបណ្ដាប្រទេសកាន់លទ្ធិប្រជាធិបតេយ្យនានាដែរ ច្បាប់ដែលបានធ្វើវិសោធនកម្មនេះ មានគោលបំណងទប់ស្កាត់ការរំលោភបំពាន ដែលមិនស្របគោលការណ៍គ្រឹះនៃលទ្ធិប្រជាធិបតេយ្យ ដូចជាការញុះញង់ឲ្យមានការស្អប់ជាតិសាសន៍ ការបង្ខូចកេរ្តិ៍ឈ្មោះ ការបំផ្លិចបំផ្លាញដល់គ្រឹះសង្គមរបស់ប្រជាជាតិ។ ទាំងនេះជាកាត្វកិច្ចដែលមិនអាចរំលោភបំពានបានរបស់រដ្ឋាភិបាល ក្នុងការការពារថ្លៃថ្នូររបស់ស្ថាប័នដែលកំពុងស្ថិតស្ថេរ នាពេលបច្ចុប្បន្ន»។

បន្ថែមពីលើនេះ ក្រសួងការបរទេស បានអះអាងថា លទ្ធិប្រជាធិបតេយ្យរបស់កម្ពុជា គឺផ្អែកលើឆន្ទៈរបស់ប្រជាជនកម្ពុជា មិនមែនចំណូលចិត្តរបស់រដ្ឋាភិបាលបរទេសណាមួយឡើយ។ រដ្ឋាភិបាល ក៏មិនអាចទទួលយកការជ្រៀតជ្រែក ឬការរំលោភបំពានណាមួយ ចូលកិច្ចការផ្ទៃក្នុងខ្លួន ទោះបីក្រោមរូបភាពផ្ទាល់ និងប្រយោលក្តី។ ហើយរដ្ឋាភិបាល នឹងចាត់វិធានការសមស្របគ្រប់បែបយ៉ាង ដើម្បីបញ្ចប់ការជ្រៀតជ្រែកទាំងនេះ និងរាល់សកម្មភាពដែលផ្ទុយពីរដ្ឋធម្មនុញ្ញ និងច្បាប់របស់ប្រទេសកម្ពុជា។

ទាក់ទងនឹងខ្លឹមសារនៃការធ្វើវិសោធនកម្មនេះដែរ សម្ដេចនាយករដ្ឋមន្ត្រី ហ៊ុន សែន ក៏បានប្រាប់ទៅបណ្ដារដ្ឋាភិបាលបរទេស កុំឲ្យមានការរិះគន់បែបប៉ុនប៉ងជ្រៀតជ្រែកចូលកិច្ចការផ្ទៃក្នុងប្រទេសកម្ពុជាផងដែរ។ ថ្លែងនៅក្នុងពិធីចែកសញ្ញាបត្រដល់និស្សិតសាកលវិទ្យាអន្តរជាតិ នៅព្រឹកនេះ សម្ដេច ហ៊ុន សែន បានអះអាងថា ច្បាប់ដែលរដ្ឋសភាបានអនុម័តនេះ មិនមែនបង្កើតមកដើម្បីសម្លាប់ប្រជាជន និងបង្កឲ្យបែកបាក់ឯកភាពជាតិ ដូចមតិរិះគន់កន្លងមកនោះទេ។

កាលពីថ្ងៃទី ២០ ខែកុម្ភៈ រដ្ឋាភិបាលអាមេរិក បានចេញសេចក្តីថ្លែងការណ៍ ដោយព្រួយបារម្ភពីសេចក្តីស្នើវិសោធនកម្មច្បាប់គណបក្សនយោបាយថា៖ « វិសោធនកម្មនេះ បានផ្តល់អំណាចយ៉ាងធំដល់រាជរដ្ឋាភិបាលកម្ពុជា ក្នុងការដាក់កំហិតដល់សេរីភាពក្នុងការបញ្ចេញមតិ និងសកម្មភាពច្បាប់នានារបស់គណបក្សនយោបាយ ហើយស្ថិតនៅក្រោមកាលៈទេសៈមិនច្បាស់លាស់ណាមួយ គឺរំលាយគណបក្សនយោបាយតែម្តង»។

ចំណែកអង្គការសមាជិកសភាអាស៊ានដើម្បីសិទ្ធិមនុស្ស (APHR) ក៏បានចេញសេចក្តីថ្លែងការណ៍ថ្កោលទោសដោយចាត់ទុកថា ការធ្វើវិសោធនកម្មថ្មីនេះ ជាការស្លាប់នៃលទ្ធិប្រជាធិបតេយ្យនៅកម្ពុជា៕