ជាតិ
សេដ្ឋកិច្ច
ករណីថៃដំឡើងពន្ធត្រី៖អ្នកនាំពាក្យថា អាជីវករខ្មែរចៀសវាងធ្វើសកម្មភាពដែលកាន់តែខាតបង់
× ភ្នំពេញ៖ អ្នកនាំពាក្យក្រសួងពាណិជ្ជកម្ម លោកស្រី សឹង សុផារី មានប្រសាសន៍ថា ការដែលអាជីវករខ្មែរចាក់ត្រីចោលដើម្បីតវ៉ានឹងអាជ្ញាធរថៃ រឿងដំឡើងពន្ធគយលើការនាំត្រីចូលប្រទេសថៃនោះ គឺជាសកម្មភាពដែលនាំឲ្យពួកគាត់កាន់តែខាតបង់។ អ្នកនាំពាក្យរូបនេះថា ដំណោះស្រាយមានតែពឹងលើការចរចាសុំការសម្បទានពីភាគីថៃ។
នៅថ្ងៃទី២៣ខែកុម្ភៈម្សិលមិញ ក្រុមអាជីវករខ្មែរដែលនាំត្រីទៅលក់ក្នុងទឹកដីប្រទេសថៃ បានខឹងសម្បានឹងការដំឡើងថ្លៃភាស៊ីគយរបស់អាជ្ញាធរថៃ និងបានចាក់ត្រីចោលលើស្ពានច្រកព្រំដែនប៉ោយប៉ែត។ ហើយនៅថ្ងៃនេះ អាជីវករបន្តការតវ៉ានៅទីតាំងដដែលនេះ។
លោកស្រី សឹង សុផារី បានថ្លែងប្រាប់សារព័ត៌មានថ្មីៗថា អាជីវករមិនគួរជំរុញសកម្មភាពឲ្យខ្លួនឯងកាន់តែខាតបង់នោះទេ ខណៈអាជ្ញាធរថៃព្យាយាមដំឡើងពន្ធនាំចូលដូចនេះ ដើម្បីបង្កើនចំណូលថវិកាជាតិរបស់គេ។ «អ្វីដែលគេចាត់វិធានការមក គឺដើម្បីបង្កើនចំណូលរបស់គេអ៊ីចឹងឯង។ ដល់យើងធ្លាប់ពីដើមមក ទទួលអត្រាពន្ធទាប ដល់ពេលគេដំឡើង យើងប្រតិកម្មទៅចាក់ចោលដូចនេះ តាមចិត្តខឹងរបស់យើងចេះតែអាចធ្វើបាន តែសួរថាគេឈឺក្បាលជាមួយយើងដែរឬអត់?»។ នេះជាការថ្លែងរបស់លោកស្រី សុផារី ។
ចំពោះដំណោះស្រាយលើការដំឡើងពន្ធនេះ លោកស្រី សឹង សុផារី អះអាងថា មានតែត្រូវរង់ចាំការចរចារវាងអាជ្ញាធរ នៃភាគីកម្ពុជា និងថៃប៉ុណ្ណោះ។ លោស្រីឲ្យដឹងយ៉ាងដូច្នេះថា៖«ត្រូវពឹងលើការចរចា ឯការចរចាបានកម្រិតណា យើងត្រូវទទួលយកតាមស្ថានភាពជាក់ស្ដែង»។ លោកស្រីបន្តថា៖«ដើម្បីទប់ទល់នឹងស្ថានភាពបែបនេះ យើងគួរនៅស្ងាត់ៗសិន កុំជំរុញឲ្យខាតអ្វីកាន់តែច្រើនទៀត។ ជាធម្មតាស្ថាប័នពាក់ព័ន្ធ នឹងចាត់វិធានការ ចរចាជាមួយគេ»។ អ្នកនាំពាក្យរូបនេះបន្ថែមថា ក្រៅពីការចចារកដំណោះស្រាយ រវាងអាជ្ញាធរនៃភាគីទាំង២ នៅថ្នាក់ក្រោមជាតិ បញ្ហាដំឡើងពន្ធនាំចូលនេះ អាចនឹងក្លាយជារបៀបវារៈ នៅក្នុងកិច្ចប្រជុំថ្នាក់ជាតិ នៅពេលដែលគណៈកម្មាការចម្រុះកម្ពុជា-ថៃ រៀបចំកិច្ចប្រជុំនៅពាក់កណ្ដាលឆ្នាំនេះ។ លោកស្រីប្រាប់ថា ការស្វែងរកកិច្ចចរចានេះ គឺដើម្បីទទួលបានការសម្បទានណាមួយពីភាគីថៃ។
អ្នកនាំពាក្យរូបនេះ បញ្ជាក់ទៀតថា ការដែលរដ្ឋាភិបាលថៃដំឡើងពន្ធដូចនេះ ក៏ដើម្បីការពារផលិតផលក្នុងស្រុករបស់គេផងដែរ។ លោកស្រីបន្តថា៖«ពេលខ្លះ យើងរស់ពឹងអាស្រ័យលើទីផ្សារគេ មិនទៀងទាត់ទេ គឺយើងនឹងជួបរឿងដូច្នេះឯង ព្រោះគេមានវិស័យរបស់គេដែលត្រូវការពារ»។
បើតាមសារព័តមានក្នុងស្រុកមួយចំនួនដែលបានស្រង់សម្តីអាជីវករលក់ត្រីទាំងនោះ ត្រីមួយខេងសណ្ដោងប្រមាណ ២០០គីឡូក្រាម គយថៃធ្លាប់យកថ្លៃពន្ធពី ៣០០បាត ទៅ៤០០បាត តែពេលថ្មីៗនេះ គយថៃបានដំឡើងថ្លៃពន្ធនេះ ដល់ ១,៥០០បាត។
យោងតាមការសែតបាងកកប៉ុស្តិ៍ ដែលបានស្រង់សម្តីលោក Pattanapong sae Lim ប្រធានត្រួតពិនិត្យកិច្ចការព្រំដែនមួយកន្លែងនៅប្រទេសថៃ ការដំឡើងពន្ធនាំចូលត្រីទៅទីផ្សារថៃនេះ គឺជារឿងចាំបាច់ ព្រោះអាជីវករ និងអ្នកជំនួញត្រីនៅប្រទេសថៃ បានត្អូញត្អែរថា ត្រីស្រស់នាំចូលពីកម្ពុជា កំពុងកាន់កាប់ទីផ្សារក្នុងស្រុកថៃ និងបានធ្វើឲ្យតម្លៃត្រីនៅថៃធ្លាក់ចុះ។មន្ត្រីព្រំដែនថៃរូបនេះ ឲ្យដឹងទៀតថា ចាប់ពីថ្ងៃសុក្រស្អែកនេះតទៅ អាជ្ញាធរចាប់អនុវត្តន៍ យកថ្លៃពន្ធត្រីនាំចូលពីកម្ពុជា ១២បាតក្នុង១គីឡីក្រាម ដោយគ្មានការលើកលែង៕
Tag:
ត្រី
ពន្ធគយ
សឿង សុផារី
នាំចេញទៅថៃ
© រក្សាសិទ្ធិដោយ thmeythmey.com