អន្តរជាតិ
លោក ពូទីនថា ការបញ្ជូននាវាដឹកយន្តហោះចម្បាំងទៅស៊ីរីកម្ទេចភេរវជន ជាគំនិតលោកផ្ទាល់
× ប្រធានាធិបតីរុស្ស៊ីលោក វ្ល៉ាឌីមៀ ពូទីន បានអះអាងថា ការបញ្ជូននាវាដឹកយន្តហោះទៅកាន់ស៊ីរីដើម្បីកម្ចាត់ក្រុមភេរវជនជាគំនិតរបស់លោកផ្ទាល់។ លោកក៏បានពន្យល់ថា លោកមិនចង់លួកលាន់ក្នុងកិច្ចការផ្ទៃស៊ីរីទេតែលោកចង់កម្ចាត់ក្រុមភេរវជនអន្តរជាតិប៉ុណ្ណោះ។
ការបញ្ជូនកងទ័ពនិងនាវាដឹកយន្តហោះចម្បាំងរុស្ស៊ីមួយគ្រឿង Admiral Kuznetsov ទៅកាន់សមុទ្រម៉េឌីទែរ៉ាណេក្នុងប្រតិបត្តិការនៅក្នុងទឹកដីស៊ីរីកន្លងទៅជាគំនិតរបស់ប្រធានាធិបតីរុស្ស៊ីលោក វ្ល៉ាឌីមៀ ពូទីនផ្ទាល់។
សូមស្តាប់សំឡេង៖
ប្រធានាធិបតីរុស្ស៊ី បានបញ្ជាក់ដូច្នេះក្នុងពេលដែលលោកជួបជាមួយបណ្តាមន្ត្រីសន្តិសុខដែលចូលរួមបំពេញប្រតិបត្តិការនៅស៊ីរីកន្លងមក។ លោកបានសរសើរមន្ត្រីទាំងនោះដែលបានបំពេញការងារបានល្អ ព្រោះពួកគេបានចូលរួមចំណែកដោះស្រាយបញ្ហាភេរវកម្មអន្តរជាតិ។
យោងតាមសារព័ត៌មានរុស្ស៊ី RT លោកពូទីន បានថ្លែងទៅកាន់មន្ត្រីសន្តិសុខទាំងអស់នោះថា៖«អ្នកបានបំពេញការងារចប់សព្វគ្រប់ដែលបានកំណត់ឲ្យ ហើយក៏បានបំផ្លាញក្រុមភេរវជនអន្តរជាតិដោយកម្ទេចមូលដ្ឋានពួកគេ,ឃ្លាំងគ្រាប់, សព្វាវុធ, និងរចនាសម្ព័ន្ធនានារបស់ក្រុមនេះផង»។
បន្ថែមពីនេះ មេដឹកនាំរុស្ស៊ីរូបនេះក៏បានថ្លែងអំណរគុណដល់បណ្តាមន្ត្រីរុស្ស៊ីដែលមានវត្តមានក្នុងកិច្ចប្រជុំព្រោះពួកគេបានជួយធានាសន្តិសុខផ្ទៃក្នុងរុស្ស៊ីផ្ទាល់។លោកលើកយករបាយការណ៍ចារកម្មមួយជាសម្អាង ដោយបង្ហាញថា ប្រជាជនរុស្ស៊ីប្រហែលជា ៤០០០នាក់ និង ប្រជាជននៃអតីតរដ្ឋសហភាពសូវៀតផ្សេងទៀតចំនួន ៥០០០នាក់បាននាំគ្នាឆ្លងដែនទៅចូលរួមជាមួយក្រុមភេរវជននៅស៊ីរី។
យ៉ាងណាក៏ដោយ ពាក់ព័ន្ធការបញ្ជូនកងទ័ពនិងនាវាដឹកយន្តហោះទៅស៊ីរី លោក ពូទីន បានពន្យល់បន្ថែមថា រុស្ស៊ីមិនមែនព្យាយាមលូកលាន់ និងកកូរកកាយកិច្ចការផ្ទៃក្នុងស៊ីរីឡើយ តែលោកគ្រាន់តែមានគោលដៅកម្ចាត់ភេរវជនអន្តរជាតិប៉ុណ្ណោះ។ ហើយគោលបំណងសំខាន់បំផុតរបស់លោក គឺធានាស្ថិរភាពនៃរដ្ឋាភិបាលស្របច្បាប់ស៊ីរី និងបញ្ចប់ចលនាភេរវកម្មដែលបំផ្លាញសន្តិសុខស៊ីរីកន្លងមក។
បុរសខ្លាំងរុស្ស៊ីរូបនេះបានបញ្ជាក់ដូច្នេះ៖« គោលដៅរបស់យើងគឺជួយធ្វើឲ្យរដ្ឋាភិបាលស្របច្បាប់របស់ស៊ីរីមានស្ថិរភាពនិងមានលទ្ធភាពកម្ទេចឲ្យអស់នូវបណ្តាក្រុមភេរវជនអន្តរជាតិ។ឆាប់ៗខាងមុខនេះ ស៊ីរីនឹងចាប់ផ្តើមអនុវត្តដំណោះស្រាយនយោបាយដែលវាបង្កើតឱកាសច្រើនសម្រាប់សហគមន៍អន្តរជាតិក្នុងការចូលរួមបោសសម្អាតក្រុមភេរវជនពីទឹកដីស៊ីរី»។
ប៉ុន្តែមន្ត្រីដែលបានចូលរួមក្នុងប្រតិបត្តិការស៊ីរី បានប្រាប់ថាលោក ពូទីន ថា ក្នុងពេលធ្វើដំណើរឆ្ពោះទៅកាន់ស៊ីរី និងពេលត្រឡប់មកវិញ នាវាចម្បាំងបក្សសម្ព័ន្ធយោធាណាតូយ៉ាងហោចណាស់ ៨គ្រឿងតាមពីក្រោយក្រុមនាវារបស់រុស្ស៊ី។ វាហាក់បីដូចជាបង្ហាញឲ្យឃើញថា បណ្តាលោកខាងលិចហាក់មិនសូវសប្បាយយចិត្តដែលឃើញវត្តមានកងទ័ពរុស្ស៊ីនៅបរទេសឡើយ៕
Tag:
វ្ល៉ាឌីមៀ ពូទីន
Admiral Kuznetsov
រុស្ស៊ី
ស៊ីរី
© រក្សាសិទ្ធិដោយ thmeythmey.com