មន្ត្រីជាន់ខ្ពស់អាមេរិកបានលើកឡើងលទ្ធផលវិជ្ជមានកើតមានច្រើនពាក់ព័ន្ធការយុទ្ធនាការប្រយុទ្ធប្រឆាំងការជួញដូរសត្វព្រៃឆ្លងដែននៅតំបន់អាស៊ីក្នុងរយៈពេលចុងក្រោយ។ ប៉ុន្តែ ថ្វីបើដំណើរការនៃយុទ្ធនាការប្រឆាំងការជួញដូរសត្វព្រៃហុចផលល្អនិងមានការវិវត្តទៅមុខរហ័សក៏ដោយ វានៅតែស្ថិតលើផ្លូវវែងឆ្ងាយទៀតសម្រាប់ប្រទេសក្នុងតំបន់ដើម្បីធានាថា ទីផ្សារងងឹតសម្រាប់ការជួញដូរសត្វព្រៃលែងមានទៀត។
ក្នុងសន្និសីទសារព័ត៌មានស្តីពីការប្រឆាំងការជួញដូរសត្វព្រៃខុសច្បាប់ថ្ងៃទី ៣មីនា ឧបការីរងរដ្ឋមន្ត្រីការបរទេស Daniel Foote ប្រចាំការិយាល័យប្រឆាំងញៀនអន្តរជាតិនិងអនុវត្តច្បាប់នៃក្រសួងការបរទេសអាមេរិក បានកត់សម្គាល់ថា ប្រទេសក្នុងតំបន់អាស៊ីបានប្រឹងប្រែងសម្រេចបាននូវលទ្ធផលវិជ្ជមានច្រើនក្នុងការប្រឆាំងការជួញដូរសត្វព្រៃខុសច្បាប់ក្នុងរយៈពេលប៉ុន្មានឆ្នាំចុងក្រោយ។
លោក Daniel Foote បានលើកឡើងដូច្នេះថា៖« យើងមើលឃើញច្បាស់ពីការវិវត្តប្រកបដោយភាពវិជ្ជមានពាក់ព័ន្ធការប្រយុទ្ធប្រឆាំងការជួញដូរសត្វព្រៃខុសច្បាប់នៅក្នុងតំបន់អាស៊ីអាគ្នេយ៍។ និន្នាការវិជ្ជមានដ៏ធំមួយគឺប្រជាជននៅក្នុងតំបន់អាស៊ានទទួលស្គាល់ថា ការជួញដូរសត្វព្រៃឆ្លងដែនជារឿងធ្ងន់ធ្ងរដែលចាំបាច់ត្រូវដោះស្រាយ»។
ឆ្លើយតបតបសំណួរអ្នកសារព័ត៌មានថ្មីៗពាក់ព័ន្ធការវិវត្តប្រកបដោយភាពវិជ្ជមាននោះ លោក Daniel Foote បានរៀបរាប់ថា ចំណុចវិជ្ជមានទាំងនោះមានដូចជា ចំណាត់ការរបស់វៀតណាមក្នុងការទប់ស្កាត់ការជួញដូរសត្វព្រៃខុសច្បាប់, និងការប្រឹងប្រែងរបស់មហាយក្សចិនក្នុងការបង្ក្រាបទីផ្សារងងឹតក្នុងទឹកដីខ្លួន ក៏ដូចជាការចូលរួមយ៉ាងសកម្មភាពផ្សព្វផ្សាយនិងបង្ក្រាបការជួញដូរសត្វព្រៃរបស់ប្រទេសអាស៊ានដែរ។
«ចំណុចមួយ គឺកាលពីថ្មីៗនេះ ចិនបានបញ្ចេញកាលវិភាគមួយជាក់លាក់ក្នុងការបិទឲ្យបាននូវទីផ្សាភ្លុកសត្វដំរីក្នុងស្រុករបស់ខ្លួន។ បើសិនជាចិនអាចធ្វើតាមគោលនយោបាយរបស់ខ្លួនបាន វានឹងមានផលប៉ះពាល់លើទីផ្សារភ្លុកដំរីជាក់ជាមិនខាន។ ដូច្នេះវានឹងមិនមានការជួញដូរសត្វព្រៃខុសច្បាប់ទៀតទេ»។ នេះជាការបញ្ជាក់របស់លោក Daniel Foote។
ចិនត្រូវបានគេស្គាល់ថា ជាទីផ្សារធំផុតសម្រាប់ផលិតផលសត្វព្រៃខុសច្បាប់នេះ ជាពិសេសភ្លុកដំរី និងកុយសត្វរមាសតែម្តង។ ភ្លុកដំរីនិងកុយរមាសរាប់តោនត្រូវបានគេនាំចូលទៅកាន់ប្រទេសចិននេះដោយសារវាមានតម្លៃការខ្ពស់និងអាចលក់បានតម្លៃថ្លៃផងដែរ។
លោកបន្តថា៖«មួយទៀត គឺវៀតណាមបានរៀបចំសន្និសីទអន្តរជាតិស្តីពីសត្វព្រៃកាលពីខែវិច្ឆិកាឆ្នាំមុន ហើយប្រទេសនេះក៏បានកម្ទេចចោលឃ្លាំងផ្ទុកភ្លុកដំរីនិងកុយរមាសខុសច្បាប់ច្រើន ២តោនឯណោះ។ ហើយមួយវិញទៀត ក្នុងរយៈពេលប៉ុន្មានខែចុងក្រោយ យើងក៏ឃើញមានរបាយការណ៍ស្តីពីការរឹបអូសទំនិញសត្វព្រៃខុសច្បាប់នៅក្នុងតំបន់រួមទាំងនៅប្រទេសវៀតណាមនិងកម្ពុជាផងដែរ»។
ស្របពេលដែលមានការលើកសរសើរពីការវិវត្តយ៉ាងរហ័សប្រកបដោយភាពវិជ្ជមានក្នុងការបង្ក្រាបការជួញដូរសត្វព្រៃខុសច្បាប់ មន្ត្រីជាន់ខ្ពស់ខាងលើក៏បានសង្កត់ធ្ងន់ផងដែរថា វាស្ថិតនៅលើផ្លូវវែងឆ្ងាយទៀតដើម្បីកាត់បន្ថយការជួញដូរសត្វព្រៃនេះឲ្យអស់។ លោកផ្តល់អនុសាសន៍ថា បណ្តាប្រទេសនានានៅក្នុងតំបន់ត្រូវបន្តការប្រឹងប្រែងរបស់ខ្លួននេះទៀតជាពិសេសបង្កើនការផ្សព្វផ្សាយលើកកម្ពស់ការយល់ដឹងនិង សមត្ថភាពក្នុងការអនុវត្តច្បាប់ជាដើម។
«មន្ត្រីគយត្រូវបន្តការងាររបស់ខ្លួនបានល្អដោយកំណត់មុខសញ្ញានៃការដឹកជញ្ជូនសត្វព្រៃខុសច្បាប់នៅតាមកំពង់ផែ និងតាមច្រកព្រំដែន ហើយ ការបន្តការស៊ើបអង្កេត, ចាប់ខ្លួន និងកាត់ទោសរាល់ក្រុមឈ្មួញដែលនាំសត្វព្រៃខុសច្បាប់ទាំងនោះឲ្យបានក៏ជាអ្វីដែលយើងត្រូវការខ្លាំងដែរ»៕