លោកស្រី ភឿង សកុណា៖ សាលារចនាថ្មី នៅតែរក្សារចនាប័ទ្ម និងអត្តសញ្ញាណវប្បធម៌ខ្មែរ

ជាតិ

សិល្បះ

លោកស្រី ភឿង សកុណា៖ សាលារចនាថ្មី នៅតែរក្សារចនាប័ទ្ម និងអត្តសញ្ញាណវប្បធម៌ខ្មែរ

09, Mar 2017 , 2:50 pm

រូបភាព

ដោយ: ខន ចំប៉ា

លោកស្រី ភឿង សកុណា បានអះអាងប្រាប់សារព័ត៌មានថ្មីៗថា សាលារចនាថ្មី នៅតែរក្សានូវរចនាប័ទ្ម ខ្មែរ រក្សាអត្តសញ្ញាណវប្បធម៌ និងទម្រង់បែបបត់ជារបស់ខ្មែរ។ បន្ថែមពីនេះ រដ្ឋមន្ត្រីក្រសួងវប្បធម៌ និងវិចិត្រសិល្បៈ ក៏បានប្រាប់ឲ្យសាធារណជនរីករាយ ចំពោះការប្តូរទីតាំងនេះ ពីព្រោះវានឹងជួយឲ្យវិស័យវប្បធម៌ខ្មែរ ប្រសើរឡើង។

សកលវិទ្យាល័យភូមិន្ទវិចិត្រសិល្បៈ ឬសាលារចនា នឹងត្រូវពង្រីកជាសារមន្ទីរជាតិ ហើយសាលារចនាចាស់នេះ នឹងប្តូរទីតាំងទៅតំបន់ជ្រោយចង្វារនៅក្នុងពេលឆាប់ៗខាងមុខ។

លោកស្រី ភឿង សកុណា បានបញ្ជាក់ប្រាប់សារព័ត៌មានថ្មីៗ ពីដំណើរការខ្លះៗ នៃការសង់សាលារចនាថ្មីនេះ។ បើតាមលោកស្រីរដ្ឋមន្ត្រីក្រសួងវប្បធម៌ និងវិចិត្រសិល្បៈ សាស្ត្រាចារ្យនៃសកលវិទ្យាល័យយភូមិន្ទវិចិត្រសិល្បៈផ្ទាល់ ជាអ្នកគូរប្លង់សាលាថ្មីនេះ។ ដ្បិតតែមិនដូចទាំងស្រុង នឹងសាលារចនាចាស់ ប៉ុន្តែលោកស្រី សកុណា អះអាងថា គំរូសាលាថ្មី នៅតែរក្សាបាននូវរចនាប័ទ្មបែបខ្មែរ។ ប៉ុន្តែយ៉ាងណាក៏ដោយ ការគូរប្លង់នេះ នៅមិនទាន់បញ្ចប់ជាស្ថាពរនៅឡើយ។

លោកស្រី ភឿង សកុណា បញ្ជាក់ដូច្នេះថា៖ «តាមពិតក្រសួងវប្បធម៌ យើងជាអ្នកអភិរក្ស យើងមិនឲ្យបាត់បង់ទេ។ យើងនៅតែរក្សាទម្រង់ និងរចនាប័ទ្មខ្មែរ។ ហើយសាស្ត្រាចារ្យសកលវិទ្យាល័យជា ជាអ្នកចេញប្លង់សាងសង់ទៀត។ អ៊ីចឹងច្បាស់ណាស់ថា មានទម្រង់ បែបផែនជាខ្មែរ»។

រដ្ឋមន្ត្រីក្រសួងវប្បធម៌វិចិត្រសិល្បៈ ក៏បានដឹងថា មានអ្នកពេញចិត្ត និងអ្នកមិនពេញចិត្ត ចំពោះការប្តូរទីតាំងសាលារចនានេះ និងបានឆ្លៀតប្រាប់កុំឲ្យបារម្ភចំពោះរឿងនេះ។ ផ្ទុយទៅវិញ លោកស្រី បានប្រាប់ឲ្យសាធារណជនគួរតែសប្បាយចិត្ត ព្រោះវានឹងជួយឲ្យវិស័យវប្បធម៌ខ្មែរ ប្រសើរឡើង។ ត្រង់ន័យនេះ លោកស្រីរដ្ឋមន្ត្រី ពន្យល់ថា ការប្តូរទីតាំងនេះ ជាចេតនាល្អ ខណៈសាលាថ្មី ស្ថិតនៅទីតាំងធំទូលាយជាងមុន ដែលអាចទទួលសិស្សបានច្រើនបន្ថែមទៀត ហើយក្រសួង ក៏ចង់ឲ្យមានមុខវិជ្ជាទាក់ទងនឹងវប្បធម៌ច្រើនជាងបច្ចុប្បន្នដែរ។

លោកស្រី ភឿង សកុណា បន្ថែមថា ចំពោះសាលាចាស់ ត្រូវពង្រីកជាសារមន្ទីរជាតិមែន ប៉ុន្តែក្រសួងមិនប៉ះពាល់អគារសាលាចាស់នេះទេ គឺរក្សាទុកនៅដដែល ទាំងរោងជាង និងបណ្ណាល័យជាដើម។ សិស្សក៏អាចចុះកម្មសិក្សានៅសាលារចនាចាស់ ដើម្បីស្វែងយល់ពីសម្បត្តិបេតិកភណ្ឌរបស់ខ្មែរបានដែរ។ លោកស្រី ភឿង សកុណា ឆ្លៀតឆ្លើយតបទៅនឹងការបារម្ភរបស់សាធារណជនដូច្នេះថា៖«រឿងបារម្ភ យើងបារម្ភជាងគាត់ផង យើងប្រយ័ត្នជាងគាត់ផង រឿងរក្សាអត្តសញ្ញាណ របៀបរបប បែបបទខ្មែរនោះ»។

សាកលវិទ្យាល័យភូមិន្ទវិចិត្រសិល្បៈ ឬសាលារចនា ចាប់ផ្តើមសង់នៅក្នុងឆ្នាំ១៩១៧ ពោលគឺមានចំណាស់១០០ឆ្នាំហើយ។ សាកលវិទ្យាល័យនេះ មាន៥មហាវិទ្យាល័យ គឺមហាវិទ្យាល័យបុរាណវិទ្យា មហាវិទ្យាល័យវិចិត្រសិល្បៈសូនរូប មហាវិទ្យាល័យស្ថាបត្យកម្ម និងនគរោបនីយវិទ្យា មហាវិទ្យាល័យតូរ្យតន្ត្រី និងមហាវិទ្យាល័យសិល្បៈនាដសាស្ត្រ។

កាលពីថ្ងៃទី ៣ ខែមីនា សម្តេច ហ៊ុន សែន បានឯកភាពឲ្យអាជ្ញារធរ និងក្រសួងពាក់ព័ន្ធអនុវត្តគម្រោងនេះ រួចរាល់រយៈពេល ៣ឆ្នាំ ដើម្បីពង្រឹង និងពង្រីកគុណភាពអប់រំផ្នែកវប្បធម៌ និងវិចិត្រសិល្បៈកម្ពុជាឲ្យកាន់តែល្អប្រសើរ។ រដ្ឋាភិបាល នឹងចំណាយថវិកា ប្រមាណ១២លានដុល្លារ សង់សង់សាលាវិចិត្រសិល្បៈថ្មី នៅតំបន់ជ្រោយចង្វារ៕