ជាតិ
«ដូរមេឃុំបម្រើបក្ស ដាក់មេឃុំបម្រើរាស្ត្រ»៖ គជប មិនទាន់អាចមានចំណាត់ការលើពាក្យស្លោកCNRP ឡើយ លោក មាន សទិ អង្គុយនៅកណ្ដាល
× ភ្នំពេញ៖គណៈកម្មាធិការជាតិរៀបចំការបោះឆ្នោត (គ.ជ.ប) អះអាងថា ខ្លួនមិនទាន់អាចមានចំណាត់ការណាមួយ ចំពោះពាក្យស្លោកគណបក្សសង្គ្រោះជាតិ ដែលថា «ដូរមេឃុំបម្រើបក្ស ដាក់មេឃុំបម្រើរាស្ត្រ» នេះបានឡើយ ដោយរងចាំមើលការពិនិត្យតាមដាន សកម្មភាពឃោសនាបោះឆ្នោតនាពេលខាងមុខនេះសិន។ ការលើកឡើងរបស់គ.ជ.ប បែបនេះ ស្របពេលដែលគណបក្សប្រជាជនកម្ពុជា កំពុងរៀបចំដំណើរការនីតិវិធីប្ដឹងគណបក្សសង្គ្រោះជាតិ ទាក់ទងនឹងពាក្យស្លោកនេះ។
សមាជិកគណកម្មាធិការជាតិរៀបចំការបោះឆ្នោតលោក មាន សទិ បានបញ្ជាក់ថា គ.ជ.ប មិនទាន់អាចយកពេលគិតគូ និងដោះស្រាយទៅលើបញ្ហាពាក្យស្លោករបស់គណបក្សសង្គ្រោះជាតិនេះឡើយ ។ ប៉ុន្តែក៏មិនមែនមានន័យថា គ.ជ.ប ទុកបញ្ហាចម្រូងចម្រាសនៃពាក្យស្លោកនេះចោលដែរ។ ថ្លែងក្នុងសន្និសីទសារព័ត៌មាននៅព្រឹកថ្ងៃទី១០ មីនានេះ លោក មាន សទិ បាននិយាយថា «ទាល់តែដល់ដំណាក់កាលនៃការឃោសនាបោះឆ្នោតរយៈពេល១៤ថ្ងៃ ទើបគ.ជ.ប គិតពិចារណាលើពាក្យស្លោកនេះ ថាត្រូវឬក៏ខុស ឬក៏ប៉ះពាល់យ៉ាងម៉េច ដែលត្រូវដោះស្រាយ»។
ទាក់ទងនឹងបញ្ហាពាក្យស្លោក«ដូរមេឃុំបម្រើបក្ស ដាក់មេឃុំបម្រើរាស្ត្រ»របស់គណបក្សសង្គ្រោះជាតិនេះ បានធ្វើឲ្យគណបក្សប្រជាជនកម្ពុជា មិនសប្បាយចិត្តឡើយ។
គណបក្សកាន់អំណាច កំពុងតែដំណើរការនីតិវិធី ដើម្បីប្តឹងបក្សប្រឆាំង ដែលនៅតែបន្តប្រើពាក្យស្លោក «ដូរមេឃុំ បម្រើបក្ស ដាក់មេឃុំ បម្រើរាស្ត្រ»។ គណបក្សកាន់អំណាច ចាត់ទុកពាក្យស្លោកនេះថា ជាការញុះញង់។ ប៉ុន្តែគណបក្សប្រឆាំង ហាក់មិនអើពើនឹងការព្រមានប្តឹងរបស់បក្សកាន់អំណាចឡើយ ហើយគណបក្សសង្គ្រោះជាតិ ទំនងជារក្សាទុកពាក្យស្លោកខាងលើដដែល៕
© រក្សាសិទ្ធិដោយ thmeythmey.com