ជាតិ
សិល្បះ
មាន សូនីតា ត្រូវបានជ្រើសរើសតំណាងឲ្យការសំពះ និងការញញឹមបែបខ្មែរ ក្នុងស្ពតអង្គរសង្ក្រាន្ត
×![]()
ភ្នំពេញ៖ កញ្ញា មាន សូនីតា បានក្លាយជាតួឯកនៅក្នុងស្ពតផ្សព្វផ្សាយពីព្រឹត្តិការណ៍អង្គរសង្ក្រាន្តឆ្នាំ២០១៧នេះ។ ស្ពតអង្គរសង្ក្រាន្ត ដែលមានរយៈពេល ៣០វិនាទី និងដែលកំពុងចាក់ផ្សាយក្នុងទូរទស្សន៍CNN របស់សហរដ្ឋអាមេរិក បញ្ជាក់ពី ស្នាមញញឹម និងការសំពះបែបខ្មែរ។
នេះជាឆ្នាំទី៥ហើយ ដែលសហភាពសហព័ន្ធយុវជនកម្ពុជាបានរៀបចំព្រឹត្តិការណ៍អង្គរសង្ក្រាន្តឡើង។ កញ្ញា មាន សូនីតា ដែលគេស្គាល់ថាជារាជនីក្រមា គឺជាតួឯកស្រី នៅក្នុងស្ពតផ្សព្វផ្សាយព្រឹត្តិការណ៍អង្គរសង្ក្រាន្តឆ្នាំ២០១៧នេះ។
ស្ពតពាណិជ្ជកម្មដែលមានរយៈពេលប្រមាណ ៣០វិនាទី និងដែលកំពុងចាក់ផ្សាយនៅទូរទស្សន៍CNN នេះគឺបង្ហាញពីការញញឹមដ៏ស្រស់ស្អាត និងការសំពះបែបខ្មែរ។ លោក សំហេង បុរស អនុប្រធានក្រុមការងារប្រតិបត្តិនៃព្រឹត្តិការណ៍អង្គរសង្ក្រាន្ត បានបញ្ជាក់ដូច្នេះ ក្នុងសន្និសីទកាសែតស្តីពីការរៀបចំព្រឹត្តិការណ៍អង្គរសង្ក្រាន្តឆ្នាំ២០១៧ នៅថ្ងៃទី៧ ខែមីនា។ លោក សំហេង បុរស បញ្ជាក់បន្ថែមថា៖ «បើយើងនិយាយពីខ្លួនគាត់ យើងចង់អញ្ជើញយុវជន អ៊ីចឹងគាត់ត្រូវដើរតួឲ្យដូចយុវជនម្នាក់ ប៉ុន្តែអ្វីដែលព្យាយាមបង្ហាញគឺផ្សារភ្ជាប់នឹងស្នាមញញឹមគាត់។ ស្នាមញញឹមខ្មែរ របៀបសំពះខ្មែរ»។
តួឯកក្នុងស្ពតអង្គរសង្ក្រាន្តឆ្នាំនេះ ក៏បានបង្ហាញពីចំណាប់អារម្មណ៍របស់ខ្លួន នាឱកាសសន្និសីទកាសែតនេះដែរ។ មាន សូនីតា បញ្ជាក់ថានាងមានមោទនភាពដែលបានចូលរួមផលិតស្ពតមួយនេះ និងចូលរួមផ្សព្វផ្សាយវប្បធម៌ខ្មែរ។ តួឯកអង្គរសង្ក្រាន្តរូបនេះ បន្ថែមថា រូបភាពដែលលេចឡើងនៅក្នុងស្ពតអង្គរសង្ក្រាន្ត មិនមែនជាការសម្តែងឡើយ គឺអារម្មណ៍រីករាយរបស់នាងពិតៗ ក្នុងនាមជាយុវជនម្នាក់ដែលបានចូលរួមក្នុងព្រឹត្តិការណ៍អង្គរសង្ក្រាន្ត។
(រូបភាពពីហ្វេសប៊ុកព្រឹត្តិការណ៍អង្គរសង្រ្កាន្ត)
កញ្ញា មាន សូនីតា បញ្ជាក់ដូច្នេះ៖«ខ្ញុំមានអារម្មណ៍លើសពីសប្បាយ ដែលបានចូលរួមក្នុងព្រឹត្តិការណ៍អង្គរសង្ក្រាន្ត។ ខ្ញុំមានមោទនភាព ដែលខ្លួនខ្ញុំបានជួយផ្សព្វផ្សាយវប្បធម៌ និងអរិយធម៌ខ្មែរ តាមរយៈភាពញញឹមរួសរាយរាក់ទាក់ ដែលបង្ហាញទៅកាន់ពិភពលោក»។
សូមបញ្ជាក់ថា ព្រឹត្តិការណ៍អង្គរសង្ក្រាន្តបានចាប់ផ្ដើមរៀបចំឡើងក្នុងឆ្នាំ២០១៣ ។ នៅឆ្នាំដំបូង ព្រឹត្តិការណ៍នេះ បានទាក់ទាញ ភ្ញៀវទេសចរប្រមាណ ១៧ម៉ឺននាក់។ ដោយឡែកនៅឆ្នាំ២០១៦កន្លងទៅ ព្រឹត្តិការណ៍នេះ ទទួលបានភ្ញៀវទេសចរកើនឡើងដល់ជាង ១លាន ៣សែននាក់៕
Tag:
មាន សូនីតា
អង្គរសង្ក្រាន្ត
ញញឹម
សំពះ
© រក្សាសិទ្ធិដោយ thmeythmey.com
