អន្តរជាតិ
នយោបាយអន្តរជាតិ
អាសាដ ថាល្មមដល់ពេលប្រជាជនស៊ីរីកំណត់ជោគវាសនារបស់ខ្លួនតាមប្រជាមតិហើយ
×
ប្រធានាធិបតីស៊ីរីលោក បាសា អាល់អាសាដ បានថ្លែងថារដ្ឋាភិបាលលោកត្រៀមខ្លួនរួចរាល់ហើយដើម្បីរៀបចំប្រជាមតិមួយដើម្បីកំណត់ជោគវាសនាប្រទេសជាតិ។ គេមិនទាន់អាចដឹងច្បាស់ថា ប្រជាមតិនឹងត្រូវរៀបចំនៅពេលណាឡើយ ព្រោះការចរចាសន្តិភាពនៅមិនទាន់មានផ្លែផ្កានៅឡើយមកទល់ពេលនេះ។
ក្នុងបទសម្ភាស ជាមួយសារព័ត៌មានអ៊ីតាលី Il Fatto Quotidiano ប្រធានាធិបតីស៊ីរី លោក បាសា អាល់អាសាដ បានប្រាប់ថាលោកត្រៀមលក្ខណៈអស់ហើយដើម្បីរៀបចំប្រជាមតិមួយដើម្បីកំណត់ពីអនាគតនៃប្រទេសស៊ិរី។ លោកបានសង្កត់ធ្ងន់ថា វាជាពេលដែលប្រជាជនស៊ីរីត្រូវកំណត់ជោគវាសនារបស់ខ្លួនហើយ។
លោកនិយាយយ៉ាងដូច្នេះ«សង្គ្រាមជាមេរៀនដ៏លំបាកមួយសម្រាប់សង្គមទាំងអស់លើពិភពលោក។ចុងក្រោយអ្នកត្រូវក្រឡេកមើលខ្លួនឯង ហើយនិយាយថាតើវាមានរឿងអីចំពោះប្រទេសរបស់ខ្ញុំ។ គោលដៅរបស់ខ្ញុំគឺបើកចំហនិងជួយសម្រួលដល់ការជជែកពិភាក្សារវាងប្រជាជនស៊ីរី ព្រោះវាជាការពិភាក្សាថ្នាក់ជាតិពាក់ព័ន្ធនឹងប្រព័ន្ធនយោបាយដែល អ្នកចង់បាន»។
លោក អាសាដ បន្ត៖«ដូច្នះយើងត្រូវការកិច្ចពិភាក្សាមួយរវាងប្រជាជនស៊ីរីនៅក្នុងសង្គមទាំងមូល។ ព្រោះថាចុងក្រោយអ្នកនឹងត្រូវមានការរៀបចំប្រជាមតិមួយដើម្បីកំណត់អ្វីដែលយើងចង់បាន»។
ថ្វីបើមានការជជែកពីការរៀបចំប្រជាមតិក្តី មកដល់ពេលបច្ចុប្បន្ននេះការចរចាស្វែងរកសន្តិភាពនៅស៊ីរីស្ថិតនៅក្នុងស្ថានភាពមិនច្បាស់លាស់។ កិច្ចចរចាក្រុងហ្សឺណែកាលពីដើមខែមីនាកន្លងទៅបានត្រឹមកំណត់កម្មវត្ថុនិងរបៀបវារៈនៃការចរចាសន្តិភាពប៉ុណ្ណោះ ហើយក្រុមប្រឆាំងនៅតែបន្តបែកខ្ញែកគ្នានិងមិនចង់បន្តចូលតុចរចាថែមទៀត។ ដូច្នេះ វាមានន័យថា ការស្វែងរកសន្តិភាពនៅតែស្ថិតនៅលើផ្លូវវែងឆ្ងាយនិងរប៉ាក់រប៉ើកខ្លាំង។
ក្នុងបទសម្ភាសដដែលនោះ គេក៏ចោទសួរលោក អាសាដ ថា តើលោកត្រៀមខ្លួនចាកចេញពីតំណែងឬអត់ដើម្បីធានាដល់ការបង្កើតសន្តិភាពនៅក្នុងប្រទេសឬអត់ដែរ។ ប្រធានាធិបតីអាសាដ ដែលតែងចោទអាមេរិកនិងលោកខាងលិចថាតាមទម្លាក់ខ្លួនពីតំណែងនោះ បានតបវិញថា គ្រប់យ៉ាងគួរតែឲ្យប្រជាជនស៊ីរីសម្រេចចុះ។
«ប្រជាជនស៊ីរីគួរតែជ្រើសរើសប្រធានាធិបតីរបស់ខ្លួន ហើយពួកគេក៏គួរជាអ្នកដែលតែកំណត់ឲ្យបានអ្នកដែលត្រូវទទួលខុសត្រូវចំពោះបញ្ហានិងជម្លោះដែលកើតឡើងនេះ។ កិច្ចការនេះមិនមែនជាកាតព្វកិច្ចរបស់អង្គការសហប្រជាជាតិឡើយ អង្គការនេះគ្មានតួនាទីអ្វីទេ»។
សូមបញ្ជាក់ថា ជម្លោះស៊ីរីផ្ទុះឡើងនៅខែមីនាឆ្នាំ ២០១១ ហើយយោងតាមរបាយការណ៍អង្គការសហប្រជាជាតិចំនួនមនុស្សស្លាប់កើនឡើងដល់ ៤៧ម៉ឺននាក់ហើយគិតត្រឹមឆ្នាំ ២០១៦។ មនុស្សរាប់លានផ្សេងទៀតបាត់បង់ជម្រក និងត្រូវរត់ភៀសខ្លួនយ៉ាងលំបាកវេទនាបំផុត៕
Tag:
បាសា អាល់ អាសាដ
ស៊ីរី
© រក្សាសិទ្ធិដោយ thmeythmey.com