ជាតិ
កម្ពុជាជំរុញប្រទេសសមាជិក WTO ផ្តល់ភាពអនុគ្រោះពន្ធគយដល់ប្រទេសអភិវឌ្ឍន៍តិចតួច
×![]()
សៀមរាប៖ សម្តេចនាយករដ្ឋមន្ត្រី ហ៊ុន សែន ថ្លែងថា កម្ពុជាបានដើរតួយ៉ាងសំខាន់ក្នុងការជំរុញឲ្យប្រទេសជាសមាជិក WTO ផ្តល់ភាពអនុគ្រោះពន្ធគយ និងមិនជាប់កូតា សម្រួលដល់វិធានប្រភពដើមទំនិញ ផ្តល់ភាពអនុគ្រោះក្នុងវិស័យសេវា រួមនឹងការផ្តល់ជំនួយឲ្យបានច្រើនដល់ប្រទេសអភិវឌ្ឍន៍តិចតួច (LDCs)។
ថ្លែងក្នុងពិធីបើកកិច្ចប្រជុំតុមូលចិនលើកទី ៥ ស្តីពីការចូលជាសមាជិកអង្គការពាណិជ្ជកម្មពិភពលោក (WTO) ក្រោមប្រធានបទ «ការអនុវត្តល្អបំផុតស្តីពីការចូលជាសមាជិករបស់ប្រទេសអភិវឌ្ឍន៍តិចតួច» នៅព្រឹកថ្ងៃទី ២០ មីនា សម្តេច ហ៊ុន សែន បានសង្ងត់ធ្ងន់ថា៖« កាតព្វកិច្ចចំពោះមុខសម្រាប់យើងទាំងអស់គ្នា ក្នុងនាមជាប្រទេស LDCs គឺត្រូវធ្វើយ៉ាងណា ឲ្យការចរចាសម្រេចបានជោគជ័យនៅក្នុងសន្និសីទថ្នាក់រដ្ឋមន្ត្រីលើកទី១១»។
បន្ថែមពីនេះ សម្តេច ហ៊ុន សែន ក៏បានអំពាវនាវឲ្យប្រទេស LDCs ទាំងអស់ ចូលរួមយ៉ាងសកម្មដើម្បីដោះស្រាយបញ្ហា ទាក់ទងនឹងការគាំពារកសិកម្មក្នុងស្រុក ការស្តុកទុកស្បៀងបម្រុងដើម្បីធានាសន្តិសុខស្បៀង ការឧបត្ថម្ភធនលើវិស័យជលផល ការធ្វើពាណិជ្ជកម្មនិងបរិស្ថាន និងការផ្តល់ប្រពឹត្តកម្មពិសេស និងដោយឡែកដល់ប្រទេសអភិវឌ្ឍន៍តិចតួច ឲ្យបានចប់សព្វគ្រប់មុនកិច្ចប្រជុំថ្នាក់រដ្ឋមន្ត្រីលើកទី១១ នៅប្រទេសអាហ្សង់ទីន។
លោក ដាវីដ ស្យាត អគ្គនាយរងអង្គការ WTO លើកឡើងថា កិច្ចប្រជុំតុមូលចិនលើកទី៥ ដែលកម្ពុជាធ្វើជាម្ចាស់ផ្ទះនេះ នឹងរួមចំណែកយ៉ាងសំខាន់ ដើម្បីគាំទ្រសម្រាប់ការចូលជាសមាជិកអង្គការ WTO តាមរយៈកិច្ចសន្ទនាគោលការណ៍នយោបាយ និងចែករំលែកបទពិសោធន៍នៃការចូលជាសមាជិក និងក្រោយចូលជាសមាជិក។
ដោយឡែក លោក វ៉ាង ស៊ូវិន អនុរដ្ឋមន្ត្រីក្រសួងពាណិជ្ជកម្មចិនវិញបានលើកឡើងថា ចិនមានមោទនភាពដែលបានឃើញកិច្ចប្រជុំតុមូលចិន កា្លយជាវេទិកាដ៏សំខាន់ក្នុងការចែករំលែកបទពិសោធន៍ការអភិវឌ្ឍ និងការអនុវត្តល្អ។
គួរបញ្ជាក់កិច្ចប្រជុំតុមូលចិនលើកទី៥ ធ្វើឡើងចាប់ពីថ្ងៃទី២០ ដល់ថ្ងៃទី២៣ មីនា ឆ្នាំ២០១៧ នៅខេត្តសៀមរាប។ កិច្ចប្រជុំនេះមានចំណុចសំខាន់ៗ រួមមាន បទពិសោធន៍ពីការចូលជាសមាជិកអង្គការ WTO របស់ប្រទេស LDCs ទាំង៩ ជាពិសេសបទពិសោធន៍របស់ប្រទេស លីបេរីយ៉ា។ និន្នាការថ្មីៗ ពាក់ព័ន្ធនឹងការចូលរួមចំណែក នៃការចូលជាសមាជិករបស់ប្រទេស LDCs ចំពោះប្រព័ន្ធពាណិជ្ជកម្មពហុភាគី ដោយផ្តោតលើវិធាននានា និងលទ្ធភាពជ្រៀតចូលក្នុងទីផ្សារ។
មធ្យោបាយធ្វើឲ្យសមាជិកនានា និងសហគមន៍ពាណិជ្ជកម្មអន្តរជាតិ អាចផ្តល់ការគាំទ្រដល់ការបញ្ចប់កិច្ចការស្នើសុំជាសមាជិករបស់ប្រទេស កូម៉ូរ៉ូស និងស៊ូដង់ ឲ្យបានឆាប់។ វិធីដែលសមាជិកនានា អាចជួយជំរុញការគាំទ្ររបស់ពួកគេ ដល់កិច្ចការស្នើសុំចូលជាសមាជិករបស់ប្រទេស LDCs និងនៅដំណាក់កាលក្រោយចូលជាសមាជិក ដើម្បីសម្រួលសមាហរណកម្មប្រទេស LDCs នៅក្នុងសេដ្ឋកិច្ចសាកលលោក៕
Tag:
ហ៊ុន សែន
LDCs
WTO
© រក្សាសិទ្ធិដោយ thmeythmey.com
