Sir Alex Ferguson នឹងត្រឡប់ទៅដឹកនាំក្រុមបិសាចក្រហមជាថ្មីម្តងទៀត ក្នុងនាមជាអ្នកចាត់ការទូទៅរបស់ក្រុម Manchester United អំឡុងឆ្នាំ ២០០៨ XI ក្នុងកម្មវិធីប្រកួតពានមិត្តភាព Testimonial ដែលជាកម្មវិធី សម្រាប់អរគុណដល់កីឡាករ Michael Carrick ដែលប្រព្រឹត្តទៅនៅថ្ងៃអាទិត្យទី ៤ ខែមិថុនា ឆ្នាំ២០១៧ នៅទឹកដី Old Trafford ។
អតីតអ្នកចាត់ការទូទៅរបស់ Man Utd វ័យ៧៥ឆ្នាំ ធ្លាប់ដឹកនាំក្រុមនៅអង់គ្លេសមួយនេះឈ្នះពានច្រើនសន្ធឹកសន្ធាប់រហូតដល់ ៣៨ពាន រួមមានពានកំពូល Premier League ២០សម័យកាល មុនលោកសម្រេចចូលនិវត្តន៍ជាអ្នកចាត់ការទូទៅកាលពីឆ្នាំ២០១៣។
ក្រុមដែលដឹកនាំដោយលោក Ferguson និងត្រូវប៉ះក្រុមដែលដឹកនាំដោយលោក Harry Redknapp សម្រាប់ការប្រកួតអរគុណដល់ Michael Carrick ដែលស្មោះស្ម័គ្រនឹងក្រុម Man Utd ហើយការប្រកួតនេះក៏មានវត្តមានអតីតកីឡាករល្បីដូចជា Paul Scholes, Ryan Giggs, Steven Gerrard និង Frank Lampard ជាដើម។
សូមបញ្ជាក់ថាវិរបុរសសញ្ជាតិស្កុតលែន ត្រូវបានតែងតាំងជាឯកអគ្គរដ្ឋទូតប្រចាំក្លិបបិសាចក្រហម ហើយលោកតែងមានវត្តមានស្ទើគ្រប់ការប្រកួតរបស់ Man Utd ៕