ជាតិ
គ.ជ.ប ស្នើឲ្យមូលនិធិ កូហ្វី អាណាន់ ដាក់អ្នកសង្កេតការណ៍ ពេលបោះឆ្នោត
× ភ្នំពេញ៖ គ.ជ.ប ចង់ឲ្យមូលនិធី កូហ្វី អាណាន់ ដាក់អ្នកសង្កេតការណ៍ ក្នុងអំឡុងការបោះឆ្នោត នាពេលខាងមុខ។ គ.ជ.ប ចាត់ទុកអ្នកសង្កេតការណ៍ ថាជាសាក្សីដ៏សំខាន់ ក្នុងការឃ្លាំមើលពីការបោះឆ្នោត នៅកម្ពុជា។
គណៈកម្មាធិការជាតិរៀបចំការបោះឆ្នោត (គ.ជ.ប) មានជំនួប ជាមួយនឹងតំណាងនៃមូលនិធិ កូហ្វី អាណាន់ កាលពីព្រឹកថ្ងៃទី២១ ខែមីនា ឆ្នាំ២០១៧។ ក្នុងជំនួបនោះ ភាគី គ.ជ.ប បានស្នើឲ្យតំណាងនៃមូលនិធិ កូហ្វី អាណាន់ ដាក់អ្នកសង្កេតការណ៍ ដើម្បីតាមដានដំណើរការនៃការបោះឆ្នោតថា្នក់ឃុំ-សង្កាត់ ដែលនឹងប្រព្រឹត្តទៅនៅថ្ងៃទី៤ ខែមិថុនា ឆ្នាំ២០១៧។ នេះបើតាម លោក ហង្ស ពុទ្ធា អ្នកនាំពាក្យរបស់គ.ជ.ប ដែលបានប្រាប់ក្រុមអ្នកសារព័ត៌មាន ក្រោយពីបញ្ចប់ជំនួបខាងលើ។
អ្នកនាំពាក្យរបស់គ.ជ.ប រូបនេះ បានបញ្ជាក់ពីគោលបំណងនៃការស្នើសុំដូច្នេះថា៖«គ.ជ.ប ស្នើឲ្យមូលនិធិ កូហ្វី អាណាន់ បញ្ជូនអ្នកសង្កេតការណ៍របស់ខ្លួន ដើម្បីជាសាក្សី ដើម្បីជាការក្រើនរម្លឹកដល់អ្នកពាក់ព័ន្ធបោះឆ្នោតទាំងអស់ គោរពឲ្យល្អនូវតួនាទី និងការទទួលខុសត្រូវរៀងៗខ្លួន»។
លោក ហង្ស ពុទ្ធា បន្តទៀតថា គ.ជ.ប ក៏បានសុំឲ្យមូលនិធិ កូហ្វី អាណាន់ ជួយធ្វើបទបង្ហាញដល់ភាគីពាក់ព័ន្ធទាំងអស់ ជាពិសេសគណបក្សនយោបាយ ជុំវិញសារសំខាន់នៃសុចរិតភាពក្នុងដំណើរការនៃការបោះឆ្នោត។ បើតាមលោក ហង្ស ពុទ្ធា តំណាងនៃមូលនិធិ កូហ្វី អាណាន់ បានសម្រេចយកសំណើទាំងនេះ ទៅពិចារណា។
លោក ហង្ស ពុទ្ធា អះអាងថា គ.ជ.ប ពុំបានស្នើសុំថវិកាពីមូលនិធិ កូហ្វី អាណាន់ ឡើយ។ អ្នកនាំពាក្យខាងលើ សង្កាត់ធ្ងន់ថា រហូតមកដល់ពេនេះ គ.ជ.ប លែងបារម្ភពីបញ្ហាថវិកា និងសម្ភារបច្ចេកទេស ទៀតហើយ។ លោក ប្រាប់ថា គ.ជ.ប មានថវិកាប្រមាណជា ៥៣លានដុល្លារ ដែលបានមកពីរដ្ឋាភិបាលកម្ពុជា រួមទាំងបរទេស ជាម្ចាស់ជំនួយ ដើម្បីទ្រទ្រង់ដំណើរការនៃបោះឆ្នោត៕
Tag:
គជប
បោះឆ្នោត
មូលនិធីកូហ្វីអាណាន់
© រក្សាសិទ្ធិដោយ thmeythmey.com