កីឡាជាតិ
ជាតិ
មិត្តភាពអន្តរជាតិ៖ កម្ពុជាចាញ់ឥណ្ឌា ៣-២ ក្នុងទម្រង់លេងមួយដ៏ទាក់ទាញ
ឈរក្រោយពីឆ្វេងទៅស្តាំ (សំអឿន, សេរីរ័ត្ន, វឌ្ឍនាកា, បូរ៉ាវី, ពិសិដ្ឋ, ធារី) ជួរមុខ (ពលរដ្ឋ, មុន្នីឧត្តម, បារាំង, វិសាល, ផល្លីន)
×![]()
ដោយ: រួបរួម
ក្រុមកីឡាបាល់ទាត់ជម្រើសជាតិកម្ពុជា បានរងបរាជ័យ ៣-២ ក្នុងជំនួបមិត្តភាពអន្តរជាតិជាមួយឥណ្ឌានៅពហុកីឡដ្ឋានជាតិអូឡាំពិក នាល្ងាចថ្ងៃពុធ ទី២២ ខែមីនា នេះ។ ទោះបីជាយ៉ាងណាក៏ដោយ ទម្រង់លេងក្រោមការដឹកនាំលើកដំបូងរបស់គ្រូបង្វឹកប្រេស៊ីល Leonardo Vitorino ទទួលបាននូវការចាប់អារម្មណ៍យ៉ាងខ្លាំង ជាពិសេសអ្នកគាំទ្រជាង៤ម៉ឺននាក់ដែលបានទស្សនាផ្ទាល់។
ទម្រង់របស់ក្រុមកីឡាបាល់ទាត់ជម្រើសជាតិកម្ពុជា មានការខុសប្លែកយ៉ាងខ្លាំងនារយៈពេល៤៥នាទីដំបូង តាមរយៈការបញ្ជូនបាល់ខ្លីៗ និងការព្យាយាមទាញកម្លាំងកីឡាករឥណ្ឌា។ ទោះបីជាយ៉ាងណាក៏ដោយ នៅនាទី៣៥ ខ្សែបម្រើ Eugeneson Lyngdoh ទាត់បាល់ចេញពីជ្រុង ហើយអ្នកចាំទី អ៊ុំ សេរីរ័ត្ន ចាប់បាល់ផ្លាតទៅធ្លាក់ចំជើងខ្សែប្រយុទ្ធ Sunil Chhetri ដែលនាំឲ្យក្រុមភ្ញៀវមានការស៊ុតបាល់បញ្ចូលទីនាំមុខ១គ្រាប់។
ពីរនាទីក្រោយមក ប្រាក់ មុន្នីឧត្តម និងសឿត បារាំង សហការគ្នាបានយ៉ាងល្អ ទីបំផុត ឧត្តម បានអូសបាល់ចូលទៅកាន់ប្រអប់គ្រោះថ្នាក់ មុននឹងបញ្ជូនឲ្យ ខ្សែប្រយុទ្ធជើងចាស់ ឃួន ឡាបូរ៉ាវី ស៊ុតបាល់បញ្ចូលទីតាមស្មើ ១-១ ។
ឈានដល់តង់ទីពីរ ក្រុមឥណ្ឌាចាប់ផ្តើមលេងយល់ចិត្តគ្នា ជាពិសេសកម្លាំងថ្មីៗ ដោយគ្រាន់តែបីនាទីប៉ុណ្ណោះពួកគេ រកបានពីរគ្រាប់។ នៅនាទី៤៩ Jackichand Singh Talem បានអូសកាត់ខ្សែការពារកម្ពុជា មុននឹងបន្ទាបខ្លួនរុញបាល់ឲ្យ Jeje Lalpekhlua ស៊ុតនាំមុខសារជាថ្មី ២-១ ។ បីនាទីក្រោយមក ខ្សែការពារ Sandesh Jhingan បានតែតបាល់បញ្ចូលទី បង្កើនការនាំមុខ ៣-១ ក្រោយការបញ្ជូនពីជ្រុងរបស់ Eugeneson Lyngdoh។
នៅនាទី៦១ កម្ពុជា បានកាត់បន្ថយគម្លាតនាំមុខរបស់ឥណ្ឌា ដោយ ទិត្យ ឌីណា បញ្ជូនបាល់ទៅឲ្យ ចាន់ វឌ្ឍនាកា ដើម្បីបំប៉ោងសំណាញ់ពីចម្ងាយជាង២០ម៉ែត្រ។ កម្ពុជាមានឱកាសមួយចំនួនក្នុងការវាយបកតាមស្មើ ប៉ុន្តែមិនបានសម្រេចដែលនាំឲ្យឥណ្ឌា ទទួលជ័យជម្នះ ៣-២ ពីការប្រកួតមិត្តភាពអន្តរជាតិនេះ។
នៅក្នុងការប្រកួតនេះ សឿត បារាំង ដែលលេងនៅតំបន់ស្លាបខាងឆ្វេង ទទួលបាននូវការកោតសរសើរយ៉ាងខ្លាំង ដោយកីឡាករដែលចេញពីយុវជនថ្នាលភ្នំពេញក្រោនមួយនេះ គ្រប់គ្រងបាល់យ៉ាងល្អ និងបញ្ជូនទៅមិត្តរួមក្រុមចំគោលដៅ ហើយបន្ថែមពីលើនេះ កីឡាករឥណ្ឌារងការពិន័យយ៉ាងញឹកញាប់នៅពេលពួកគេព្យាយាមប្រជែងយកបាល់ជាមួយបារាំង។
នៅថ្ងៃទី២៨ ខែមីនា ឆ្នាំ២០១៧ ខាងមុខ កម្ពុជា និងឥណ្ឌា នឹងបើកយុទ្ធនាការរៀងៗខ្លួនដើម្បីដណ្តើមយកកៅអីសម្រាប់ព្រឹត្តិការណ៍ AFC Asian Cup ឆ្នាំ២០១៩ នៅប្រទេសអារ៉ាប់រួមអេមីរ៉េត។ ឥណ្ឌាស្ថិតនៅក្នុងពូល A ជាមួយគៀហ្ស៊ីស្ថាន មីយ៉ាន់ម៉ា និងម៉ាកាវ ខណៈកម្ពុជានៅក្នុងពូល C ជាមួយហ្សកដានី វៀតណាម និងអាហ្វហ្គានីស្ថាន។
កីឡាករកម្ពុជា៖ អ៊ុំ សេរីរ័ត្ន (អ្នកចាំទី) រស់ សំអឿន, សរ ពិសិដ្ឋ, សឿយ វិសាល, ប្រាក់ មុន្នីឧត្តម (កែវ សុខផេង ៧៦), ហូយ ផល្លីន (សុះ ស៊ូហាណា ៨១), ឃួន ឡាបូរ៉ាវី (អុល រ៉ាវី ៨៩), ចាន់ វឌ្ឍនាកា (សួង វិរៈ ៨៣), ច្រឹង ពលរដ្ឋ (ទិត្យ ឌីណា ៥៦), សឿត បារាំង, ប៊ិន ធារី (ប្រធានក្រុម)។
កីឡាករដែលមិនបានចូលលេង៖ កែវ សុខសិលា, ពុំ តុលា, សំអឿន ពិដោរ, ណុប តុលា, ឆុំ ពិសា, ឆេង ម៉េង, អោម ឧត្តម៕
ទម្រង់របស់ក្រុមកីឡាបាល់ទាត់ជម្រើសជាតិកម្ពុជា មានការខុសប្លែកយ៉ាងខ្លាំងនារយៈពេល៤៥នាទីដំបូង តាមរយៈការបញ្ជូនបាល់ខ្លីៗ និងការព្យាយាមទាញកម្លាំងកីឡាករឥណ្ឌា។ ទោះបីជាយ៉ាងណាក៏ដោយ នៅនាទី៣៥ ខ្សែបម្រើ Eugeneson Lyngdoh ទាត់បាល់ចេញពីជ្រុង ហើយអ្នកចាំទី អ៊ុំ សេរីរ័ត្ន ចាប់បាល់ផ្លាតទៅធ្លាក់ចំជើងខ្សែប្រយុទ្ធ Sunil Chhetri ដែលនាំឲ្យក្រុមភ្ញៀវមានការស៊ុតបាល់បញ្ចូលទីនាំមុខ១គ្រាប់។
ពីរនាទីក្រោយមក ប្រាក់ មុន្នីឧត្តម និងសឿត បារាំង សហការគ្នាបានយ៉ាងល្អ ទីបំផុត ឧត្តម បានអូសបាល់ចូលទៅកាន់ប្រអប់គ្រោះថ្នាក់ មុននឹងបញ្ជូនឲ្យ ខ្សែប្រយុទ្ធជើងចាស់ ឃួន ឡាបូរ៉ាវី ស៊ុតបាល់បញ្ចូលទីតាមស្មើ ១-១ ។
ឈានដល់តង់ទីពីរ ក្រុមឥណ្ឌាចាប់ផ្តើមលេងយល់ចិត្តគ្នា ជាពិសេសកម្លាំងថ្មីៗ ដោយគ្រាន់តែបីនាទីប៉ុណ្ណោះពួកគេ រកបានពីរគ្រាប់។ នៅនាទី៤៩ Jackichand Singh Talem បានអូសកាត់ខ្សែការពារកម្ពុជា មុននឹងបន្ទាបខ្លួនរុញបាល់ឲ្យ Jeje Lalpekhlua ស៊ុតនាំមុខសារជាថ្មី ២-១ ។ បីនាទីក្រោយមក ខ្សែការពារ Sandesh Jhingan បានតែតបាល់បញ្ចូលទី បង្កើនការនាំមុខ ៣-១ ក្រោយការបញ្ជូនពីជ្រុងរបស់ Eugeneson Lyngdoh។
នៅនាទី៦១ កម្ពុជា បានកាត់បន្ថយគម្លាតនាំមុខរបស់ឥណ្ឌា ដោយ ទិត្យ ឌីណា បញ្ជូនបាល់ទៅឲ្យ ចាន់ វឌ្ឍនាកា ដើម្បីបំប៉ោងសំណាញ់ពីចម្ងាយជាង២០ម៉ែត្រ។ កម្ពុជាមានឱកាសមួយចំនួនក្នុងការវាយបកតាមស្មើ ប៉ុន្តែមិនបានសម្រេចដែលនាំឲ្យឥណ្ឌា ទទួលជ័យជម្នះ ៣-២ ពីការប្រកួតមិត្តភាពអន្តរជាតិនេះ។
នៅក្នុងការប្រកួតនេះ សឿត បារាំង ដែលលេងនៅតំបន់ស្លាបខាងឆ្វេង ទទួលបាននូវការកោតសរសើរយ៉ាងខ្លាំង ដោយកីឡាករដែលចេញពីយុវជនថ្នាលភ្នំពេញក្រោនមួយនេះ គ្រប់គ្រងបាល់យ៉ាងល្អ និងបញ្ជូនទៅមិត្តរួមក្រុមចំគោលដៅ ហើយបន្ថែមពីលើនេះ កីឡាករឥណ្ឌារងការពិន័យយ៉ាងញឹកញាប់នៅពេលពួកគេព្យាយាមប្រជែងយកបាល់ជាមួយបារាំង។
នៅថ្ងៃទី២៨ ខែមីនា ឆ្នាំ២០១៧ ខាងមុខ កម្ពុជា និងឥណ្ឌា នឹងបើកយុទ្ធនាការរៀងៗខ្លួនដើម្បីដណ្តើមយកកៅអីសម្រាប់ព្រឹត្តិការណ៍ AFC Asian Cup ឆ្នាំ២០១៩ នៅប្រទេសអារ៉ាប់រួមអេមីរ៉េត។ ឥណ្ឌាស្ថិតនៅក្នុងពូល A ជាមួយគៀហ្ស៊ីស្ថាន មីយ៉ាន់ម៉ា និងម៉ាកាវ ខណៈកម្ពុជានៅក្នុងពូល C ជាមួយហ្សកដានី វៀតណាម និងអាហ្វហ្គានីស្ថាន។
កីឡាករកម្ពុជា៖ អ៊ុំ សេរីរ័ត្ន (អ្នកចាំទី) រស់ សំអឿន, សរ ពិសិដ្ឋ, សឿយ វិសាល, ប្រាក់ មុន្នីឧត្តម (កែវ សុខផេង ៧៦), ហូយ ផល្លីន (សុះ ស៊ូហាណា ៨១), ឃួន ឡាបូរ៉ាវី (អុល រ៉ាវី ៨៩), ចាន់ វឌ្ឍនាកា (សួង វិរៈ ៨៣), ច្រឹង ពលរដ្ឋ (ទិត្យ ឌីណា ៥៦), សឿត បារាំង, ប៊ិន ធារី (ប្រធានក្រុម)។
កីឡាករដែលមិនបានចូលលេង៖ កែវ សុខសិលា, ពុំ តុលា, សំអឿន ពិដោរ, ណុប តុលា, ឆុំ ពិសា, ឆេង ម៉េង, អោម ឧត្តម៕
Tag:
បាល់ទាត់
ជម្រើសជាតិកម្ពុជា
មិត្តភាពអន្តរជាតិ
© រក្សាសិទ្ធិដោយ thmeythmey.com
