ភ្នំពេញ៖ សហព័ន្ធស្រូវអង្ករកម្ពុជា ប្រាប់ឈ្មួញកុំឲ្យនាំចេញអង្ករដែលមានជាតិថ្នាំគីមីទ្រីហ្ស៊ីក្លាហ្សូល ចូលទៅទីផ្សារសហភាពអឺរ៉ុប (EU)។ ការណែនាំរបស់សហព័ន្ធស្រូវអង្ករកម្ពុជាបែបនេះ ស្របពេលដែលសហភាពអឺរ៉ុប គ្រោងហាមការនាំចូលអង្ករពីបណ្ដាប្រទេសនានាទៅទីផ្សារខ្លួន ចំពោះអង្ករដែលមានកាកសំណល់ថ្នាំកសិកម្ម ទ្រីហ្ស៊ីក្លាហ្សូល (Tricyclazole) លើសពី ០,០១មីលីក្រាមក្នុងអង្ករ១គីឡូក្រាម ចាប់ពីខែកក្កដាឆ្នាំនេះតទៅ។
ការកម្រិតនេះ គឺជាការប្រែបទបញ្ញត្តិថ្មីចំពោះការនាំចូលអង្ករទៅទីផ្សារសហភាពអឺរ៉ុប ខណៈមានការបារម្ភលើផលប៉ះពាល់សុខភាព ដោយការទទួលទានអង្ករមានសារធាតុ Tricyclazole នេះ។Tricyclazole គឺជាថ្នាំគីមីកសិកម្មម្យ៉ាង ដែលគេប្រើប្រាស់លើដំណាំស្រូវ ដើម្បីការពារជំងឺផ្សិត។
ព័ត៌មានដែលផ្សព្វផ្សាយលើទំព័រហ្វេសប៊ុក សហព័ន្ធស្រូវអង្ករកម្ពុជា (CRF) បានឲ្យដឹងថា មុនបញ្ញត្តិថ្មីចូលជាធរមាននៅខែកក្កដាខាងមុខនេះ EU បានអនុញ្ញាតឲ្យនាំចូលអង្ករដែលមានកាកសំណល់ Tricyclazole មិនលើសពី ១មីលីក្រាម ក្នុង១គីឡូក្រាម។ មានន័យថា បញ្ញត្តិថ្មីបានបន្ថយកម្រិតសារធាតុ Tricyclazole ដល់ទៅ ១០០ដងទាបជាងមុន។
នៅថ្ងៃម្សិលមិញនេះ CRF និងអង្គការគម្រោងខ្សែសង្វាក់កសិកម្មកម្ពុជា (Cavac) បានបើកសិក្ខាសាលាពិគ្រោះយោបល់ ជុំវិញការប្រើប្រាស់ថ្នាំគីមីកសិកម្ម Tricyclazole នេះ ដែលមានការចូលរួមពីតំណាងសហភាពអឺរ៉ុប ក្រសួងកសិកម្មរុក្ខាប្រមាញ់ និងនេសាទ ក្រសួងពាណិជ្ជកម្ម ក្រុមហ៊ុននាំចេញអង្ករ ម្ចាស់រោងម៉ាស៊ីនកិនស្រូវ និងតំណាងក្រុមហ៊ុនលក់ជីកសិកម្មជាច្រើនរូប។
នៅក្នុងកិច្ចពិភាក្សានេះ មន្ត្រីជំនាញមកពីក្រសួងកសិកម្ម បានលើកទឹកចិត្តឲ្យក្រុមហ៊ុននាំចេញ និងរោងម៉ាស៊ីនកិនស្រូវ នៅក្នុងស្រុកអនុវត្តការធ្វើកសិកម្មតាមកិច្ចសន្យា ដែលងាយស្រួលគ្រប់គ្រង និងចៀសវាងបានការប្រើប្រាស់ថ្នាំផ្សិត Tricyclazole ។ តំណាងក្រសួងកសិកម្មបន្តថា ក្នុងករណីក្រុមហ៊ុនទិញស្រូវពីប្រភពមិនច្បាស់លាស់ រួចកិនកែច្នៃ ហើយនាំចេញទៅកាន់ទីផ្សារ EU ដែលអង្ករមានផ្ទុកកាកសំណល់ Tricyclazole នោះ វានឹងប៉ះពាល់ដល់ទីផ្សារនាំចេញអង្កររបស់កម្ពុជា ។
លោក នង វាសនា អនុប្រធាន CRF បានថ្លែងប្រាប់សារព័ត៌មានថ្មីៗថា ការចរាចរថ្នាំផ្សិតនេះ មានភាពទូលំទូលាយដែរ ដោយថ្នាំនេះ មានតម្លៃទាប។ លោកបន្ថែមថា៖«តាមការបង្ហាញរបស់ក្រុមហ៊ុននាំចេញមួយចំនួន ដែលបានយកសំណាកអង្ករមកពិនិត្យឃើញមានសាធាតុ Tricyclazole នោះ តំបន់ខ្លះមាន តំបន់ខ្លះអត់។ តំបន់ដែលមានគឺហួសកម្រិតគេអនុញ្ញាត»។
អនុប្រធាន CRF រូបនេះមិនអាចបញ្ជាក់ថា បើ EU រកឃើញសារធាតុ Tricyclazole ក្នុងអង្កររបស់ក្រុមហ៊ុនណាមួយ ក្នុងកម្រិតដែលគេហាមឃាត់ តើ EU នឹងមានវិធានការបែបណានោះទេ?
លោក នង វាសនា បញ្ជាក់ថា មានប្រភេទថ្នាំផ្សេងទៀតដែលអាចប្រើជំនួស Tricyclazole នេះបាន។ ជាមួយគ្នានេះ លោកបានស្នើឲ្យមានការបញ្ឈប់នាំចូលថ្នាំ Tricyclazole និងហាមឃាត់ការប្រើប្រាស់ថ្នាំនេះ ក្នុងដំណាំស្រូវ។ លោកក៏ស្នើឲ្យប្រមូលថ្នាំប្រភេទនេះ ចេញពីទីផ្សារវិញផងដែរ។ ទន្ទឹមនឹងនេះ លោក នង វាសនា បានជំរុញឲ្យស្ថាប័នពាក់ព័ន្ធ ចាត់វិធានការជាបន្ទាន់ ជុំវិញបញ្ហានេះ៕