ជាតិ
ក្រោយកាត់ទោសជួប សម្លាប់ តុលាការបន្តស្វែងរកជនសង្ស័យផ្សេងទៀត ក្នុងរឿងឃាតកម្មលោក កែម ឡី
× ភ្នំពេញ៖ ក្រៅពីលោក ជួប សម្លាប់ តុលាការ កំពុងស្វែងរកបុគ្គលពីរនាក់ផ្សេងទៀត ដែលសង្ស័យថា ជាប់ពាក់ព័ន្ធនឹងអំពើឃាតកម្មលើ លោក កែម ឡី។ បុគ្គលទាំងពីរនាក់នោះ គឺអ្នក លក់កាំភ្លើងឲ្យលោក ជួប សម្លាប់ និងអ្នកនាំលោក ជួប សម្លាប់ ឲ្យស្គាល់លោក កែម ឡី។
សាលាដំបូងរាជធានីភ្នំពេញ បានប្រកាសសាលក្រម នៅថ្ងៃទី២៣ ខែមីនា ឆ្នាំ២០៧នេះ ឲ្យលោក អឿត អាង ហៅជួប សម្លាប់ ជាប់ពន្ធនាគារអស់មួយជីវិត ពាក់ព័ន្ធនឹងអំពើឃាតកម្មលើលោក កែម ឡី ដែលជាអ្នកសិក្សាស្រាវជ្រាវការអភិវឌ្ឍសង្គម និងជាអ្នកវិភាគនយោបាយ។ លោក ជួប សម្លាប់ បានរងពីបទចោទ «ឃាតកម្មគិតទុកជាមុន និងកាន់កាប់អាវុធខុសច្បាប់»។
ក្រោយប្រកាសទោសកំហុស របស់លោក ជួប សម្លាប់ រួចហើយ ចៅក្រមជំនុំជម្រះ ក៏បានសម្រេចបំបែកសំណុំរឿងនេះ ជាពីរផ្សេងគ្នា តាមសំណើរបស់ព្រះរាជអាជ្ញា ដែលដើរតួនាទីជាដើមបណ្តឹង។ សំណុំរឿងដែលត្រូវបំបែកនោះ គឺព្រះរាជអាជ្ញា សុំបន្តស្វែងរក អ្នកដទៃទៀត ដែលជាប់ពាក់ព័ន្ធ ក្នុងអំពើឃាតកម្មលើ លោក កែម ឡី។
លោក យុង ផានិត មេធាវីរបស់លោក ជួប សម្លាប់ បានប្រាប់សារព័ត៌មានថ្មីៗថា មានបុគ្គលពីរនាក់ ដែលព្រះរាជអាជ្ញា នឹងបន្តស្វែងរក និងស៊ើបអង្កេត។ លោក បន្ថែមថា បុគ្គលទាំងពីរនាក់នោះ គឺអ្នកដែលលក់អាវុធ ឲ្យលោក ជួប សម្លាប់ និងអ្នកដែលនាំឲ្យ លោក ជួប សម្លាប់ ស្គាល់លោក កែម ឡី។
លោកមេធាវីរូបនេះ បាននិយាយដូច្នេះថា៖«ជានីតិវិធី ការបំបែកសំណុំរឿងនេះ គឺជាសំណើរបស់ព្រះរាជអាជ្ញា។ គាត់ ចង់ស្វែងរកអ្នកពាក់ព័ន្ធផ្សេងទៀត គាត់ក៏សុំឲ្យបំបែកសំណុំរឿងទៅ ព្រោះវាសិទ្ធិផ្តាច់មុខរបស់គាត់។ គាត់ ចង់ដឹងថា អ្នកណា ជាអ្នកលក់កាំភ្លើងឲ្យជួប សម្លាប់ ហើយអ្នកណា ជាអ្នកនាំជួប សម្លាប់ ឲ្យស្គាល់លោកបណ្ឌិត កែម ឡី?»។
ចាប់តាំងពីលោក កែម ឡី ត្រូវបានបាញ់សម្លាប់ កាលពីថ្ងៃទី១០ ខែកក្កដា ឆ្នាំ២០១៦ រហូតមកដល់ពេលនេះ តុលាការ មិនទាន់រកឃើញអ្នកពាក់ព័ន្ធផ្សេងទៀត ក្រៅតែពីលោក ជួប សម្លាប់ នោះទេ។ សមត្ថកិច្ច បានចាប់លោក ជួប សម្លាប់ នៅក្នុងថ្ងៃ ដែលកើតឃាតកម្មតែម្តង។ លោក ជួប សម្លាប់ ធ្លាប់សារភាពថា លោក ពិតជាបានបាញ់សម្លាប់លោក កែម ឡី មែន៕
© រក្សាសិទ្ធិដោយ thmeythmey.com