អន្តរជាតិ
ភាពតានតឹងឧបទ្វីបកូរ៉េ៖ ចិនប្រកាសថា អ្នកណាចង អ្នកហ្នឹងស្រាយទៅ អ្នកនាំពាក្យក្រសួងការបរទេសចិន Hua Chunying (រូបថត Xinhua)
× កូរ៉េខាងជើង បានបាញ់សាកល្បងមីស៊ីលមួយគ្រាប់នៅថ្ងៃទី២៣ ខែមីនា។ ការបាញ់នេះ ត្រូវគេមើលឃើញថា កូរ៉េខាងជើង មិនបានស្ដាប់សម្ដីរបស់ចិន ដែលជាបងធំរបស់ខ្លួនដូចមុនទៀតឡើយ ទោះចិនធ្លាប់អំពាវនាវឲ្យកូរ៉េខាងជើង ឈប់ធ្វើសកម្មភាពបង្ករឿង និងបានប្រាប់អាមរិក និងកូរ៉េខាងត្បូងឲ្យឈប់ធ្វើសមយុទ្ធដូចគ្នាដែរ។ ខណៈដែលភាពតានតឹងកាន់តែឡើងកម្ដៅ ចិនបន្តស្នើឲ្យភាគីពាក់ព័ន្ធដោះស្រាយការខ្វែងគំនិតគ្នា និងចៀសវាងធ្វើសកម្មភាពផ្គើន ដែលនាំឲ្យបញ្ហាកាន់តែស្មុគស្មាញ។
បន្ថែមពីលើទណ្ឌកម្មរាប់មិនអស់ដែលដាក់លើកូរ៉េខាងជើងនាពេលកន្លងមក ចិន ក៏បានបញ្ចេញគំនិតថ្មីមួយទៀត គឺ «Suspension for Suspension»។ មានន័យថា ចិនស្នើឲ្យកូរ៉េខាងជើងផ្អាកកម្មវិធីនុយក្លេអ៊ែរ និងការបាញ់សាកល្បងមីស៊ីលរបស់ខ្លួន ហើយជាថ្នូរមកវិញ ចិនទទូចឲ្យអាមេរិក និងកូរ៉េខាងត្បូង ឈប់ធ្វើសកម្មភាពយោធារួមគ្នា ដែលកូរ៉េខាងជើងគិតថា ជាការត្រៀមលក្ខណៈវាយប្រហារមកលើខ្លួន។ បន្ទាប់ពីនេះ ភាគីពាក់ព័ន្ធទាំងអស់ ក៏ត្រូវវិលចូលតុចរចាឡើងវិញដែរ។
យ៉ាងណាមិញគំនិតផ្ដួចផ្ដើមរបស់ចិន មិនត្រូវបានគេស្ដាប់ឡើយ។ ស្ថានការណ៍នៅឧបទ្វីកូរ៉េនៅតែក្ដៅខ្លាំង និងឈានជិតដល់ចំណុចផ្ទុះទៅហើយ។ ក្រុងប៉េកាំង ក៏នៅតែអំពាវនាវឲ្យគ្រប់ភាគីទាំងអស់ រក្សាភាពស្ងៀមស្ងាត់ ចៀសវាងសកម្មភាពប្រថុយប្រថាន ដែលអាចបង្កជាការវិនិច្ឆ័យខុសលើស្ថានការណ៍តំបន់។ ចិន ក៏ប្រាប់ភាគីទាំងអស់ត្រូវមានទំនួលខុសត្រូវលើសកម្មភាពរបស់ខ្លួន ដើម្បីកាត់បន្ថយកម្ដៅនៅឧបទ្វីបកូរ៉េ។
បើតាមចិន បញ្ហានុយក្លេអ៊ែរកូរ៉េខាងជើង ជារឿងយូរអង្វែង និងស្មុគស្មាញខ្លាំងណាស់។ ចិន ដែលតែងជួយគាំទ្រកូរ៉េខាងជើងតាំងពីដើមមកនោះ ក៏ហាក់ដូចជាដកខ្លួនឆ្ងាយពីការទទួលខុសត្រូវចំពោះការកើនកម្ដៅក្នុងតំបន់។ ចិនបែរជានិយាយថា បញ្ហាកើតឡើងដោយការមិនចុះសម្រុង ព្រមទាំងគម្លាតនៃការយល់ចិត្តគ្នារវាងកូរ៉េខាងជើង និងអាមេរិក-កូរ៉េខាងត្បូង។
ក្នុងសន្និសីទកាសែតថ្ងៃទី២២ ខែមីនា អ្នកនាំពាក្យក្រសួងការបរទេសចិន Hua Chunying បានលើកសុភាសិតមួយថា «ចំណងគួរស្រាយដោយអ្នកចង»។ ចំណង គឺបញ្ហាឧបទ្វីបកូរ៉េដែលកើតចេញពីមហិច្ឆតានុយក្លេអ៊ែរបស់កូរ៉េខាងជើង និងសមយុទ្ធរួមគ្នារវាងអាមេរិក និងកូរ៉េខាងត្បូង ដែលជាការត្រៀមលក្ខណៈការពារពីការវាយប្រហារណាមួយរបស់កូរ៉េខាងជើង។ សកម្មភាពជាឯកតោភាគីណាមួយ សុទ្ធតែអាចដុតបញ្ឆេះកម្ដៅឲ្យពុះកញ្ជ្រោលបាន។
អ្នកនាំពាក្យដដែលនេះបន្តថា អ្វីត្រូវធ្វើនោះ គឺដោះស្រាយបញ្ហាឲ្យដល់ឫសគល់ និងស្វែងរកដំណោះស្រាយសមស្របដែលអាចបំពេញចិត្តភាគីទាំងអស់។ ការរំសាយអាវុធនុយក្លេអ៊ែរកូរ៉េខាងជើង និងការសម្រេចឲ្យបានយន្តការសន្តិភាពយូរអង្វែង ជាអ្វីដែលចិនចង់បាន។ ដោយសាររឿងនេះ ទើបចិនស្នើជាគោលការណ៍ Suspension for Suspension ឡើង ហើយវាជាជំហានសំខាន់ក្នុងការកាត់បន្ថយកម្ដៅក្នុងតំបន់ និងអាចឈានទៅដល់ការចូលតុចរចា៦ភាគីឡើងវិញ។
បើទោះជាសំណើនេះមិនត្រូវបានទទួលយកនៅពេលនេះក្ដី ក្រុងប៉េកាំង បាននិយាយការពារសំណើរបស់ខ្លួន ថាជាសំណើដែលមិនលម្អៀង, មានទិសដៅច្បាស់លាស់, ស្របតាមច្បាប់ និងសមហេតុផលទៀតផង។ ប៉េកាំងក៏អួតដែរថា គំនិតរបស់ខ្លួន ជាជម្រើសត្រឹមត្រូវដែលអាចបញ្ចៀសការកើនឡើងកម្ដៅនៅឧបទ្វីបកូរ៉េបាន និងស្នើភាគីទាំងអស់ឲ្យពិចារណាលើគំនិតរបស់ខ្លួន ដើម្បីស្រាយចំណងដ៏តឹងនេះ៕
Tag:
ចិន
អាមេរិក
ឧបទ្វីបកូរ៉េ
© រក្សាសិទ្ធិដោយ thmeythmey.com