មេក្រុមអាវក្រហមដែលប៉ងសម្លាប់លោក ប្រាយុទ្ធ មិនសំងំនៅខ្មែរឡើយ តែជ្រកកោននៅឡាវ

អន្តរជាតិ

មេក្រុមអាវក្រហមដែលប៉ងសម្លាប់លោក ប្រាយុទ្ធ មិនសំងំនៅខ្មែរឡើយ តែជ្រកកោននៅឡាវ

23, Mar 2017 , 9:39 pm

រូបភាព

រូបភាព៖ បាងកកប៉ុស្តិ៍

ដោយ: ថ្មីៗ

ស្ថាប័នប៉ូលិសថៃបានប្រកាសថា ក្រុមការងារលោកកំពុងស្វែងរកចាប់ខ្លួនមនុស្ស៦ នាក់ក្នុងនោះមានទាំងលោក Wuthipong Kochathamakun ដែលបានរត់គេចខ្លួនតាំងពីឆ្នាំ ២០១៤នោះពាក់ព័ន្ធគម្រោងធ្វើឃាតលោកនាយករដ្ឋមន្ត្រីថៃ។ លើកនេះសារព័ត៌មានថៃបាងកកប៉ុស្តិ៍ ស្រង់សម្តីមេប៉ូលិសជាតិថៃរង និងបកស្រាយខុសពីមុនដោយបញ្ជាក់ថាមេដឹកនាំក្រុមអាវក្រហមខាងលើទទួលបានសិទ្ធិជ្រកកោននៅឡាវ មិនមែននៅសំងំលាក់ខ្លួននៅកម្ពុជាឡើយ។

សារព័ត៌មានថៃបាងកកប៉ុស្តិ៍បានចុះផ្សាយព័ត៌មានថ្មី មួយទៀតពាក់ព័ន្ធគម្រោងធ្វើឃាតលោកឧត្តមសេនីយ៍ប្រាយុទ្ធ ចន្ទអូចា ក្រោយការរឹបអូសបានអាវុធជាច្រើននៅផ្ទះមួយស្ថិតនៅខេត្ត Pathum Thani ដែលជារបស់មេដឹកនាំក្រុមអាវក្រហមលោក Wuthipong Kochathamakun កាលពីសប្តាហ៍នោះ។

សារព័ត៌មាននេះបានស្រង់សម្តីស្នងការរងប៉ូលិសជាតិថៃលោក Srivara Ransibrahmanakul ថា ចលនាឈ្មោះថា «វិទ្យុក្រហម» ជាក្រុមដែលរៀបចំគម្រោងអស់ពេលជាច្រើនខែហើយដើម្បីធ្វើឃាតនាយករដ្ឋមន្ត្រីថៃប្រាយុទ្ធ ចន្ទអូចា និងឧបនាយករដ្ឋមន្ត្រី Prawit Wongsuwon។ ហើយស្ថាប័នប្រឆាំងឧក្រិដ្ឋកម្មរបស់លោកកំពុងស្នើសុំដីកាចាប់ខ្លួនជនសង្ស័យ ៦នាក់ទៀតដែលជាប់ពាក់ព័ន្ធការរៀបគម្រោងការដ៏កខ្វក់នេះផង។

បើតាមស្នងការរងប៉ូលិសខាងលើ ជនសង្ស័យទាំង ៦អ្នកនោះស្ថិតក្រោមការចាប់ខ្លួនស្ថិតក្រោមការចោទប្រកាន់ច្រើនពាក់ព័ន្ធករណីការលាក់ទុកអាវុធធ្វើសង្គ្រាម សម្ភារៈយោធា និងគ្រឿងញៀនជាដើម ហើយបន្ថែមពីនោះពួកគេជាប់ពាក់ព័ន្ធការរៀបគម្រោងបង្កឧក្រិដ្ឋកម្មផងដែរ។

១.មេក្រុមអាវក្រហមមិននៅកម្ពុជាដូចការសន្និដ្ឋានពីមុនឡើយ តែគេបានសិទ្ធិជ្រកកោននៅឡាវ

អ្វីដែលគួរឲ្យកត់សម្គាល់នោះ មេបញ្ជាការរងប៉ូលីសជាតិថៃខាងលើបានអះអាងថាក្នុងចំណោមមនុស្ស ៦នាក់នោះមាន លោក Wuthipong Kochathamakun ដែលជាមនុស្សស្និទ្ធិលោក ថាក់ស៊ីន ស៊ីណាវ៉ាត្រា ផងដែរ។ គេអះអាងថា លោក Withipong នេះទទួលបានសិទ្ធិជ្រកកោននៅក្នុងទឹកដីឡាវដែលជាប្រទេសជិតខាងថៃឯណោះទេ។

ការលើកឡើងនេះ វាខុសពីការបកស្រាយកាលពីដើមសប្តាហ៍ពាក់ព័ន្ធទីកន្លែងដែលមេដឹកនាំក្រុមអាវក្រហមខាងលើលាក់ខ្លួន។ សារព័ត៌មានថៃបាងកកប៉ុស្តិ៍ ដដែលធ្លាប់ផ្សាយកាលពីដើមសប្តាហ៍កន្លងទៅដោយសន្និដ្ឋានសម្តីមេប៉ូលិសថៃ Chaktip Chaijinda ថា លោក Wuthipong កំពុងសម្ងំលាក់ខ្លួននៅក្នុងទឹកដីកម្ពុជា។ មេប៉ូលិសថៃរូបនេះបដិសេធហៅឈ្មោះប្រទេសនោះចំដោយគ្រាន់តែអះអាងថា នៅប្រទេសជិតខាងប៉ុណ្ណោះ។

តាមពិតទៅ មូលហេតុដែលសារព័ត៌មានសន្និដ្ឋានថា លោក Wuthipong កំពុងលាក់ខ្លួននៅកម្ពុជា ដោយសារតែដើមខែកម្ភៈឆ្នាំ ២០១៤ លោក Wuthipong បានរត់ភៀសខ្លួនចេញកម្ពុជាមុនការបោះឆ្នោតនៅថៃ។ ការរត់ភៀសខ្លួននេះកើតឡើង បន្ទាប់ពីលោកនិយាយវាយប្រហារនិងចោទថាឧត្តមសេនីយ៍ ប្រាយុទ្ធ ចាន់អូចា បញ្ជាឲ្យគេសម្លាប់លោក។ ហើយពីរខែក្រោយមក របបសឹកចេញដីកាចាប់ខ្លួនលោកជាផ្លូវការដោយចោទប្រកាន់ថាលោកប្រមាថព្រះមហាក្សត្រ។

កាលពីចុងសប្តាហ៍មុន ប៉ូលិសថៃបានបើកប្រតិបត្តិការមួយដោយរឹបអូសសព្វាវុធជាច្រើនប្រភេទមានទាំងកាំភ្លើង និងគ្រាប់បែកផងដែរ ហើយមនុស្ស៩នាក់ក៏ត្រូវបានចាប់ខ្លួនដូចគ្នា។ គេសន្និដ្ឋានអាវុធទាំងនោះត្រូវបានគេត្រៀមទុកដើម្បីវាយប្រហារប្រឆាំងអាជ្ញាធរថៃ ដែលកំពុងបន្តហ៊ុមព័ទ្ធវត្ត Phra Dhammakaya និងតាមចាប់ខ្លួនចៅអធិការវត្តដែលគាំទ្រក្រុមគ្រួសារស៊ីណាវ៉ាត្រា។ លោកស្ថិតក្រោមការចោទប្រកាន់ថា លោកជាប់ពាក់ព័ន្ធការលាងលុយកខ្វក់។

ក្រោយមានការឃាត់ខ្លួនមនុស្ស និងរឹបអូសអាវុធ ខាងវត្ត Phra Dhammakaya បានចេញមុខបកស្រាយថាខ្លួនមិនបានជាប់ពាក់ព័ន្ធជាមួយមេក្រុមអាវក្រហមខាងលើ ឬវិទ្យុក្រហមឡើយ។ ហើយប៉ូលិសថៃខ្លួនឯងក៏មិនទាន់អាចសន្និដ្ឋានបាននៅឡើយដែរថា ការៀបចំគម្រោងនៃវិទ្យុក្រហមរបស់លោក Withipong នេះទាក់ទងជាមួយរណសិរ្សរួបរួមដើម្បីប្រជាធិបតេយ្យប្រឆាំងរបបផ្តាច់ការ (UDD) ឬក្រុមអាវក្រហមឬអត់ឡើយ។

២.ប្រាយុទ្ធ មិនបារម្ភពីសុវត្ថិភាពខ្លួនឡើយ តែបារម្ភពីការផ្សព្វផ្សាយបំប៉ោងព័ត៌មាន

ដោយឡែកលោកឧត្តមសេនីយ៍ប្រាយុទ្ធ ចន្ទអូចាដែលជាតួអង្គសំខាន់ក្នុងរឿងនេះ បានអះអាងថា លោកបារម្ភខ្លាំងជាងគេលើការផ្សព្វផ្សាយព័ត៌មានពាក់ព័ន្ធរឿងរសើបបែបនេះ ហើយលោកមិនបានបារម្ភពីរឿងគេលួចធ្វើឃាតឡើយ។

យោងតាមសារព័ត៌មានបាងកកប៉ុស្តិ៍ដដែល លោក ប្រាយុទ្ធ បារម្ភខ្លាំងលើការបំប៉ោងព័ត៌មានពាក់ព័ន្ធបញ្ហារសើបដូចជាការរឹបអូសអាវុធសម្រាប់ធ្វើសង្គ្រាម និងការបំបែកគម្រោងធ្វើឃាតមេដឹកនាំនេះ ព្រោះវាអាចធ្វើឲ្យប៉ះពាល់ដល់ការវិនិយោគពីបរទេស។ ពួកគេនឹងបាត់បង់ទំនុកចិត្តក្នុងការចូលមករកស៊ីនៅថៃផង។ លោកបានកត់សម្គាល់ថា សារព័ត៌មានខ្លះហ៊ានផ្សាយថា អាវុធដែលគេរឹបអូសបាននោះមានច្រើនណាស់ ហើយខ្លះទៀតផ្សាយថា អាវុធមានប្រហែល ១០ដើមប៉ុណ្ណោះ។ លោកចង់ឲ្យសារព័ត៌មានទាំងនោះចៀសវាងការបំប៉ោងទិន្នន័យនិងការពិតទាក់ទងនឹងព័ត៌មានដែលពួកគេទទួលបានផងដែរ៕