ជាតិ
សុវត្តិភាព ចរាចរណ៍
បើកហួសល្បឿន គ្មានបណ្ណបើកបរ និងប្តូរពណ៌យានយន្តត្រូវរងពិន័យពី៣ម៉ឺនដល់ជាង១សែនរៀល
× ភ្នំពេញ៖ អ្នកបើកបរយានយន្តត្រូវរងពិន័យប្រាក់ពី ៣ម៉ឺន ដល់ ១សែន២ម៉ឺន៥ពាន់រៀល ប្រសិនបើពួកគេបើកបរយានយន្តហួសល្បឿនកំណត់ចាប់ពី ៤០ (សែសិប) គីឡូម៉ែត្រក្នុងមួយម៉ោងឡើងទៅ ឬបើកបរគ្មានបណ្ណបើកបរ ឬបើកផ្ទុកជាតិអាកុល និងប្តូរពណ៌យានយន្តដោយគ្មានការអនុញ្ញាត ឬបិទពណ៌យានយន្តខុសពីបណ្ណសម្គាល់យានយន្ត ។ នេះបើតាមមាត្រា៩ នៃអនុក្រឹត្យស្តីពី ការពិន័យអន្តរការណ៍ចំពោះអំពើល្មើសនឹងច្បាប់ស្តីពី ចរាចរណ៍ផ្លូវគោក។
តាមអនុក្រឹត្យស្តីពីការពិន័យអន្តរការណ៍ថ្មី រដ្ឋាភិបាលបានបង្គាប់សមត្ថកិច្ចអនុវត្តច្បាប់ឲ្យពិន័យចំពោះអ្នកបើកបរទោចក្រយានយន្ត ឬទោចក្រយានយន្តសណ្តោងរ៉ឺម៉ក ឬត្រីចក្រយានយន្តទឹកប្រាក់ចំនួន ៣០០០០ (បីម៉ឺន)រៀល, អ្នកបើកបរយានយន្តធុនស្រាលចំនួន ៦០ ០០០ (ប្រាំមួយម៉ឺន) រៀល និងអ្នកបើកបរយានយន្តធុនធ្ងន់ចំនួន ១២៥ ០០០ (មួយសែនពីរម៉ឺនប្រាំពាន់) រៀល។
សមត្ថកិច្ចនឹងពិន័យអ្នកបើកបរយានយន្តចំនួនទឹកប្រាក់ដូចគ្នា ក្នុងករណីពួកគេ បើកបរល្មើសមួយចំនួន រួមមាន អ្នកបើកបរទោចក្រយានយន្តមានទំហំស៊ីឡាំងលើសពី ១២៥ (មួយរយម្ភៃប្រាំ) សង់ទីម៉ែត្រគូប ឬមានថាមពលអគ្គិសនីលើសពី ១១ (ដប់មួយ) គីឡូវ៉ាត់ ឬទោចក្រ យានយន្តសណ្តោងរ៉ឺម៉ក ឬត្រីចក្រយានយន្តដោយគ្មានបណ្ណបើកបរ ឬក្នុងរយៈពេលដែលបណ្ណបើកបរ ត្រូវបានដកហូព្យួរទុក ឬទុកជាមោឃ។
ក្រៅករណីល្មើសខាងលើ រួមមាន អ្នកបើកបរទោចក្រយានយន្ត ឬទោចក្រយានយន្តសណ្តោងរ៉ឺម៉ក ឬត្រី ចក្រយានយន្តដោយគ្មានបណ្ណសម្គាល់ និងស្លាកលេខ, ម្ចាស់យានយន្តមិនបានផ្ទេរកម្មសិទ្ធិយានយន្ត លើសរយៈពេលកំណត់ដែលមានចែងក្នុងប្រកាសអន្តរក្រសួងរវាងក្រសួងសាធារណការ និងដឹកជញ្ជូន និងក្រសួងសេដ្ឋកិច្ច និងហិរញ្ញវត្ថុ, អ្នកបើកបរយានយន្តបើកបរដោយពុំមានវិញ្ញាបនបត្រត្រួតពិនិត្យលក្ខណៈបច្ចេកទេសយាន ឬប្រើវិញ្ញាបនបត្រត្រួតពិនិត្យលក្ខណៈបច្ចេកទេសហួសសុពលភាព, អ្នកបើកបរយានយន្តគ្រប់ប្រភេទដែលប្តូរពណ៌ដោយគ្មានការអនុញ្ញាតឬបិទពណ៌មិនត្រឹមត្រូវតាមបណ្ណ សម្គាល់យានយន្ត, ករណីប្រើប្រាស់បណ្ណបើកបរមិនត្រឹមត្រូវតាមប្រភេទយាន, ករណីប្រើបណ្ណបើកបរ ហួសសុពលភាព។
បន្ថែមលើសពីនេះ តាមមាត្រា៩ នៃអនុក្រឹត្យ អ្នកបើកបរនឹងរងការពិន័យចំនួនទឹកប្រាក់ដូចគ្នាក្នុងករណីផ្សេងទៀត រួមមាន ករណីអ្នកបើកបរយានមានកង់ច្រវ៉ាក់ដែកបើកបរលើទ្រូងផ្លូវថ្នល់ក្រាលកៅស៊ូដោយផ្ទាល់, អ្នកបើកបរយានយន្តហួសល្បឿនកំណត់ចាប់ពី ៤០ (សែសិប) គីឡូម៉ែត្រក្នុងមួយម៉ោងឡើងទៅ, ករណីអ្នកបើកបរយានយន្តប្រើប្រាស់សា្លកលេខសម្គាល់យានដែលរចនាខុសពីលក្ខណៈដើម ឬរលុបលេខ ឬបាក់ស្លាកបាត់លេខ ឬដាក់សម្ភារៈ ឬវត្ថុផ្សេងៗបាំងស្លាកលេខ, អ្នកបើកបរយានយន្តមានអត្រាជាតិអាកុលចាប់ពី ០,២៥ ទៅ ០,៣៩មីលីក្រាម ក្នុងមួយលីត្រខ្យល់ ឬចាប់ពី០,៥ ទៅ ០,៧៩ក្រាម ក្នុងមួយលីត្រឈាម, អ្នកបើកបររថយន្តឲ្យមនុស្សជិះលើយានដែលកំពុងសណ្តោង ក្រៅពីអ្នកបើកបរ, អ្នកបើកបរយានយន្តកែច្នៃយានយន្តខុសបទដ្ឋានបច្ចេកទេស និងអ្នកបើកបរយានយន្តប្រណាំងយានដោយគ្មានការអនុញ្ញាតលើផ្លូវសម្រាប់ធ្វើចរាចរណ៍ជាសាធារណៈ។
តាមអនុក្រឹត្យចុះនៅថ្ងៃទី២១ មីនានេះ ឪពុកម្តាយ ឬអាណាព្យាបាល ត្រូវបង់ប្រាក់ពិន័យអន្តរការណ៍ ប្រសិនបើអនីតិជនមានអាយុ ក្រោម ១៥ឆ្នាំ បានប្រព្រឹត្តល្មើសនឹងអនុក្រឹត្យ។ តាមអនុក្រឹត្យដដែល បុគ្គលដែលមិនសុខចិត្តនឹងសេចក្តីសម្រេចរបស់មន្ត្រីមានសមត្ថកិច្ចពេលអនុវត្តច្បាប់ មានសិទ្ធិប្តឹងតវ៉ាទៅប្រធានអង្គភាពដែលគ្រប់គ្រងមន្ត្រីអនុវត្តនោះផ្ទាល់នៅទូទាំងប្រទេស រយៈពេល ៣០ថ្ងៃយ៉ាងយូរ គិតពីថ្ងៃទទួលបង្កាន់ដៃពិន័យអន្តរការណ៍៕
Tag:
ច្បាប់
ចរាចរណ៍
មហាផ្ទៃ
សាធារណការ
© រក្សាសិទ្ធិដោយ thmeythmey.com