ជាតិ
សង្គមជាតិ
ជប៉ុនផ្តល់ថវិកាជាង ៣សែនដុល្លារសម្រាប់សង់អគារសិក្សាចំនួនបួនខ្នង
×
ភ្នំពេញ៖ រដ្ឋាភិបាលជប៉ុនបានផ្តល់ថវិកាចំនួន ៣១៩,៤០៩ដុល្លារអាមេរិក សម្រាប់សាងសង់អគារសិក្សាថ្មីចំនួន ៤ខ្នង ក្នុងខេត្តកំពង់ស្ពឺ រតនគិរី និងខេត្តកណ្តាល ក្រោមជំនួយឧបត្ថម្ភលើគម្រោងទ្រង់ទ្រាយ តូចសន្តិសុខមនុស្សជាតិ (គូសាណូណិ)របស់ជប៉ុន។
ថ្លែងក្នុងពិធីចុះហត្ថលេខាលើកិច្ចសន្យាផ្ដល់ជំនួយ នៅថ្ងៃទី២៤ ខែមីនានេះ ឯកអគ្គរាជទូតវិសាមញ្ញ និងពេញសមត្ថភាពរបស់ជប៉ុនប្រចាំកម្ពុជា លោក ហូរីណូអ៊ុជិ ហ៊ីដេហ៊ីសា បានថ្លែងឲ្យដឹងថា គម្រោងទីមួយគឺ ការសាងសង់អគារសិក្សាមួយខ្នង នៅអនុវិទ្យាល័យស្លាបលែង ស្ថិតក្នុងស្រុកបរសេដ្ឋ ខេត្តកំពង់ស្ពឺដែលចំណាយថវិកាចំនួន ៧៥,៤១៥ដុល្លារអាមេរិក។ លោករំពឹងថា ជំនួយសង់អគារសិក្សាលើកទី៣៩ ដែលជប៉ុនផ្តល់ដល់ពលរដ្ឋខេត្តកំពង់ស្ពឺនេះ នឹងកែលម្អបរិស្ថានអប់រំសម្រាប់សិស្សា នុសិស្សប្រមាណ ១១៣៩នាក់។
ដោយឡែក ជំនួយទីពីរ និងទីបីវិញ លោកបន្តឲ្យដឹងថា រដ្ឋាភិបាលជប៉ុនផ្តល់សម្រាប់សង់អគារសិក្សា ចំនួនពីរខ្នង ក្នុងខេត្តរតនគិរីនោះ រួមមាន អគារសិក្សាមួយខ្នងក្នុងអនុវិទ្យាល័យសម្តេចឪសម្តេចម៉ែ ក្នុងក្រុងបានលុងដែលចំណាយថវិកាចំនួន ៨៣,០០០ដុល្លារអាមេរិក និងគម្រោងសង់អគារសិក្សាមួយខ្នងទៀត ក្នុងសាលាមេត្តយ្យ និងបឋមសិក្សាយ៉ាដាវ ក្នុងស្រុកអូរយ៉ាដាវ ខេត្តរតនគិរីដែលចំណាយថវិកា ចំនួន ៨០,៧៥០ដុល្លារអាមេរិក។ លោករំពឹងថា គម្រោងអគារសិក្សាលើកដំបូងដែលជប៉ុនផ្តល់ដល់ ពលរដ្ឋខេត្តរតនគិរី នឹងជួយកែលម្អបរិស្ថានអប់រំសម្រាប់សិស្សានុសិស្សចំនួនប្រមាណ ២៥០០នាក់។
រីឯជំនួយទីបួន គឺគម្រោងសាងសង់អគារសិក្សាមួយខ្នង នៅសាលាបឋមសិក្សាគគីរ ក្នុងស្រុកកៀនស្វាយ ខេត្តកណ្ដាលដែលចំណាយថវិកាចំនួន ៨២,២៤៤ដុល្លារអាមេរិក។ លោករំពឹងថា ជំនួយអគារសិក្សាលើកទី២៦ដែលជប៉ុនផ្តល់ដល់ពលរដ្ឋខេត្តកណ្តាលនេះ នឹងជួយកែលម្អបរិស្ថានអប់រំដល់សិស្សានុសិស្ស ចំនួន ១៣៥៦នាក់។ ក្រៅពីការសាងសង់អគារសិក្សា ជប៉ុននឹងបំពាក់សម្ភារៈសិក្សាដល់ពួកគេផងដែរ។
ជាមួយគ្នា លោក ហូរីណូអ៊ុជិ ហ៊ីដេហ៊ីសា រំពឹងថា គម្រាងជំនួយជប៉ុនទាំងអស់ នឹងអនុវត្តដោយរលូន ហើយសំណង់ និងសម្ភារៈបរិក្ខារទាំងអស់ទទួលការថែទាំល្អត្រឹមត្រូវ សម្រាប់ផលប្រយោជន៍ពលរដ្ឋខ្មែរ យូរអង្វែង។ បន្ថែមលើសពីនេះ លោកបានថ្លែងចំពោះមុខប្រធានមន្ទីរអប់រំ យុវជន និងកីឡាខេត្តទាំង ៣ ក្នុងស្ថានទូតជប៉ុនថា លោកសង្ឃឹមថា គម្រោងទាំងនេះ នឹងជួយពង្រឹងទំនាក់ទំនងមិត្តភាពរវាងប្រជាជនជប៉ុន និងប្រជាជនកម្ពុជាជាបន្តទៀតផង។
ឱកាសនេះដែរ ប្រធានមន្ទីរអប់រំ យុវជន និងកីឡាខេត្តតាមទាំងបី សុទ្ធតែបានអរគុណរដ្ឋាភិបាល និងប្រជាជនជប៉ុនដែលតែងផ្តល់ជំនួយដល់កម្ពុជា។ ពួកគេបានសន្យានឹងអនុវត្ត និងរក្សាគម្រោងជំនួយរបស់ជប៉ុនឲ្យបានល្អប្រសើរ៕
Tag:
ហូរីណូអ៊ុជិ ហ៊ីដេហ៊ីសា
គូសាណូណិ
អប់រំ
ជប៉ុន
កម្ពុជា
© រក្សាសិទ្ធិដោយ thmeythmey.com