ពីនេះ ពីនោះ
អ្នកដែលធ្លាប់រស់នៅឯបរទេស ហើយត្រឡប់មកស្រុកខ្មែរវិញ មិនហៅថា «អាណិកជន» ទេ
× ភ្នំពេញ៖ ប្រសិនបើជនជាតិខ្មែរណាម្នាក់ កំពុងរស់នៅនិងធ្វើការក្នុងប្រទេសដទៃ ជនជាតិខ្មែររូបនោះ អាចមានឈ្មោះថា «អាណិកជន»។ ប៉ុន្តែ ប្រសិនបើត្រឡប់មកដល់កម្ពុជាវិញ ជនជាតិខ្មែររូបនោះ លែងមានឈ្មោះថា «អាណិកជន» ទៀតហើយ ទោះបីជាធ្លាប់រស់នៅឯបរទេសក៏ដោយ។
ប្រជាពលរដ្ឋខ្មែរមួយចំនួន នៅតែហៅជនជាតិខ្មែរដូចគ្នា ដែលធ្លាប់ទៅរស់នៅឯបរទេសថាជា «អាណិកជន» ដដែល ខណៈជនជាតិខ្មែរូបនោះ កំពុងមានវត្តមាននៅលើទឹកដីកម្ពុជា។ ឧទាហរណ៍ថា៖«ដានី បានរៀបការជាមួយបុរសខ្មែរម្នាក់ ជាអាណិកជន ដែលធ្លាប់ទៅរស់នៅឯសហរដ្ឋអាមេរិក។ ឥឡូវ ពួកគេទាំងពីរនាក់ កំពុងរស់នៅក្នុងរាជធានីភ្នំពេញ»។
ការបន្តហៅបុរសនោះថា «អាណិកជន» ខណៈរូបគេ កំពុងរស់នៅក្នុងប្រទេសកម្ពុជាដូច្នេះ គឺមិនត្រឹមត្រូវ ឡើយ។ ប៉ុន្តែ យើង អាចនិយាយថា៖«ដានី បានរៀបការជាមួយបុរសខ្មែរម្នាក់ ជាអតីតអាណិកជន ដែលធ្លាប់ទៅរស់នៅឯសហរដ្ឋអាមេរិក។ ឥឡូវ ពួកគេទាំងពីរនាក់ កំពុងរស់នៅក្នុងរាជធានីភ្នំពេញ»។
ការប្រើពាក្យថា «អតីតអាណិកជន» បែបនេះ គឺបញ្ជាក់ថា បុរសនោះ ធ្លាប់ជា «អាណិកជន» ដែលបានទៅរស់នៅឯបរទេស ប៉ុន្តែឥឡូវ រូបគេ លែងជា «អាណិកជន» ទៀតហើយ។
វចនានុក្រមសម្តេច ជួន ណាត ពន្យល់ថា «អាណិកជន» គឺជាជនជាតិនានា ដែលនៅអាស្រ័យប្រកបមុខរបរក្នុងប្រទេសដទៃ។ ឧទារហណ៍ថា៖«អាណិកជនជាតិខ្មែរ នៅក្នុងសហរដ្ឋអាមេរិក ត្រូវបានការពារដោយស្ថានទូតកម្ពុជា ប្រចាំសហរដ្ឋអាមេរិក»។ ដូច្នេះពាក្យ «អាណិកជន» គឺយើងនិយាយដោយសំដៅទៅលើជនជាតិខ្មែរណាម្នាក់ ដែលកំពុងរស់នៅក្នុងប្រទេសដទៃ។ នៅពេល ជនជាតិខ្មែររូបនោះ មកកាន់កម្ពុជាវិញ គឺលែងមានឈ្មោះថា «អាណិកជន» ទៀតហើយ៕
© រក្សាសិទ្ធិដោយ thmeythmey.com