កីឡាជាតិ
ជាតិ
ចំបាប់ និងល្បុក្កតោទទួលបានការទាក់ទាញយ៉ាងខ្លាំងពីមហាជននាបុណ្យទន្លេនៅខេត្តស្ទឹងត្រែង រូបភាពពីសហព័ន្ធកីឡាចំបាប់កម្ពុជា
× ខេត្តស្ទឹងត្រែង៖ ចំបាប់បុរាណ និងក្បាច់គុនល្បុក្កតោ ដែលជាមរតកក្បាច់គុនរបស់បុព្វបុរសខ្មែរ ត្រូវបានក្រសួងទេសចរណ៍ និងគណៈកម្មាធិការជាតិអូឡាំពិកកម្ពុជា ដាក់ឲ្យប្រកួត និងសម្តែងក្នុងព្រឹត្តិការណ៍បុណ្យទន្លេនៅខេត្តស្ទឺងត្រែង។ តាមរយៈការបង្ហាញខ្លួននេះ កីឡាទាំងពីរទទួលបានការគាំទ្រយ៉ាងច្រើន ពីសំណាក់មហាជនដែលបានមកចូលរួមពិធីបុណ្យទន្លេនេះ។
កីឡាចំបាប់ និងក្បាច់គុនល្បុក្កតោបានទាក់ទាញទឹកចិត្តកុមារ និងយុវជន ព្រមទាំងមហាជនឲ្យចូលរួមប្រកួត និងទស្សនាយ៉ាងច្រើនកុះករ។ កីឡាទាំងពីរ ត្រូវបានដាក់ឲ្យប្រកួត និងសម្តែងក្នុងថ្ងៃទី២នៃពិធីបុណ្យទន្លេនៅខេត្តស្ទឹងត្រែង កាលពីល្ងាចថ្ងៃទី២៥ ខែមីនា ឆ្នាំ២០១៧។ ពិធីបុណ្យទន្លេដែលធ្វើឡើងក្រោមប្រធានបទ«ទន្លេផ្សារភ្ជាប់ប្រជាជន វប្បធម៌ និងបរិស្ថាន»នឹងបញ្ចប់នៅថ្ងៃទី២៦ ខែមីនា នេះ។
បើយោងតាមអគ្គលេខាធិការសហព័ន្ធកីឡាចំបាប់កម្ពុជា លោក ធិន វិចិត្រ ក្រៅពីការប្រកួត និងសម្តែងរបស់កីឡាករជំនាញពីសហព័ន្ធ ចំបាប់បានទាក់ទាញកុមារ និងយុវជនឲ្យចូលរួមប្រកួតរហូតដល់៤៥គូ ក្នុងនោះក៏មាននារីចូលរួមផងដែរ។ លើសពីនេះ កីឡាដែលជាមរតកក្បាច់គុនរបស់បុព្វបុរសខ្មែរទាំងពីរនេះ បានធ្វើឲ្យមហាជនដែលចូលរួមទស្សនាមានអារម្មណ៍រំភើបសប្បាយរីករាយយ៉ាងខ្លាំងតាមករយៈការចូលរួមប្រកួតរបស់កុមារតូចៗ និងយុវជន។
សម្រាប់ការចូលរួមប្រកួតរបស់កុមារ និងយុវជននេះដែរ សហព័ន្ធកីឡាចំបាប់កម្ពុជាក៏មានការផ្តល់ប្រាក់រង្វាន់លើកទឹកចិត្តផងដែរ ក្នុងនោះអ្នកឈ្នះទទួលបាន១ម៉ឺនរៀល និងអ្នកចាញ់បាន៥ពាន់រៀល។ ប៉ុន្តែសម្រាប់យុវនារី និងកុមារីអ្នកឈ្នះទទួលបាន២ម៉ឺនរៀល និងអ្នកចាញ់ទទូលបាន១ម៉ឺនរៀល។ ក្រៅពីប្រភេទកីឡាទាំងពីរនេះ កីឡាបាល់ទាត់, បាល់ទះ, ប្រដាល់ក្បាច់គុនបុរាណខ្មែរ, ប្រណាំងកង់, រត់ប្រណាំង និងទាញព្រ័ត្រជាដើមក៏ទទួលបានការគាំទ្រយ៉ាងច្រើនកុះករផងដែរ។
គួរបញ្ជាក់ថា គិតត្រឹមថ្ងៃទី២៥ ខែមីនា ដែលជាថ្ងៃទី២នៃព្រឹត្តិការណ៍បុណ្យទន្លេ នៅខេត្តស្ទឹងត្រែង ក្នុងចំណោមកីឡាទាំង១១ប្រភេទដែលដាក់ឲ្យចូលរួមក្នុងព្រឺត្តិការណ៍នេះ បានសម្តែង និងប្រកួតអស់ហើយ។ ប៉ុន្តែក្នុងចំណោមកីឡាទាំងនេះ បានបញ្ចប់ជាស្ថាពរចំនួន៩ប្រភេទកីឡា ខណៈបាល់ទាត់ និងបាល់ទះគ្រោងនឹងបញ្ចប់នៅព្រឹកថ្ងៃទី២៦ ខែមីនា៕
Tag:
ចំបាប់
ល្បុក្កតោ
បុណ្យទន្លេ
ស្ទឹងត្រែង
© រក្សាសិទ្ធិដោយ thmeythmey.com