បើកឆាកពានរង្វាន់ក្របខណ្ឌលីកលំដាប់ទី២ក្រុមវិសាខាលត់ក្រុមកំពង់ស្ពឺ ១៧-០

កីឡាជាតិ

ជាតិ

បើកឆាកពានរង្វាន់ក្របខណ្ឌលីកលំដាប់ទី២ក្រុមវិសាខាលត់ក្រុមកំពង់ស្ពឺ ១៧-០

27, Mar 2017 , 3:48 pm

រូបភាព

ក្រុមវិសាខា បានយកឈ្នះកំពង់ស្ពឺ ១៨ ទល់នឹងសូន្យ ក្នុងការប្រកួតបើកឆាកលីកទី២។ រូបថត Visakha Club

ដោយ:

ការប្រកួតបាល់ទាត់ដណ្តើមពានរង្វាន់ក្របខណ្ឌលីកលំដាប់ទី២កម្ពុជាប្រចាំឆ្នាំ២០១៧ (Cambodian Second League 2017)បានបើករដូវកាលថ្មីរបស់ខ្លួនកាលពីថ្ងៃទី២៦ ខែមីនា ម្សិលមិញ។ នាការប្រកួតបើកឆាកនៅកីឡដ្ឋានស្តាតចាស់ក្រុមវិសាខាបានលត់ក្រុមកំពង់ស្ពឺក្នុងលទ្ធផល ១៧-០។ រីឯក្រុមយុវជនក្រសួងការពារជាតិបានយកឈ្នះក្រុមកំពង់ឆ្នាំង ៣-០ ខណៈស្វាយរៀងបានត្រឹមស្មើ ០-០ ជាក្រុមមកំពង់ចាម។

ក្រុមចំណូលថ្មីវិសាខាបានបង្ហាញភាពខ្លាំង សម្រាប់ការបង្ហាញខ្លួនលើកដំបូងក្នុងពានរង្វាន់ក្របខណ្ឌខេមបូឌានលីក២ឆ្នាំ២០១៧ ដោយក្រុមនេះបានលត់ក្រុមកំពង់ស្ពឺ ១៧-០ ក្នុងថ្ងៃប្រកួតបើករដូវកាលពីរសៀលថ្ងៃទី២៦ ខែមីនា នៅកីឡដ្ឋានកងយោធពលខេមរភូមិន្ទ(ស្តាតចាស់)។ ជ័យជម្នះដ៏អស្ចារ្យនេះ នាំឲ្យក្រុមវិសាខាឈរកំពូលតារាងជាបណ្តោះអាសន្នក្នុងសប្តាហ៍ទី១ ដោយមាន៣ពិន្ទុ។

ចំណែក ការប្រកួតនៅកីឡដ្ឋានខេត្តស្វាយរៀងក្រុមម្ចាស់ផ្ទះស្វាយរៀងបានត្រឹមចែកគ្នាម្នាក់១ពិន្ទុជាមួយក្រុមកំពង់ចាម សម្រាប់ការប្រើកីឡដ្ឋានស្វាគមន៍ក្រុមភ្ញៀវជាលើកដំបូង។ រីឯក្រុមកំពង់ឆ្នាំងបានរងបរាជ័យ ៣-០ ក្រោមថ្វីជើងក្រុមយុវជនក្រសួងការពារជាតិនៅលើទឹកដីរបស់ខ្លួន។ ជ័យជម្នះនេះ បានជួយឲ្យក្រុមយុវជនក្រសួងការពារជាតិឈរលេខរៀងទី២ជាបណ្តោះអាសន្នដោយមាន៣ពិន្ទុ។

ការប្រកួតបាល់ទាត់ដណ្តើមពានរង្វាន់ក្របខណ្ឌខេមបូឌានលីក២នៅឆ្នាំនេះមានក្រុមចូលរួមទាំងអស់ចំនួន៨ក្រុម។ ក្នុងនោះរួមមានក្រុមវិសាខា, យុវជនក្រសួងការពារជាតិ, កំពង់ចាម, ស្វាយរៀង, ក្រុមសូទីឡូអង្គរ, កំពង់ឆ្នាំង, កំពង់ស្ពឺ និងក្រុមយុវជនថ្នាលសាលាបាល់ទាត់ជាតិ៕