ជាតិ
សេដ្ឋកិច្ច
ជប៉ុនផ្តល់ជំនួយ និងកម្ចីសរុបជាង១៤០លានដុល្លារឲ្យកម្ពុជាការពារជំនន់នៅភ្នំពេញ ពង្រីកប្រព័ន្ធទឹកស្អាត...
លោកឯកអគ្គរាជទូតជប៉ុនប្រចាំកម្ពុជា នាពិធីផ្តល់ជំនួយដល់កម្ពុជាកន្លងមក
×![]()
ដោយ: ខន ចំប៉ា
កម្ពុជា និងជប៉ុន នឹងចុះហត្ថលេខាលើលិខិតប្ដូរសារ និងកំណត់ហេតុនៃការទទួល និងផ្ដល់ហិរញ្ញប្បទានឥតសំណង និងឥណទានសម្បទាន សរុបជាង១៤០លានដុល្លារអាមេរិក ដើម្បីអនុវត្តគម្រោងចំនួន៤ នៅកម្ពុជា។ គម្រោងទាំងនោះមាន ការការពារទឹកជំនន់ក្នុងក្រុងភ្នំពេញ ទី២.ការធ្វើឱ្យប្រសើរឡើងពេទ្យបង្អែកខេត្តបាត់ដំបង និងកំណាត់ផ្លូវជាតិលេខ៥ និងពង្រីកប្រព័ន្ធផ្គត់ផ្គង់ទឹកស្អាតក្នុងខេត្តកំពង់ធំ។
រដ្ឋាភិបាលជប៉ុន នឹងផ្តល់ហិរញ្ញប្បទានឥតសំណង និងឥណទានសម្បទាន ជិត១៦ម៉ឺនលានយ៉េន ស្មើនឹងជាង១៤០លានដុល្លារ មកឲ្យកម្ពុជា ដើម្បីអនុវត្តគម្រោងចំនួន៤ ។ នេះបើតាមសេចក្តីប្រកាសព័ត៌មានរបស់ក្រសួងការបរទេសកម្ពុជា។
ពិធីចុះហត្ថលេខាលើជំនួយ និងកម្ចីនេះ នឹងធ្វើឡើងនៅថ្ងៃទី៣០ ខែមីនា នាទីស្ដីការក្រសួងការបរទេសកម្ពុជា រវាងលោក ប្រាក់ សុខុន រដ្ឋមន្ដ្រីការបរទេសកម្ពុជា និង លោក ហូរីណូអ៊ុជិ ហ៊ីដេហ៊ីសា (HORINOUCHI Hidehisa)ឯកអគ្គរាជទូតវិសាមញ្ញ និងពេញសមត្ថភាពនៃប្រទេសជប៉ុនប្រចាំកម្ពុជា។ សេចក្តីជូនព័ត៌មានដដែលបញ្ជាក់ដូច្នេះ និងឲ្យដឹងទៀតថា សម្ដេច ហ៊ុន សែន នាយករដ្ឋមន្ដ្រីកម្ពុជា នឹងធ្វើជាអធិបតីក្នុងពិធីចុះហត្ថលេខានេះ។
បើតាមសេចក្តីជូនព័ត៌មានដដែល ហិរញ្ញប្បទានឥតសំណង និងឥណទានសម្បទាន នឹងបែងចែកទៅឲ្យគម្រោងចំនួន រួមមានទី១. ហិរញ្ញប្រទានឥតសំណង ចំនួន ១០៩ លានយ៉េន ស្មើនឹងប្រមាណ៩៤៩.៩៧៣ ដុល្លារ សម្រាប់អនុវត្តគម្រោងធ្វើឱ្យប្រសើរឡើង នូវការការពារទឹកជំនន់ក្នុងរាជធានីភ្នំពេញដំណាក់កាលទី។ ទី២.ហិរញ្ញប្រទានឥតសំណងចំនួន ១.៤៥៣ លានយ៉េន ស្មើនឹងប្រមាណ១២,៦៦ លានដុល្លារ សម្រាប់ធ្វើឱ្យប្រសើរឡើងមន្ទីរពេទ្យបង្អែកខេត្តបាត់ដំបង។ ទី៣. ឥណទានសម្បទាន សរុបចំនួន ១១.១៣៦ លានយ៉េនស្មើនឹងប្រ មាណ ៩៨ លានដុល្លារ សម្រាប់គម្រោងធ្វើឱ្យប្រសើរឡើងកំណាត់ផ្លូវជាតិលេខ៥ ភាគខាងជើង ចន្លោះក្រុងបាត់ដំបងនិងក្រុងសិរីសោភ័ណជំហានទី។ និងទី៤.ហិរញ្ញប្បទានឥតសំណងចំនួន ៣.២៧១ លានយ៉េន ស្មើនឹងប្រមាណ ២៨,៥ លានដុល្លារ សម្រាប់អនុវត្តគម្រោង ពង្រីកប្រព័ន្ធផ្គត់ផ្គង់ទឹកស្អាត ក្នុងខេត្តកំពង់ធំ។
ប្រទេសជប៉ុន គឺជាដៃគូដ៏សំខាន់មួយ ដែលបានរួមចំណែកយ៉ាងសំខាន់ក្នុងការអភិវឌ្ឍសេដ្ឋកិច្ច សង្គម និងហេដ្ឋារចនាសម្ព័ន្ធរបស់កម្ពុជា។ គម្រោងទាំងនេះ ត្រូវបានរំពឹងទុកថា នឹងជួយកែលម្អដល់ការតភ្ជាប់តំបន់របស់កម្ពុជា ព្រមទាំងធ្វើឲ្យជីវភាព និងសុខភាពរបស់ប្រជាជនប្រសើរឡើង៕
Tag:
ជំនួយ
កម្ចី
កម្ពុជា-ជប៉ុន
© រក្សាសិទ្ធិដោយ thmeythmey.com
